دۇيسەنبى, 30 ناۋرىز 2020
ساڭلاق 1788 3 پىكىر 1 قازان, 2018 ساعات 09:52

قازاقستان مەن ۋكراينانى ساياسي جاقىنداستىرۋعا سپورت مۇرىندىق بولا الادى

2018 جىلدىڭ 30 قىركۇيەگى مەن 6 قازانىنىڭ ارالىعىندا ۋكراينانىڭ استاناسى كيەۆ قالاسىندا WBC («الەم بوكس كەڭەسى») 56-ءشى كونگرەسى وتەدى. جاھانداعى ەڭ بەدەلدى كاسىبي بوكستىڭ حالىقارالىق ۇيىمىنىڭ جيىنى 160 مەملەكەتتەن كەلگەن 700 جۋىق قاتىسۋشىلارىنىڭ باسىن قوسپاق.

كونگرەستىڭ قۇرمەتتى قوناقتارىنىڭ اراسىندا لەننوكس ليۋيس، ەۆاندەر حوليفيلد پەن ەريك مورالەس سەكىلدى جۇدىرىقتاسۋدىڭ جۇلدىزدارى كۇتىلۋدە. اتالعان قۇرىلتايدىڭ وتكىزۋىنە باستى سەبەپكەر بولعان كيەۆ قالاسىنىڭ اكىمى، WBC ماڭگى چەمپيونى ۆيتالي كليچكو كەشە  وتكىزىلگەن ءباسپاسوز ءماسليحاتىندا ەكى سۇراعىما جاۋاپ بەردى. اڭگىمەمىزدىڭ اۋدارماسىن سىزدەردىڭ نازارلارىڭىزعا ۇسىنامىن.

دانيار ناۋرىز، قازاقستاننان كەلگەن جۋرناليست:

- قۇرمەتتى سۇلەيمان مىرزا، قۇرمەتتى ۆيتالي ۆلاديميروۆيچ! ەندى، ۆيتالي ۆلاديميروۆيچ، سىزگە ارنالعان ەكى سۇراعىم بار. بىلەسىز عوي، قازىرگى تاڭدا ۋكراينا مەن قازاقستان اراسىنداعى قاتىناستار ونشا ەمەس. ءسىزدىڭ پىكىرىڭىزشە، ساياساتكەرلەردىڭ قاتەلىكتەرىنە قاراماستان وسىنداي بەدەلدى سپورتتىق جيىن حالىقتاردىڭ جاقىنداسۋىنا ءوز سەپتىگىن تيگىزە مە؟ ەكىنشى ساۋالىم، اۋەسقوي، كاسىپقوي شارشى الاڭىندا قازاقستاندىق سپورتشىلارمەن كەزدەستىڭىز بە؟ ولار قانداي اسەر قالدىردى؟ 

 - مەن ارقاشان ەكىنشى وتانىم – قازاقستاننىڭ وكىلدەرىمەن قۋانا-قۋانا سويلەسەمىن، كەزدەسەمىن، اسەر-سەزىمدەرىمەن بولىسەمىن. بالا كەزىم قازاقستاندا ءوتتى. ارقاشان قازاقستانعا بارىپ، راحاتتانامىن. سپورت – عالامات كۇشتىڭ يەسى. نەلسون ماندەلانىڭ ايتۋىنشا: «سپورتتىڭ قۇدىرەتى – الەمدى وزگەرتپەك». سپورت – ادامداردى جاقىنداستىرادى. وعان قوسا، وسى جاعدايعا ءمازبىز... وكىنىشكە وراي، قازاقستاننىڭ وكىلى گەننادي گولوۆكين سوڭعى جەكپە-جەگىندە جەڭىلدى. ول «كونگرەسكە كەلەمىن» دەپ ۋادەسىن بەردى، بىراق جەڭىلىسىنەن كەيىن (ونى جەڭىلىس دەپ سانامايمىز) ول، وكىنىشكە وراي، وسى جيىنعا قاتىسپايدى. بىراق، وسى سپورتتىڭ كوپتەگەن جانكۇيەرلەرى گولوۆكين ءۇشىن تىلەكتەس. اتاپ ايتقاندا، سپورت ءبىزدىڭ ەلدەردى جاقىنداستىرا الاتىن قۇرال بولىپ تابىلادى. باسقا جاعدايلار، ساياسي ارەكەتتەردىڭ جوسپارى. سونىمەن قاتار، سپورت ساياسي جاقىنداستىرۋعا دا مۇرىندىق بولا الادى. سۇراعىڭىز ءۇشىن راقمەت!

- ال، شارشى الاڭداعى قازاق سپورتشىلارىمەن كەزدەسۋلەرىڭىز جونىندە؟ جالپى العاندا، ءسىز ولارمەن رەسمي تۇردە كەزدەستىڭىز بە؟ الدە، كەزدەسكەن جوقسىز با؟ اۋەسقوي، كاسىپقوي بوكسشى رەتىندە...

 - يۋرچەنكو. مەن كۇنى بۇگىنگى دەيىن دوستاس قارىم-قاتىناستارىمىز ساقتالعان كوپتەگەن قازاق سپورتشىلارىمەن كەزدەستىم. ولارمەن بىرگە، ىقىلىم زامانداعى كەڭەس وداعى قۇراما كومانداسىنداعى جەكپە-جەكتەرىمىزدى ەسكە الامىز.

ءباسپاسوز ءماسليحاتىنان كەيىن، «الەم بوكس كەڭەسى»-ءنىڭ جەتەكشىسى ماۋريسو سۇلەيمان جانە پان كليچكومەن بىرگە ەستەلىك ءۇشىن سۋرەتكە ءتۇستىم. مەر مىرزا جاۋاپتارىنىڭ بەينەجازباسىن وسى سىلتەمەدەن كورە الاسىزدار: https://youtu.be/8j5A1U_S41M

P.S. الگى سۇحبات كيەۆ قالاسى اكىمشىلىگىنىڭ بەسىنشى قاباتىندا بولدى. ءىرى عيماراتتىڭ ىشىندە اداسىپ، ونىڭ قىزمەتتىك كىرە-بەرىسىنە بەت الدىم. ءبىرىنشى قاباتتاعى قىزمەتتىك ءليفتتىڭ ەسىگى اشىلدى. ۆيتالي ۆلاديميروۆيچ نوكەرلەرىمەن بىرگە دالاعا شىقپاقشى ەكەن. ۋكراينا باس قالاسىنىڭ جەتەكشىسى مەنى بايقاپ، توقتالدى. مەن ءبىرىنشى جانە ەكىنشى قاباتتاردى جالعايتىن باسپالدىقتىڭ تومەنگى ساتىسىندا تۇرمىن. پان كليچكو اقپاراتتىق ساياساتقا قاتىستى ءبىر ءوتىنىشىن ماعان ءبىلدىردى. «جارايدى، ورىندايمىن» دەي سالدىم. باسپالداق تايانىشىنىڭ ۇستىنەن ەڭكەيىپ، تومەن جاقتا تۇرعان چەمپيوندى قۇشاقتادىم. ارقاسىنان قاعىپ، قالجىڭدادىم: «ەندەشە، مەن كليچكو اعايىندارىنىڭ ءۇشىنشىسى بولايىن: قاراتورى، كليچكولاردىڭ ەڭ كىشىسى». اتاقتى بوكسشى نوكەرلەرىمەن بىرگە ءماز-ءمايرام كۇلىستى. سولاي قوشتاستىق.

دانيار ناۋرىز

Abai.kz                    

 

 

3 پىكىر