الماتى اكىمى باۋىرجان بايبەك قالانىڭ جاياۋ جۇرگىنشى ينفراقۇرىلىمىن رەكونسترۋكتسيالاۋداعى قۇرىلىس جۇمىستارىنىڭ ساپاسىن تەكسەردى. مەگاپوليس باسشىسى جاڭارعان بىرنەشە كوشەلەردى ارالاپ شىعىپ، قايتا تۇلەگەن اباي داڭعىلىندا دا بولدى.

داڭعىلدى مودەرنيزاتسيالاۋ اياسىندا جاياۋ جۇرگىنشى كەڭىستىگى كەڭەيدى، اسفالتتىڭ ورنىنا كەسپە تاستار توسەلدى. جاقىن ارادا زاماناۋي جانە وتە قولايلى كوشە جيھازدارى قويىلاتىن بولادى.

بۇلاردان وزگە، جاڭا جارىق ديودتى كوشە جانە تروۋتار شامدارى ورناتىلۋدا. جاڭا فونتاندار سالۋ مەن عيماراتتاردىڭ سىرتىن جاڭارتۋ جۇمىستارى اياقتالىپ قالدى. قازان ايىندا ءتۇرلى تۇقىمدى 1000-نان استام اعاشتار وتىرعىزىلادى.

الماتى اكىمى باۋىرجان بايبەك جۇمىس ساپارى بارىسىندا مەردىگەردىڭ نازارىن جىبەرىلگەن كەمشىلىكتەرگە جانە اتقارىلعان ىستەردىڭ بارلىعى قالا تۇرعىندارىنا قولايلى بولۋى ءتيىس ەكەندىگىنە اۋداردى.

«مۇمكىندىگىنشە قالادا كەدەرگىسىز ورتانى قالىپتاستىرۋ قاجەت. كوپ جەرلەردە پاندۋستار قاراستىرىلماعان، سونىڭ ىشىندە تۋريزم اكادەمياسى الدىنداعى جاڭا فونتان ماڭىندا. كەتكەن كەمشىلىكتەردى تۇزەتىڭىزدەر»، - دەپ اتاپ ءوتتى باۋىرجان بايبەك بايتۇرسىنوۆ كوشەسىنىڭ بۇرىلىسى بويىمەن داڭعىلدى ارالاعان كەزدە.

مەگاپوليس باسشىسى قوزعالىس بولىگىنە تىم جاقىن ورنالاسقان كولىك بەكەتتەرى كەشەندەرىن اۋىستىرۋدى جانە جولاۋشى اعىنى ءجيى ورتالىق ستاديون جانى مەن وزگە دە ۋچاسكەلەرگە قوسىمشا بەكتتەر ورناتۋدى تاپسىردى.

ناۋرىزباي باتىر كوشەسى قيىلىسىنا سكۆەر جاساۋ ماسەلەسى قايتا قارالادى، بۇرىنعى تۇركسىب اۋرۋحاناسىنىڭ ماڭىن جاسىلداندىرۋ كولەمى ارتادى.

بۇرىن ستيحيالى كولىك تۇراعى بولعان سەيفۋللين داڭعىلىنىڭ باتىس بولىگىنە كىشى ءپىشىندى ارحيتەكتۋرالىق فورمالار قويىلادى، جاسىلداندىرىلادى جانە زاماناۋي فورماتتاعى ساۋدا ورىندارى پايدا بولادى.

ماسانچي كوشەسىنىڭ شىعىسىنا قاراي كەزىندە دونەر جاساۋشىلار باسىپ الىپ، تۇرعىنداردىڭ رەنىشىن تۋعىزعان ۋچاسكەگە جاسىل جەلەك وتىرعىزىلادى.

بىرقاتار ۋچاسكەلەرگە، سونىڭ ىشىندە لەرمونتوۆ اتىنداعى تەاتر الدىنداعى الاڭعا تروتۋار پليتكاسى قايتا توسەلەدى.

جۇمىس ساپارى بارىسىندا باۋىرجان بايبەك جەلتوقسان كوشەسىندە دە بولدى جانە «تاۋەلسىزدىك تاڭى» ەسكەرتكىشى ماڭىندا قاۋىپسىزدىك ايماعىن جاساۋدى تاپسىردى.

بۇرىندارى مەگاپوليس باسشىسى رەسپۋبليكا سارايى الدىنداعى الاڭعا تروتۋار پليتكالارىن توسەۋدە جىبەرلگەن كەمشىلىكتەردى تۇزەتۋدى تاپسىرعان بولاتىن. بۇلاردان وزگە، قالا اكىمى ابىلاي حان داڭعىلىن قايتا جاساعان «ەليتستروي» كومپانياسىنىڭ ەنشىلەس مەردىگەرلىك ۇيىمىنىڭ جۇمىسىن سىنعا الىپ، ولقىلىقتاردىڭ ورنىن تولتىرۋعا ەكى اي مەرزىم بەردى.

ايتا كەتەرلىگى، جالپى الماتىدا بيىلعى جىلى 524 كوشە جوندەلدى، 1400 ەسكى اۋلا جاڭاردى. 300 كم ارىق سالىندى جانە جوندەلدى، 800 كم ينجەنەرلىك جەلى تارتىلدى.

قالانىڭ بارلىق جەر استى وتپەلى جولدارى جاڭاردى. جىل اياعىنا دەيىن بارلىق كوشە جارىقتارىنىڭ ۇشتەن ءبىرى جارىق ديودتى جانە ەنەرگيا جيناقتاۋشى شامدارعا اۋىستىرىلادى.

Abai.kz