وتكەن اپتادا س. اسفەندياروۆ اتىنداعى  قازاق ۇلتتىق مەديتسينا ۋنيۆەرسيتەتى  «تاكەدا قازاقستان» جشس – مەن ءوزارا ىنتىماقتاستىق تۋرالى مەموراندۋمعا قول قويدى. قول قويۋ راسىمىنە جاپون ەلىنىڭ قازاقستانداعى توتەنشە جانە وكىلەتتى  ەلشىسى  يتيرو كاۆاباتا قاتىستى.

بۇل قۇجات   عىلىمي جانە پەداگوگيكالىق  باعىتتاعى    بىرلەسكەن ءبىرشاما جوبالاردى ىسكە اسىرۋعا مۇمكىندىك تۋعىزادى. بىلىكتى جاپون ماماندارىنىڭ  تاجىريبەسى  قازاق ستۋدەنتتەرىنىڭ  يننوۆاتسيالىق ادىستەر ارقىلى ەمدەۋ  ىسىن مەڭگەرۋىنە  زور ىقپال ەتەرى ءسوزسىز.

«تاكەدا قازاقستان» كومپانياسىمەن ارىپتەستىك قىزىمەتىمىزدىڭ «دەنساۋلىق» مەملەكەتتىك باعدارلاماسى اياسىندا  قويىلعان ماقساتتارعا جەتۋىمىزگە كومەگىن تيگىزەتىنىنە سەنىمدىمىز» - دەيدى، ۋنيۆەرسيتەت رەكتورى تالعات نۇرعوجين. بيىلعى وقۋ جىلى قارساڭىندا، ۋنيۆەرسيتەتكە العاش رەت «فرماتسەۆتيكا ءوندىرىسىنىڭ تەحنولوگياسى» ماماندىعى ءۇشىن  500 گرانت ءبولىنىپ وتىر. ال، وسى سالا بويىنشا الەمدەگى  ۇزدىكتەر قاتارىنا ەنەتىن «تاكەدا» كومپانياسىمەن  ىمىراعا كەلۋ  ارقىلى، بولاشاق فارماتسەۆتەر  الدىڭعى قاتارلى تەحنولوگيالارعا قول جەتكىزىپ،  مول تاجىريبە الاتىن بولادى. ويتكەنى، قازۇمۋ-ءدىڭ كوزدەگەنى – بولاشاق مەديتسينا قىزمەتكەرلەرىنىڭ  ءححى عاسىر تالابىنا ساي، الەمدىك دەڭگەيدە باسەكەگە قابىلەتتى بولىپ، تەحنولوگيالىق  وزىق  ادىستەردى تەرەڭ  يگەرۋىن قامتاماسىز ەتۋ.

«Takeda Pharmaceutical limited»  – وزىق عىلىمي زەرتتەۋلەرگە سۇيەنەتىن حالىقارالىق فارماتسەۆتىك كومپانيا بولىپ تابىلادى. كومپانيا، نەگىزىنەن، ونكولوگيالىق اۋىرۋلار، جۇرەك، قان تامىرلارى اۋىرۋلارى، گاستروەنتەرولوگيا جانە جۇيكە اۋىرۋلارىن ەمدەيتىن ءدارى-دارمەك  شىعارۋمەن اينالىسادى.  وسى ايگىلى كومپانيانىڭ قۇرامىنا ەنەتىن «تاكەدا قازاقستان» جشس-ءى  قازاقستان اۋماعىندا 20 جىل بويى جۇمىس ىستەپ كەلەدى.

قازۇمۋ-ءنىڭ  مۇنداي ۇتىمدى قادامعا بارۋىنا مۇمكىندىك جاساپ وتىرعان  ءجايت – ۋنيۆەرسيتەت قاراماعىنا 6 ەمحانا مەن مەديتسينالىق باعىتتاعى بەلگىلى بەس عىلىمي ينستيتۋتتىڭ  بەرىلۋى.  مۇنداي مىعىم بازا وقۋ ورنىنىڭ  كەڭ قانات جايىپ، عىلىمي-يننوۆاتسيالىق ۇردىسكە كوشۋىنە كوپ سەپتىگىن  تيگىزەدى. ونىڭ ۇستىنە، مۇنداي ارىپتەستىككە بارۋ – مەملەكەتتىڭ وتاندىق ءدارى-دارمەك ءوندىرىسىن دامىتپاقشى جوسپارىن جۇزەگە اسىرا باستاعانىن  دا  كورسەتسە كەرەك.

ۋنيۆەرسيتەت  سوڭعى جىلدارى  جاپون وقۋ ورىندارىمەن تىعىز بايلانىستار ورناتىپ  كەلەدى.    بىزدىڭ جاس عالىمدارىمىز كيوتو ۋنيۆەرسيتەتىنىڭ دوكتورانتۋراسىندا ءتالىم الاتىن بولادى. بار شىعىن  كۇنشىعىس  ەلىنىڭ موينىندا.  ال، ناگاساكي ۋنيۆەرسيتەتى الماتىلىق ارىپتەستەرىنە بىلتىر ەكى گرانت بولسە، بيىل ونداي گرانت بويىنشا ءۇش ستۋدەنت  سول جاقتا ءتالىم الادى. وسى تۇستا، الماتىلىقتار ءۇشىن جاعىمدى جاڭالىق – كازىرگى كۇندەرى  ۋنيۆەرسيتەتتە تاجىريبە  ءبولىسىپ  جۇرگەن ناگاساكي ۋنيۆەرسيتەتىنىڭ ەكى پروفەسسورى تۇرعىنداردى  تەگىن قابىلداپ جاتىر.  كىم دە كىم كەلىپ، كورىنىپ كەتۋىنە بولادى.

Abai.kz