سەنبى, 27 اقپان 2021
1864 0 پىكىر 1 قازان, 2018 ساعات 11:11

قاريالاردى قاراۋسىز قالدىرعان بالالارى اليمەنت تولەۋگە مىندەتتەلەدى

اليمەنتتى ءبىزدىڭ قوعام بالاعا تولەيتىن قاراجات رەتىندە قابىلدايدى، - دەپ جازادى اباي-اقپارات turkystan.kz-كە سىلتەمە جاساپ.

بىراق قاۋقارسىز قارت اتا-انالار ءوز بالالارىنان دا اليمەنت وندىرە الادى. ەگەر بالالارى ءوز ەركىمەن اتا-انالارىنا اليمەنت تولەمەسە، ولاردى سوتقا سۇيرەۋگە قۇقىلى. قاراۋسىز قالعان قاريا ءبىر ەمەس، بىرنەشە بالاسىنا اليمەنت تولەتە الادى. اتا-انا قۇقىعىنان ايىرىلعان قارت كىسىلەر اليمەنت تالاپ ەتە المايدى.

قاريالاردى قاراۋسىز قالدىرعان بالالارى ەكى جاعدايدا اليمەنت تولەۋگە مىندەتتەلەدى. ءبىرىنشىسى، اتا-اناسى ەڭبەككە قابىلەتسىز جانە كومەككە مۇقتاج بولسا. ول ءۇشىن اتا-اناسى ءوزىنىڭ كومەككە مۇقتاجدىعىن راستاۋى ءتيىس. وعان دالەل رەتىندە زەينەتاقى كۋالىگى مەن ەڭبەككە قابىلەتسىزدىگىن راستايتىن انىقتاما كورسەتىلەدى. ماماندار بۇل جاعدايدا ءوز پەرزەنتىنەن اقشا ءوندىرىپ الۋىنا كوپ ۋاقىت كەتەدى دەپ وتىر.

ەگەر قارت ادام وزدىگىنەن قۇجات جيناۋعا قاۋقارسىز بولسا، جەكە اگەنتتىكتەردىڭ كومەگىنە جۇگىنە الادى. مۇنداي كومپانيالار ءوتىنىشتى ونلاين تۇردە راسىمدەيدى. قىزمەت قۇنى اقىلى. شامامەن 15 مىڭ تەڭگەگە جۋىقتايدى. كومپانيا كليەنتىنىڭ اتىنان جۇمىس جۇرگىزۋى ءۇشىن نوتاريۋستان اكەلىنگەن سەنىمحات كەرەك. بۇل دا اقىلى. مۇنداي جاعدايدا، اليمەنت كولەمى ەكى تاراپتىڭ دا ماتەريالدىق جاعدايىنا بايلانىستى. ەگەر بالانىڭ تۇراقتى جۇمىسى، ءۇيى بولماسا، كامەلەتتىك جاسقا تولماعان بالالارى بولسا، سوتتان ءىستى قايتا قاراۋدى سۇراي الادى. سودان كەيىن سوت اي سايىن تولەنەتىن اليمەنت كولەمىن انىقتايدى. بۇدان بولەك، قوس تاراپ كەلىسىمگە كەلىپ، اي سايىن بەرىلەتىن قارجى كولەمىن انىقتاي الادى.

Abai.kz

0 پىكىر