سەيسەنبى, 16 شىلدە 2019
ساياسي پورترەت 28136 34 پىكىر 3 قازان, 2018 ساعات 10:12

بۇل كىسى ءدىن مەن ءدىني بىرلەستىكتى اجىراتا الماي ما؟

27-قىركۇيەكتە قازاقستان پارلامەنتىنىڭ جوعارعى پالاتاسىندا جيىن ءوتىپ، دەپۋتات حانىمدار مەن مىرزالار «قر كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەكى رەت وقىپ، قابىلداماي، ماجىلىسكە قايتارعان ەدى.

بۇل نە زاڭ؟ بۇل – ازاماتتاردىڭ شەت مەملەكەتتەردە جوعارعى ءدىني ءبىلىم الۋىنا تىيىم سالاتىن زاڭ جوباسى ەدى. بۇل – بەتتى تۇمشالاۋعا تىيىم سالاتىن زاڭ جوباسى ەدى.

قوعامدىق دامۋ ءمينيسترى دارحان كالەتاەۆتىڭ ايتۋىنشا، زاڭ جوباسىنا «دەسترۋكتيۆتى ءدىني اعىم»، «ءدىني راديكاليزم»، «ءدىني بىرلەستىكتىڭ قاتىسۋشىسى» (مۇشەسى) دەگەن جاڭا ۇعىمدار ەنگىزىلگەن.

«بۇل ۇعىمداردى ەنگىزۋ جاڭا دەسترۋكتيۆتى ءدىني اعىمداردىڭ يدەولوگياسى، اتريبۋتتارى مەن سىرتقى بەلگىلەرىن تاراتۋعا تىيىم سالۋ، سىرتتان ەلىمىزگە جات يدەولوگيانىڭ ەنۋىنە توسقاۋىل قويۋعا مۇمكىندىك بەرەدى. سونداي-اق، بەت-الپەتتى تانۋعا كەدەرگى كەلتىرەتىن كيىم-كەشەكتى قوعامدىق ورىنداردا كيىپ جۇرۋگە تىيىم سالۋ كوزدەلگەن. مۇنداي شارالار ازاماتتاردىڭ قاۋىپسىزدىگى ءۇشىن قاجەت. مۇنداي نورمالار بەلگيا، فرانتسيا، اۆستريا، بولگاريا جانە باسقا دا بىرقاتار مەملەكەتتىڭ زاڭدارىندا بار»، — دەدى مينيستر سەناتتىڭ جالپى وتىرىسىندا.

ءبىز اراب ەمەس، قازاقپىز

سونىمەن سەناتورلار ەكىنشى وقىلىمدا بۇل زاڭ جوباسىنا وزگەرتۋلەر ەنگىزۋ كەرەكتىگىن العا تارتىپ، زاڭ جوباسىن ماقۇلداماعان. ءماجىلىستىڭ قاراۋىنا قايتارعان. ءبىز بۇل تۋرالى جازدىق. ەندى وسى زاڭ جوباسىن تالقىلاۋ بارىسىندا سەناتتاعى ءداۋ اپام، داريعا نازارباەۆا بىلاي دەپتى:

«ءبىز اراب ەمەس، قازاقپىز. مەن وسىنى ايتقىم كەلەدى… كوبىمىز قىسقا شالبار كيگەن ساقالدى ادامداردى كورگەن كەزدە، ولاردى ءداستۇرلى ەمەس ءدىني اعىمداردىڭ وكىلدەرى، كەيدە ءتىپتى ەكسترەميستىك كوزقاراستاعى يەسى دەپ قابىلداپ جاتامىز. جالپى، مەنىڭ ويىمشا، ءبىزدىڭ زاڭنامامىز وتە ليبەرالدى. مەملەكەتىمىزدە بارلىق دىنگە دەموكراتيالىق كوزقاراسپەن قارايمىز. ەشكىمگە قىسىم كورسەتىلىپ جاتقان جوق. ەگەر ءدىني كوزقاراس قوعامدى دامىتۋعا باعىتتالىپ، تولەرانتتىلىق پەن بەيبىتشىلىكتى، تىنىشتىقتى ناسيحاتتاسا، وندا بۇل جاقسى ەمەس پە؟»

قارامەن ايشىقتالعان جەردە داريعا اپا، قازاقستان زاڭى ليبەرالدى دەيدى. بارلىق دىنگە دەموكراتيالىق كوزقاراستامىز دەيدى. ءيا، دومينانت پارتيانىڭ مۇشەسى ءدىني بىرلەستىكتەردىڭ جۇمىسىنا كەلگەندە دەموكراتيالىق كوزقاراستا قالعاندى ءجون كورىپتى.

شاماسى، ءبىر باسىنا بىرنەشە قىزمەتتە قاتار اتقارىپ جۇرگەن داريعا اپا، ءدىن مەن ءدىني اعىم تۇسىنىكتەرىن شاتاستىرىپ السا كەرەك، ايتپەسە كالەتاەۆ ۇسىنعان زاڭ جوباسى دىنگە شەكتەۋ قويۋ ەمەس، ءدىني قىزمەت پەن ءدىني بىرلەستىكتەر قىزمەتىن رەتتەۋ تۋرالى ەكەنىن بىلمەۋى، يا تۇسىنبەۋى مۇمكىن ەمەس قوي...

داريعا اپا، ءدىن مەن ءدىني بىرلەستىكتى شاتاستىرىپ العان با؟

الدا-جالدا دەپ ايتايىق، ءدىن – ادامزات قوعامىنداعى اسا كۇردەلى دە ماڭىزدى الەۋمەتتىك-مادەني سانا. ءدىننىڭ باستى ماقساتى – ادامنىڭ رۋحاني جەتىلۋى جانە ونىڭ جاراتۋشى قۇدايعاسەنىمى. قازاقستانداعى نەگىزگى دىندەر – يسلام جانە حريستيان دىندەرى. سونداي-اق، يۋدايزم مەن بۋدديزم دە كەڭ قولدانىستا. سوڭعى ساناق بويىنشا (2009) قازاقستان حالقىنىڭ 70,2 پايىزى يسلامدى ۇستاناتىن مۇسىلماندار. 26,3 پايىزى حريستيان دىنىندەگى ەۋروپالىق ۇلت وكىلدەرى. سونداي-اق، 0,1 پايىزى بۋددا ءدىنىنىڭ نانىم-سەنىمىن ۇستايتىندار. سول جىلعى ساناق بويىنشا، 18 ءدىني كونفەسسيا تىركەلگەن.

ال ءدىني بىرلەستىك – ءدىني سەنىمدى ۋاعىزداۋ، تاراتۋ ماقساتىندا قۇرىلعان. وسى ماقساتقا لايىقتى بەلگىلەرى: ءدىن تۇتۋ، قۇدايعا قۇلشىلىق ەتۋ ەتۋ، باسقا ءدىني سالتتار مەن ىرىم-جورالعىلارى بار، سونداي-اق دىنگە ۇيرەتۋ جانە ءوز ءىزباسارلارىنا ءدىني تاربيە بەرۋگە ۇمتىلاتىن ازاماتتاردىڭ ەرىكتى بىرلەستىگى.

قازiرگi كەزدە ەلiمiزدە 70 پايىزداي مۇسىلماننىڭ 2815 دiني بiرلەستiگi جۇمىس iستەيدi ەكەن. ال جان سانى بەلگiسiز پروتەستانتيزم باعىتىن ۇستاناتىنداردىڭ 40-تان استام ءارتۇرلi اعىمدارىنىڭ 1238 ۇيىمى بار. بۇل – بۇكiل رەسپۋبليكاداعى دiني بiرلەستiكتەردiڭ 30 پايىزى. ال 70-تەن استام دiني بiرلەستiكتەر ەش جەردە تiركەلمەي قىزمەت ەتۋدە.

ءتىپتى، پراۆوسلاۆيا ءدىني باعىتىن ۇستانۋشىلار وزدەرىنىڭ سانى جاعىنان ەكىنشى ورىن الادى. بۇگىندە اتالمىش ءدىننىڭ باعىتىندا 3 يرارحيا، 280 پريحود، 8 موناستر قىزمەت اتقارىپ وتىر ەكەن.

داريعا اپا ايتپاقشى، دىندە عانا دىنگە كەلگەندە عانا دەموكراتيالىق پريتسيپتەردى ۇستاناتىن ءبىزدىڭ ەلدە كوپتەگەن ءدىني مەكەمەلەردىڭ، ۇيىمدار مەن ينستيتۋتتاردىڭ قۇرىلۋىنا وڭ اسەرىن تيگىزدى. بىرنەشە مىسال تاعى ايتايىق، ءداستۇرلى ەمەس پروتەستانتيزم، ەۆانگەل حريستيان-باپتيستەر قاۋىمى، باحا ءىلىمى، جەتىنشى كۇن ادۆەنيستەر قاۋىمى، نەوحريستياندىق — «شىركەۋ بىرلەستىگى»، سايەنتولوگيالىق — «سايەنتولوگيا شىركەۋى»، نەووريەنتاليستىك ءدىن «كريشنا ساناسىنىڭ حالىقارالىق قوعامى»، سونىمەن قاتار شايتان توپتارى — «شايتان شىركەۋى»، ۆاححابيزم (ۋاححاب), «مۇسۇلمان ايەلدەرى ليگاسى»، «فاتيما» اسسوتسياتسياسى، «ريفاح» قوزعالىسى، ۇلى ترانستسەندەنتالدى مەديتاتسيا، شري جانە چينموگ ورتالىقتارى، ساتيا ساي ورتالىعى، سوڭعى زاۆەت شىركەۋى، جاڭا عاسىر قوزعالىسى، قۇداي بالالارى (قۇداي وتباسى) جونە ت.ب. بىرقاتار از ساندى ءدىن ءىزباسارلارى دا ارەكەت ەتۋدە.

بۇل اشىق دەرەك كوزدەرىنەن الىنعان مالىمەتتەر. سولاي مىنە، داريعا اپا. بىزدە ءدىن مەن ءدىني بىرلەستىكتەر تۋرالى تۇسىنىك بولەك. ءسىز وسىلاردىڭ قايسىسىن ايتپاق بولدىڭىز؟

داريعا اپا نازارباەۆا

داريعا اپا نۇرسۇلتانقىزى سويلەگەن ءسوزى باسپاسوزدە ءجيى تالقىلاناتىن دەپۋتاتتار ساپىنان. ەندى وسى داريعا اپا نازارباەۆا جايلى ايتايىقشى. ساياسي ءھام ادامي پورترەتىن ءتۇزىپ كورەيىك.

ءبىرىنشى پۋنكت: وتباسى:

55 جاستا. تەمىرتاۋدا تۋعان. پرەزيدەنت نازارباەۆتىڭ ۇلكەن قىزى. مارقۇم راحات اليەۆتىڭ ايەلى بولعان. 2 بالانىڭ اناسى. كەيىن اجىراسىپ كەتكەن.

ەكىنشى پۋنكت: ساياسي كارەراسى:

2003 جىلى رەسپۋبليكالىق «اسار» پارتياسىن قۇرىپ، كەيىن 2006 جىلى ونى بيلىكتەگى قازىرگى «نۇر وتاننىڭ» قۇرامىنا قوسقان. الگى اليەۆتىڭ داۋىنان كەيىن داريعا اپا ءبىراز ۋاقىت ساياساتتان كەتىپ، ءتۇرلى بيزنەستىك قىزمەتتەر اتقارىپ ءجۇردى دە، 2011 جىلى ساياسي ساحناعا قايتا شىقتى.

2012 جىلى پارلامەنتتىك سايلاۋدا جەڭىپ، ماجىلىسكە دەپۋتات بولدى. ءماجىلىستىڭ «الەۋمەتتىك-مادەني دامۋ» دەيتىن كوميتەتىن باسقاردى. 2014 جىلى ماجىلىستە ۆيتسە-سپيكەر بولدى. سونىمەن قاتار، ماجىلىستەگى «نۇر وتان» فراكتسياسىن تىزگىندەدى.

2015 جىلى قىركۇيەكتە ۆيتسە-پرەمەر-مينيستر بولىپ تاعايىندالىپ، تۇپ-تۋرا ءبىر جىلدان سوڭ سەناتقا جەر اۋدارىلدى. قازىر سەناتتا كوميتەت باسقارادى.

ءۇشىنشى پۋنكت: اتاق-داڭقى:

فرانتسيانىڭ «ادەبيەت جانە ونەر» وردەنىن، «بارىس»، «قۇرمەت»، «پاراسات» وردەندەرىن تاققان. قازاقستانداعى ەڭ ىقپالدى ايەلدەر رەيتينگىندە كوش باستاۋشى تاعى وسى كىسى.

ءتورتىنشى پۋنكت: ءانشى:

بۇل كىسىنىڭ انشىلىگى تاعى بار. داريعا اپانىڭ بۇل قىرىن اشۋ ءۇشىن سابەتتىڭ حالىق ءارتىسى، يوسيف كابزوننىڭ ءبىر اۋىز پىكىر بەرگەندى ءجون كوردىك.

«ەگەر بىرەۋ مەنى نازارباەۆتىڭ قىزىن تىڭداۋعا كەلدى دەپ ويلايتىن بولسا، قاتەلەسەدى. مەن ءانشى داريعا نازارباەۆانىڭ تىڭداۋعا كەلدىم. ول كاسىبي ءانشى»، - دەپتى كابزون.

بەسىنشى پۋنكت: وففشور داۋى:

وتكەن جىلى پاناما قۇجاتتارى دەگەن داۋلى قۇجات شىعىپ ەدى عوي. ءيا، سول ءار ەلدىڭ شەندى-شەكپەندىلەرىنىڭ شەتەلگە تىققان-پىققان اقشالارىن اشكەرەلەگەن قۇجات. مىنە، سول قۇجاتتا داريعا اپامنىڭ دا اتى اتالدى. سويتسەك، داريعا اپام 2007-2012 جىلدار ارالىعىندا «Asterry Holdings LTD» دەيتىن وففشورلىق كومپانيانىڭ اكتسيونەرى بولعان ەكەن. پاناما قۇجاتتارىندا ەسىم-سويى ەرەكشە كورسەتىلگەن داريعا اپام، سول كەزدە «ءلام-ميم» دەگەن جوق.

سويلەگەن سوزدەرى:

جوعارىدا ءبىز داريعا نۇرسۇلتانقىزىنىڭ قوعام تالقىسىن تۋدىرعان ءسوزىن جازدىق. ءدىني بىرلەستىكتەر قىزمەتىن رەتتەۋگە قاتىستى زاڭ جوباسىن تالقىلاۋ كەزىندە ايتقانى، ول.

جالپى، داريعا نۇرسۇلتانقىزىنىڭ كوپ ءسوزى قوعام تالقىسىن تۋدىرعان. ەندى سولاردىڭ ءبىرسىپىراسىن ەسكە تۇسىرەيىك.

جاستاردى اسكەرگە كوپتەپ شاقىرتۋدى ۇسىنامىن

«مەكتەپ بىتىرگەن جاستار اراسىندا كوللەدجگە دە، جوعارى وقۋ ورىندارىنا دا تۇسپەيتىندەر كوپ. ولار جۇمىسسىز قالادى. وسى تۇرعىدا ستاتيستيكالىق مالىمەتتەر وتە ناشار. جىل سايىن مەكتەپ بىتىرگەن 24 مىڭعا تارتا تۇلەك ەلىمىزدىڭ نە ەكونوميكالىق، نە الەۋمەتتىك كەڭىستىگىنە ەنە الماۋدا. مەن كەلىسىمشارت بويىنشا قىزمەت اتقارىپ جۇرگەن اسكەريلەردى قىسقارتىپ، جەدەل اسكەري قىزمەتكە قابىلداناتىنداردىڭ سانىن كوبەيتۋدى كوتەرگىم كەلەدى. جاستار اسكەردە مىندەتىن اتقارۋعا مۇمكىندىك بەرۋ كەرەك. جاڭا ماماندىقتاردى مەڭگەرىپ الار ەدى. كەلىسىمشارتتاعىلار بىزدە وتە كوپ. اۋىل جاستارى ءۇشىن بۇل الەۋمەتتىك ليفت بولادى».

بۇل سەناتوردىڭ سەناتورلىق قىزمەتكە تاعايىندالا سالا ايتقان ءسوزى. 2016 جىل.

بولاشاقتا بىزگە قىتاي ءتىلىن ۇيرەنۋگە تۋرا كەلەدى

«ءبىز كەم دەگەندە ءۇش ءتىلدى ءبىلۋىمىز كەرەك، ويتكەنى تاياۋ بولاشاقتا بارىمىزگە قىتاي ءتىلىن ۇيرەنۋگە تۋرا كەلەدى. وڭتۇستىكتە ورنالاسقان ۇلى كورشىمىز - ءبىزدىڭ تاعدىرىمىز، قىتاي زور قارقىنمەن دامىپ كەلەدى. قىتاي - ءبىزدىڭ دوسىمىز، ءبىزدىڭ ساۋدا سەرىكتەسىمىز جانە ەلىمىزدىڭ ەكونوميكاسىنداعى ەڭ ءىرى ينۆەستور. دەمەك، ەرتەڭگى كۇنى ءبىزدىڭ بالالارىمىز ونەركاسىپ نەمەسە اۋىل شارۋاشىلىعى سالالارىنداعى سول زاۋىتتاردا سۇرانىسقا يە بولادى».

بۇل داريعا نۇرسۇلتانقىزى پرەمەر-ءمينيستردىڭ ورىنباسارى قىزمەتىن اتقارعان جىلى ايتقانى. 2016 جىل.

كوپ بىلگىڭ كەلەدى، وقىعىڭ كەلەدى، ال وعان ۋاقىت جوق

«مەن ءتىل ءبىلىمىنىڭ ادامعا بەرەر پايداسى مول دەپ سانايمىن. قايدا بارساڭ دا، باسقا ءتىلدى ەستىپ، ايتقاندارىن ۇققانعا نە جەتسىن. مەن تۋعان تىلىمنەن وزگە، ورىس، اعىلشىن جانە يتاليان ءتىلىن بىلەمىن. سونداي-اق، نەمىس ءتىلىن ورتاشا دەڭگەيدە بىلەمىن، بارلىعىن تۇسىنەمىن، نەمىس تىلىندە فيلمدەر كورەمىن، تەك تاجىريبە جەتىسپەيدى. كەزىندە اتا-انام «ۋاقىتتى بوسقا وتكىزبەي، وقي بەر، كەيىن ۋاقىتىڭ بولمايدى» دەگەن ەدى. مەن ايتقاندارىن قازىر ءتۇسىندىم. ولار، ارينە، دۇرىس ايتقان. شىنىمەن دە قازىر كوپ بىلگىڭ كەلەدى، وقىعىڭ كەلەدى، ال وعان ۋاقىت جوق».

بۇل داريعا نۇرسۇلتانقىزى نازارباەۆانىڭ 2016 جىلعى سۇحباتىندا ايتقانى.

ەلباسى – ەڭ ۇلكەن قۇرمەتكە لايىق ادام

«مەن بۇل جاڭالىقتى جاڭا عانا ەستىدىم. "تومەننەن" ۇسىنىلعان باستاما بولسا كەرەك. ءتۇرلى سەبەپتەر بويىنشا بۇل سۇراققا ماعان وبەكتيۆتى جاۋاپ بەرۋ قيىن. بىراق ەلىمىزدىڭ ازاماتى رەتىندە، 25 جىلداعى جەتىستىكتەرىمىزدى ماقتان تۇتاتىن ازامات رەتىندە بۇل شەشىمدى دۇرىس دەپ ەسەپتەيمىن. بۇگىنگى بەيبىت، تىنىش ءومىرىمىز ءۇشىن ءبىزدىڭ كوشباسشىمىز ۇلكەن قۇرمەتكە لايىق».

بۇل داريعا نۇرسۇلتانقىزىنىڭ الماتىداعى فۋرمانوۆ كوشەسىنە پرەزيدەنتتىڭ ەسىمىن بەرۋ تۋرالى باستاماعا قاتىستى ايتقان پىكىرى. 2017 جىل.

ءار اكىمنىڭ تىكۇشاعى بولۋى ءتيىس

«قازىر ءبىز مىنە Eurocopter وندىرىسىندە قوناقتامىز. ارى قاراي دا ونىڭ دامۋىن كورسەتۋ كەرەك. سەبەبى، قازاقستاندىقتار وسى تىكۇشاقتاردىڭ قانشالىقتى پايدالى ەكەندىگىنەن تولىق قاندى مالىمەتتى حاباردار ەمەس بولۋى مۇمكىن. سانيتارلىق اۆياتسيا دامۋى ءتيىس. ار اكىمنىڭ وسىنداي تىكۇشاعى بولۋى ءتيىس، اسىرەسە، اۋىلشارۋاشىلىق قوجالىقپەن اينالىساتىندار ءۇشىن. 500 شاقىرىم جەردى كولىكپەن ارالاپ شىعۋ وتە قيىن. ال تىكۇشاقپەن ەكى-ءۇش ساعات ۇشىپ، بارلىعىن كورۋگە بولادى». 

بۇل «ەۆروكوپتەر كازاحستان ينجينيرينگ» جشس زاۋىتىنا بارعان ساپارىندا سويلەگەن ءسوزى. 2017 جىل.

قۇدايعا شۇكىر، ورىس ءتىلىن ەشكىم الىپ تاستاعان جوق

«قۇدايعا شۇكىر، ورىس ءتىلىن ەشكىم الىپ تاستاعان جوق. مەن وزىمە ىڭعايلى تىلدە سويلەدىم. پرەزيدەنتتىڭ تاپسىرماسىن ءبارىمىز دە ورىنداۋعا تىرىسامىز. ورىس ءتىلدى ەشكىم ءالى جويعان جوق. قۇدايعا شۇكىر، ونداي بولمايتىن دا شىعار. بىراق ءبىز باسقا دا ازاماتتاردى سىيلاۋىمىز كەرەك. سوندىقتان بۇل ماسەلەدە شەكتەن شىعۋعا بولمايدى. ۇلتارالىق كەلىسىم مەن دوستىققا ەشكىم شەكتەۋ قويعان جوق. ەل اۋماعىنداعى جانە مەملەكەتتىك ورگاندارداعى تىلدەر كونستيتۋتسيامەن بەكىتىلگەن».

بۇل نارينە ميكاەليانداردىڭ ءوزى ءتىل سىندىرىپ قازاقشا سويلەپ جاتقاندا، سەناتتاعى سۇراعىن رەسەيدىڭ مەمتىلىندە قويعان كەزدە، جۋرناليستەرگە بەرگەن جاۋابى. 2018جىل.

تسيفرلاندىرۋ ترولدەر مەن فەيكتەرگە جول اشتى

«اشىق ينتەرنەت الاڭى تەك قانا تالانتتى جۋرناليستەرگە عانا ەسىك اشقان جوق. سونىمەن قاتار، اقپاراتتىق سوعىستىڭ كوزگە كورىنبەيتىن ساربازدارىنا دا جول اشتى. فەيكتەرمەن ترولدەر  جالعان اقپارات شىعارىپ، قوعامدىق پىكىرگە ىقپال ەتە باستادى. ولاردىڭ قاسىندا تابلويدتار ابىرويلى بولىپ وتىر. عالامتوردىڭ قارقىندى دامۋى، الەۋمەتتىك جەلىلەردىڭ ءومىردىڭ اجىراماس بولىگىنە اينالعانى الەمدى تۇبەگەيلى وزگەرتتى. دەۆايستار مەن گادجەتتەر قولجەتىمدى. بۇل كەز كەلگەن ادامنىڭ مەديپروتسەسكە قاتىسۋىنا كەپىلدىك بەرىپ وتىر. بلوگەرلەر مەن جەلىلىك اۆتورلار بەدەلدى جۋرناليستەرمەن باسەكەگە ءتۇسىپ جاتىر. سونىڭ كەسىرىنەن ءىرى باسىلىمدار تيراج جوعالتۋدا».

بۇل داريعا نۇرسۇلتانقىزىنىڭ الماتىدا وتكەن ەۋرازيالىق مەديا فورۋمدا سويلەگەن ءسوزى. 2018 جىل.

ءتۇيىن. ءبىز بۇگىن سەناتور، ءانشى، پولوگلوت داريعا نۇرسۇلتانقىزىنىڭ سوڭعى ءۇش جىلدا سويلەگەن سوزدەرىنە شولۋ جاسادىق. راس، بۇل ءۇش جىلدا داريعا اپام ءبىراز سۇحبات بەردى. ءبىراز دۇنيەنىڭ باسىن شالىپ سويلەدى. دەگەنمەن ءبىز سولاردىڭ ىشىندە جۇرت قىزۋ تالقىلادى-اۋ دەگەندەرىن ەسكە تۇسىردىك.

ەندى اۋەلگى اقپاراتقا ورالايىق. داريعا نۇرسۇلتانقىزى، ءدىن مەن ءدىني بىرلەستىك ەكى بولەك نارسە. ءدىني سەنىمگە شەكتەۋ قويۋ – ءسىز ايتقانداي دەموكراتيالىق پرينتسيپكە قايشى، ادامدىڭ جەكە قۇقىعىن تاپتاۋ بولىپ سانالادى. ال ءدىني بىرلەستىك جۇمىسىن رەتتەۋ تۋرالى زاڭنىڭ قاجەتتىلىگىن، ءبىز ايتپاساق تا داريعا اپامىز ءتۇسىنۋى كەرەك دەپ ويلايمىز.

نۇرگەلدى ابدىعانيۇلى

Abai.kz

 

 

34 پىكىر