جۇما, 29 ناۋرىز 2024
3591 0 پىكىر 14 تامىز, 2018 ساعات 10:36

چەمپيوندار ءبىلىم مينيسترلىگى وزگەرتكەن باپتىڭ كەسىرىنەن وقۋعا تۇسە الماعان

الماتىدا بالالارى وقۋ گرانتىنا ىلىنە الماعان اتا-انالار مەن جاتتىقتىرۋشىلار نارازىلىق ءبىلدىرىپ جاتىر. ايتۋلارىنشا، كىشكەنتايىنان سپورتپەن اينالىسىپ، ەل نامىسىن قورعاپ كەلگەن وقۋشىلار ءبىلىم جانە عىلىم مينيسترلىگى وزگەرتكەن باپتىڭ كەسىرىنەن وقۋعا تۇسە الماعان، - دەپ حابارلايدى Almaty تەلەارناسى.

تەلەارنانىڭ مالىمەتىنشە، وقۋعا تۇسە الماعان  جاستاردىڭ ءبىر بولىگى - رەسپۋبليكالىق سپورت مەكتەبىنىڭ تۇلەكتەرى. بەسسايىس ءتۇرىن ەركىن مەڭگەرگەن قىز-جىگىتتەر وسى ۋاقىتقا دەيىن وزبەكستان، تايلاند، رەسەي سىندى كوپتەگەن ەلدەردە وتكەن حالىقارالىق جارىستاردان تالاي مارتە توپ جارعان ەكەن.

"ساناتى جوعارى باسەكەدەن جۇلدە الىپ، ەل نامىسىن قورعاساق، وقۋعا دا جول اشىلادى دەگەن ءۇمىتىمىزدىڭ ۇزىلگەنىنە وكپەلىمىز", - دەيدى سپورتشىلار.

"مەن بەسسايىستان جاستار اراسىندا قازاقستان چەمپيونى، ازيا ويىندارىندا جەڭىمپاز اتاندىم. قازان ايىندا جاسوسپىرىمدەر اراسىندا وتەتىن وليمپياداعا قاتىسامىن. 114 بالل جيناسام دا، گرانتقا ىلىنبەدىم", - دەيدى ءادىل يبراگيموۆ.

ء"بىز بەسسايىستان ازيا چەمپيونى بولدىق. وسى ۋاقىتقا دەيىنگى ەڭبەگىمىز ءۇشىن وسى وقۋ ورنىندا وقيتىن شىعارمىز دەگەن ەدىك. گرانتتى قىسقارتقاندىقتان، ەشقايسىمىز تۇسە المادىق. ءبىز دە ءبىلىمىمىزدى ارى قاراي جالعاستىرعىمىز كەلەدى", - دەدى ليۋدميلا يانوۆيەۆا.

تەلەارنانىڭ مالىمەتىنشە، بالالارى گرانتقا ىلىنبەي قالعان اتا-انالار تۋريزم جانە سپورت اكادەمياسىنىڭ الدىندا تاڭنان جينالىپ، تاعاتتارىنىڭ تاۋسىلعاندىعىن، تىعىرىققا تىرەلگەن بالالارىنا بيلىكتىڭ كومەك كورسەتۋىن سۇرادى. شاكىرت تاربيەلەپ كەلە جاتقان جاتتىقتىرۋشىلار دا جاعدايدىڭ قيىن ەكەنىن جەتكىزىپ وتىر ەكەن.

"مەنىڭ بالام سپورتتىڭ ۆولەيبول تۇرىمەن اينالىسقان. قازاقستان بويىنشا بەس دۇركىن چەمپيون اتانعان. حالىقارالىق جارىستاردىڭ چەمپيونى. كمس (سپورت شەبەرىنە ۇمىتكەر - اۆت.) قورعاپ الدى. مەنىڭ جوعارى جاقتان سۇرايتىنىم، سپورت سالاسىندا جۇرگەن جاسوسپىرىمدەرگە كوڭىل بولىنسە ەكەن دەيمىن. ويتكەنى، ولار قازاقستانىمىزدىڭ بولاشاعى", - دەيدى اتا-انا قاناعات ءابدىراسىلۇلى.

تەلەارناداعىلاردىڭ مالىمەتىنشە، وسىدان ءبىر ءبىر اي بۇرىن عانا تاراعان تالاپ بويىنشا، 26-باپتىڭ 5-تارماعىنا سايكەس، جالپى ءبىلىم بەرەتىن مەكتەپتەردەگى تۇلەكتەردەن كىم جوعارى بالل جيناسا، سول گرانتقا ىلىنەدى.

"1122 تالاپكەر-سپورتشى تىركەلگەن بولاتىن. 1 مىڭ 122 ادامنىڭ، جوعارعى جەتىستىكتەگى سپورتشىلاردىڭ 107-ءسى عانا وسى 450 گرانتتان الىپ وتىر. ياعني، 343 تالاپكەردىڭ دايىندىق دەڭگەيى تومەن نەمەسە كەيبىرەۋىنىڭ سپورتقا قاتىسى جوق دەپ ايتۋعا بولادى. ياعني، ولار بالىنىڭ جوعارى بولۋىنا بايلانىستى وسى ءبىلىم گرانتتارىن يەمدەنىپ وتىر. ارينە، بۇل كەرى اسەرىن تيگىزەتىنى ءسوزسىز. سەبەبى، تۇسپەي قالعانداردىڭ كوپشىلىگى - كىشكەنتاي كەزىنەن باستاپ سپورتتىڭ قىر-سىرىن مەڭگەرگەن بالالار", - دەدى قازاقتىڭ سپورت جانە تۋريزم اكادەمياسىنىڭ پرورەكتورى مۇحتار ەسقاليەۆ.

اكادەميا باسشىلارى مەن جاتتىقتىرۋشىلارىنىڭ ايتۋىنشا، وسى جىلعا دەيىن حالىقارالىق جانە رەسپۋبليكالىق جارىستاردىڭ جەڭىمپازدارى اتانعان جوعارعى دارەجەدەگى سپورتشىلار وقۋعا تۇسكىسى كەلسە، ولاردىڭ جەتىستىگىنە باسىمدىق بەرىلىپ كەلگەن.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1571
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2265
عيبىرات

قايسار رۋحتى عازيز جان

مۇحتار قۇل-مۇحاممەد 3565