جەكسەنبى, 16 مامىر 2021
بيلىك 3297 0 پىكىر 3 قازان, 2018 ساعات 21:13

ەكسپو-دان بوساعان حوستەلدەر جاتاقحانالارعا اينالۋدا

بۇل تۋرالى «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆتىڭ استانادا ەلباسىنىڭ بەس الەۋمەتتىك باستاماسى بويىنشا اتقارىلعان جۇمىستارمەن تانىسۋ بارىسىندا بەلگىلى بولدى.

ستۋدەنتتەردى جاتاقحانامەن قامتۋ استانا ءۇشىن وزەكتى ماسەلەلەردىڭ ءبىرى. بۇگىندە ەلوردادا جوعارى وقۋ ورىندارى مەن كوللەدجدەردىڭ 16 مىڭعا جۋىق ستۋدەنتى جاتاقحاناعا مۇقتاج. وسى ماسەلەنى شەشۋ ءۇشىن قالالىق اكىمدىك «پرەزيدەنتتىڭ بەس الەۋمەتتىك باستاماسى» اياسىندا ەكسپو حالىقارالىق كورمەسىنەن كەيىن بوس قالعان حوستەلدەردى ۋاقىتشا جاتاقحانا رەتىندە پايدالانۋدى قولعا العان. بۇل ارينە پيلوتتىق جوبا. ياعني الداعى ۋاقىتتا جاڭا جاتاقحانالار سالىنادى. بىراق سوعان دەيىن ستۋدەنتتەر وسىنداي ورىنداردا تۇرماق.

ستۋدەنتتەر جاتاقحاناسىنا اينالعان سونداي ورىنداردىڭ ءبىرى «ءال-قۋات» حوستەلى. «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ، «پرەزيدەنتتىڭ بەس الەۋمەتتىك باستاماسىنىڭ» جۇزەگە اسىرىلۋىن باقىلاۋ جونىندەگى رەسپۋبليكالىق قوعامدىق كەڭەستىڭ توراعاسى، سەنات دەپۋتاتى باقىتجان جۇماعۇلوۆ جانە پارتيا استانا قالالىق فيليالىنىڭ توراعاسى، استانا قالاسىنىڭ اكىمى باقىت سۇلتانوۆ باستاعان توپ اتالعان نىسانعا ارنايى بارىپ، «جوعارى ءبىلىم بەرۋدىڭ قولجەتىمدىلىگى مەن ساپاسىن ارتتىرۋ جانە ستۋدەنت جاستاردىڭ جاتاقحاناداعى جاعدايىن جاقسارتۋ» باستاماسىنىڭ ىسكە اسىرىلۋىمەن تانىستى.

كەشەن ديرەكتورى گۇلجانات ماۋسىمباەۆانىڭ ايتۋىنشا، 400 ورىنعا ارنالعان بۇل حوستەل 2015 جىلى اشىلعان. ونىڭ جالپى اۋدانى – 5 مىڭ شارشى مەتردى قۇرايدى. ياعني مۇندا 90 بولمە، 150 ورىندىق اسحانا مەن 120 ورىندىق ءماجىلىس زالى بار. ناتيجەسىندە حوستەل ارقىلى «ءال-قۋات» كومپانياسى 18 ادامدى جۇمىسپەن قامتاماسىز ەتىپ وتىر.

«نۇر وتان» پارتياسى توراعاسىنىڭ ءبىرىنشى ورىنباسارى مۇنداي قادامنىڭ ءتيىمدى ەكەنىن ايتتى.

– جاتاقحاناعا اينالعان حوستەلدەردە ستۋدەنتتەردىڭ ساپالى ءبىلىم الۋىنا بارلىق جاعداي جاسالعانىن كورىپ وتىرمىز. سوندىقتان وسىنداي قادامدى ستۋدەنتتەردى جاتاقحانامەن قامتۋدىڭ ناقتى ءارى ءتيىمدى جولى دەپ دەپ ايتۋعا تولىق نەگىز بار. ءتىپتى استانانىڭ بۇل تاجىريبەسىن باسقا دا وڭىرلەردە قولدانۋدىڭ بەرەرى مول دەپ ەسەپتەيمىز. وسىلايشا ەلباسىنىڭ بەس الەۋمەتتىك باستاماسى باس قالامىزدا ءساتتى جۇزەگە اسىرىلۋدا. باستامالاردىڭ ءارى قاراي دا ۋاقىتىلى جانە ساپالى ورىندالۋى ءۇشىن «نۇر وتان» پارتياسى قوعامدىق باقىلاۋ جۇمىستارىن جالعاستىراتىن بولادى، – دەدى ماۋلەن اشىمباەۆ.

سونىمەن قاتار اتالعان توپ حالىقتى قولجەتىمدى باسپانامەن قامتۋ اياسىندا جۇزەگە اسىرىلىپ جاتقان «7-20-25» باعدارلاماسىنىڭ ورىندالۋ بارىسىمەن تانىسىپ، ساكەن سەيفۋللين اتىنداعى اگروتەحنيكالىق ۋنيۆەرسيتەتىندە وتكەن قوعامدىق كەڭەستىڭ وتىرىسىنا قاتىستى.

Abai.kz

0 پىكىر