جۇما, 29 ناۋرىز 2024
دەپ جاتىر 4683 10 پىكىر 8 تامىز, 2018 ساعات 10:03

ۆيتسە-ءمينيستردىڭ قىرىق وتىرىگى. ديزەل قىمباتتاي بەرسىن، ديقاندار بىلق ەتپەيدى...

قر ەنەرگەتيكا ۆيتسە-ءمينيسترى بولات اقشولاقوۆ جاعارمايدىڭ، دۇرىسى ديزەل وتىنىنىڭ  قىمباتتاۋى ديقاندارعا كەدەرگى كەلتىرمەيدى دەدى. كەيدە ءبىزدىڭ شەندى-شەكپەندىلەردىڭ وسىنداي كۇلكىلى مالىمدەمەلەرىن جوققا شىعارىپ، ءسوز شىعىنداۋدىڭ قاجەتى جوق. ءوزى نە ايتتى، سونى سول كۇيىندە وقىرمانعا ۇسىنساڭ دا جەتكىلىكتى. ۆيتسە-ءمينيستردىڭ رەسمي جاڭىلتپاشىن وقىپ كورىڭىزدەر. 

ۆيتسە-ءمينيستردىڭ سوزىنە سەنسەك، اجقس-تاردا ديزەل وتىنى باعاسىنىڭ ءوسۋى زاڭدى قۇبىلىس كورىنەدى.

ەنەرگەتيكا ۆيتسە-ءمينيسترى ديزەلدىك وتىندى تۇتىنۋ كولەمىنىڭ ارتۋىنىڭ نەگىزگى فاكتورلارىن ايتا كەلىپ، اۋىل شارۋاشىلىعى تاۋارىن وندىرۋشىلەرگە ء(اشتو) مۇناي ونىمدەرىن ۇستاۋشىلار تاراپىنان بەرىلەتىن ەداۋىر جەڭىلدىك بار دەدى.

بولات اقشولاقوۆ، قر ەنەرگەتيكا ۆيتسە-ءمينيسترى:

- ءاشتو ءۇشىن ديزەل وتىنىنا دەگەن ارزانداتىلعان باعالاردى زاڭنامالىق بەكىتۋ قۇزىرەتتىلىگى ەنەرگەتيكا مينيسترلىگىندە اۋىل شارۋاشىلىعى ءۇشىن قاراستىرىلماعان. ءاشتو-گە مۇناي وڭدەۋ زاۋىتتارىنان ديزەل وتىنىن جونەلتۋ باسىمدىقپەن ىسكە اسىرىلادى. سونىمەن قاتار، جونەلتىلگەن وتىندى باقىلاۋ جانە وعان مونيتورينگ جۇرگىزۋ تاۋلىك سايىن ورىندالادى. ەنەرگەتيكا مينيسترلىگى 2018 جىلعى دالا جۇمىستارىن تۇراقتى ءارى ۋاقىتىلى جۇرگىزۋ ءۇشىن ءاشتو-ءنى جان-جاقتى قولداۋ شارالارىن قابىلداپ جاتىر.

سونىمەن قاتار، 2018 جىلدىڭ دالا جۇمىستارىن ۋاقىتىلى جۇرگىزۋدى قامتاماسىز ەتۋ ماقساتىندا ەنەرگەتيكا مينيسترلىگى اۋىل شارۋاشىلىعى مينيسترلىگىمەن بىرلەسە وتىرىپ، «2018 جىلدىڭ دالا جۇمىستارىنا ديزەل وتىنىن جەتكىزۋ بويىنشا وبلىستاردى ءموز-گە بەكىتۋ كەستەلەرىن» ازىرلەدى. ونىڭ اياسىندا ءاشتو-گە ارنالعان جالپى ءوتىنىم تولىق كولەمدە قاناعاتتاندىرىلدى جانە 769,4 مىڭ ت كولەمىندە بەكىتىلدى. وسىلايشا، فەرمەرلەرگە ديزەلدىك وتىن كوكتەمدە ەگىس جۇمىستارىنا جانە كۇزدە استىق جيناۋعا جەتكىزىلەدى. جىل باسىندا اۋىل شارۋاشىلىعى تاۋارىن وندىرۋشىلەرگە 375 مىڭ توننا ديزەلدىك وتىن ءبولىندى. كۇزگى جۇمىستارعا 394,4 مىڭ توننا بولادى.  

ەنەرگەتيكا مينيسترلىگىنىڭ اقپاراتىنا سايكەس، جەتكىزۋ كەستەسى شىلدە–قازان ارالىعىنا بەلگىلەنگەن.

وسى جىلدىڭ شىلدە ايىنداعى جەتكىزۋ جوسپارى 112,2 مىڭ توننا كولەمى كەزىندە جونەلتىلىم 90,2 مىڭ توننانى نەمەسە 80,4% قۇرادى. جونەلتۋ اقىسى تولەنگەن كولەمگە سايكەس تۇراقتى تۇردە جۇرگىزىلەدى. وسى جىلدىڭ 6 تامىزىنداعى جاعداي بويىنشا ديزەل وتىنىنىڭ جيىنتىق قورى 255,8 مىڭ توننانى قۇرايدى، ونىڭ ىشىندە 193,1 — رەسپۋبليكانىڭ مۇناي بازالارىندا. سونىمەن قاتار، اي-92 بەنزينىنىڭ قورى 347,9 قۇرايدى، ونىڭ ىشىندە رەسپۋبليكانىڭ مۇناي بازالارىندا — 299,7.

«بۇگىندە بۇل كولەم تولىعىمەن وبلىستار بويىنشا بولىنگەن. ديزەل وتىنىنا قويىلعان باعالار مەملەكەتتىك دەڭگەيدە رەتتەلمەيدى. باعا نارىقتا قويىلۋدا. اۋىل شارۋاشىلىعى تاۋار وندىرۋشىلەرىنە قاتىستى باعالارعا ەشقانداي دا مەملەكەتتىك سۋبسيديالاۋ قاراستىرىلماعان. وسىعان قاراماستان، مۇناي ونىمدەرىن ۇستاۋشىلار اۋىل شارۋاشىلىعى تاۋار وندىرۋشىلەرىنە ايتارلىقتاي جەڭىلدىك جاسادى. ماسەلەن، ديزەل وتىنىنىڭ بولشەك ساۋدا باعاسى 1 ليترىنە 183–187 تەڭگە بولسا، اۋىل شارۋاشىلىعىنىڭ قاجەتتىلىكتەرى ءۇشىن رەسۋرس ساقتاۋشىلار ديزەلدى زاۋىتتان 150 تەڭگەدەن شىعارىپ جاتىر.

ءتۇيىن

ۆيتسە-ءمينيستردىڭ سول 150 تەڭگەدەن شىعارىپ جاتقان جاعارمايى وسىنى وقىپ وتىرعان قاي حالىققا، قاي ديقانعا جەتىپ جاتىر ەكەن؟ ايتىڭىزدارشى! ەگىستىك ۋاقىتى جاقىنداعاندا باسقانى بىلاي قويىپ، ەڭ قاجەتتى ديزەلدى قىمباتتاتىپ جىبەرۋ ەكونوميكالىق ديۆەرسيا دەپ قالدى ەكونوميستەر. ال، ۆيتسە-مينيستر... وسىنى ءمينيستردىڭ ءوزى نەگە مالىمدەمەيدى؟ 

ءشارىپحان قايسار

Abai.kz

 

10 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2277
عيبىرات

قايسار رۋحتى عازيز جان

مۇحتار قۇل-مۇحاممەد 3594