بۇگىن قىزىلوردا قالاسىندا  قازاقستان رەسپۋبليكاسى قر مادەنيەت جانە سپورت مينيسترلىگى  ءتىل ساياساتى كوميتەتى شايسۇلتان شاياحمەتوۆ اتىنداعى «ءتىل – قازىنا» ۇلتتىق عىلىمي-پراكتيكالىق ورتالىعى «جاھاندانۋ جاعدايىنداعى ءتىل ۇيرەتۋدىڭ يننوۆاتسيالىق ءادىس-تاسىلدەرى» رەسپۋبليكالىق سەمينارىن وتكىزدى.

سەمينار جۇمىسىنا ءتىل ساياساتى كوميتەتىنىڭ ساراپشىسى قوناي حالىم،    شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ  اتقارۋشى ديرەكتورى ەربول تىلەشوۆ، قىزىلوردا وبلىستىق ىشكى ساياسات باسقارماسىنىڭ باسشىسى تالعات ماحانوۆ، شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى əدىستەمەلىك ءبولىمىنىڭ باسشىسى سابيرا ساپينا جانە ءتىل ساياساتى كوميتەتىنىڭ قىزمەتكەرلەرى، ادىسكەر عالىمدار، ءتىل ماماندارى، استانا، الماتى قالالارى جانە وبلىس ورتالىقتارىنداعى مەملەكەتتىك ءتىلدى وقىتۋ ورتالىقتارىنىڭ  ماماندارى قاتىستى.

شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ  اتقارۋشى ديرەكتورى ەربول  تىلەشوۆ  «جاڭا قازاق ءəلىپبيى: ۇلتتىق وركەنيەت باعدارى  جəنە جاھاندىق دامۋمەن ساباقتاستىق» اتتى بايانداما جاسادى.

ول «ءتىل دەگەنىمىز – بەلگىلى ءبىر سوزدەردىڭ ءوزارا تىركەسۋ كومبيناتسياسى. تىلدەگى سوزدىك قوردىڭ بىرلىكتەرى كەيدە اتاۋ تۇلعادا تۇرىپ، كەيدە تۇرلەنىپ ءوزارا بايلانىسقا تۇسەتىنى دە، ءار ءتىلدىڭ تابيعاتىنا ساي بايلانىسۋ تاسىلدەرى بولاتىنى دا بەلگىلى. شيرەك عاسىرداي ۋاقىت قازاق ءتىلىن ۇيرەتۋ ناتيجە بەرمەي كەلسە، وعان ءتىل سالاسىندا جۇرگەندەردىڭ دە «ۇلەسى» بار دەپ ويلايمىز. ءتىل ۇيرەنۋشىنىڭ كۇندەلىكتى قاراپايىم قولدانىسىنا ەڭ قاجەتتى بەلسەندى لەكسيكانى تاڭداۋ سياقتى ماڭىزدى باستامانى بىرلەسە اتقارۋدىڭ قامىنا كىرىسكەن ءجون دەر ەدىك»-دەدى شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ  اتقارۋشى ديرەكتورى ەربول  تىلەشوۆ.

مىنە، بۇگىنگى «جاھاندانۋ جاعدايىنداعى ءتىل ۇيرەتۋدىڭ يننوۆاتسيالىق ءادىس-تاسىلدەرى» رەسپۋبليكالىق سەمينارى تىڭ ادىستەرگە باي جاڭاشىل تەحنولوگيالار ارقىلى ءتىل ۇيرەنۋدىڭ جولىن تاڭداۋ.

قاراعاندى وبلىسى تىلدەردى وقىتۋ ورتالىعىنان كەلگەن  وقىتۋشى دينارا قۋانباەۆا  «قازاق ءتىلى ساباقتارىندا زاماناۋي مۋلتيمەديالىق تەحنولوگيالاردى، Playposit, Socrstive, Thinglink ونلاين باعدارلامالارىن  قولدانۋدىڭ ءادىس-تاسىلدەرى پراكتيكا جۇزىندە كورسەتىلدى. قازاق ءتىلىن مەڭگەرتۋدە قولدانىلاتىن زاماناۋي تەحنولوگيانىڭ ءبىر ءتۇرى – ينتەرنەت جەلىسىندەگى on-line باعدارلامالار ساباقتىڭ بارىسىن ۇتىمدى، ءتيىمدى، ۇنەمدى قولدانۋعا مۇمكىندىك بەرەدى. On-line باعدارلامالار – مۋلتيمەديالىق ءادىستىڭ ءبىر ءتۇرى. قازىرگى تاڭدا كۇندەلىكتى قولدانىستا ءجيى پايدالانىلاتىن on-line باعدارلامالار: Thinglink.com, Playposit.com, Socrative.com, kahoot.it, Google.doc قىزمەتى»-بۇگىنگى كۇننىڭ ماڭىزدى تەحنولوگيالىق جەتىستىكتەرى دەپ ويىن ودان ءارى جالعادى.

«ونىڭ ءداستۇرلى ادىستەردەن ارتىقشىلىقتارى سينكرەتتىك قاسيەتى: ءبىر ساتتە كورۋ مەن  ەستۋ بويىنشا قابىلداۋ مۇمكىندىگى، اقپاراتتى الۋدا ستۋدەنتتىڭ  ءوزى ارەكەت  ەتۋى ارقىلى بەلسەندى  قاتىسۋىندا. قايتالاپ تالداۋدى قاجەت ەتەتىن بۇرىنعى باعدارلامالاردى قايتا شىعارۋ ارقىلى ولارعا قايتا ورالۋ مۇمكىندىگىن تەز ارادا ورىندايدى. ءتىل ۇيرەنۋشىنى شىعارماشىلىق اركەتكە ىنتالاندىرادى. وقىتۋدى مەيلىنشە  دارا سيپاتتا جۇرگىزۋگە مۇمكىندىك بەرەدى. ءتىل ۇيرەنۋ تىكەلەي ءتىل ۇيرەنۋشىنىڭ  ءوز ارەكەتى ارقىلى جۇرەدى.وقۋ باعدارلاماسىنداعى وقۋ  ماتەريالدارىن پايدالانۋدا، ولاردى وقىپ مەڭگەرۋدە شەگىنۋىنە دە،  تۇراقتى كورىپ تالداۋىنا دا، تاڭداۋى بويىنشا ىلگەرى وتۋىنە دە بولادى»-دەدى ويىن تۇيىندەدى دينارا كۋانباەۆا.

سەميناردىڭ ماقساتى – مەملەكەتتىك ءتىلدى وقىتۋدىڭ ادىستەمەسىن جەتىلدىرۋ، وزىق تاجىريبەنى  زەردەلەۋ جانە قورىتۋ، وقىتۋدىڭ يننوۆاتسيالىق ءادىس-تاسىلدەرىن تاجىريبەگە ەنگىزۋ، زاماناۋي مۋلتيمەديالىق تەحنولوگيالاردى قولدانۋدىڭ ءادىس-تاسىلدەرىن ۇيرەتۋ، لاتىننەگىزدى قازاق ءتىلىنىڭ ەملە ەرەجەلەرىن ۇيرەتۋدە جاڭاشىل تەحنولوگيالاردى قولدانۋ ادىستەرىن تانىستىرۋ بولاتىن.

شايسۇلتان شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعى əدىستەمەلىك ءبولىمىنىڭ باسشىسى سابيرا  ساپينا «لاتىن گرافيكاسى نەگىزىندەگى قازاق ءتىلىنىڭ جاڭا ەملە ەرەجەلەرىن وقىتۋ ماسەلەلەرى» تاقىرىبى بويىنشا ەملە ەرەجەلەرىنىڭ جوباسى تانىستىرىلدى. جازۋ جوباسىنداعى جاڭا ەرەجەلەر، وزگەرىستەر ەنگەن ەرەجەلەر مىسالدار ارقىلى ءتۇسىندىرىلدى. تىڭداۋشىلار ەرەجەلەر جوباسىن ۇلكەن قىزىعۋشىلىقپەن قابىلداپ، كەيبىر ماسەلەلەر بويىنشا پىكىرلەرىن ءبىلدىردى. ەملە ەرەجەلەرىندە سويلەۋ ءتىلىنىڭ زاڭدىلىقتارى ساقتالعاندىعىن، بۇل ءوز رەتىندە ءتىل ۇيرەتۋ كەزىندە، اسىرەسە، شەتتىلدى سوزدەردىڭ جازىلۋىن ۇيرەتۋ كەزىندە وڭتايلى بولاتىندىعىن اتاپ كورسەتتى»-دەپ  سوزىن تۇيىندەدى.

ال التىنگۇل  تəڭىربەرگەنوۆا،  اقتوبە وبلىسى تىلدەردى وقىتۋ ورتالىعىنىڭ وقىتۋشىسى

«قازاق ءتىلى ساباقتارىندا ساندىق ءبىلىم بەرۋ رەسۋرستارىن پايدالانۋ ماڭىزدى. ءبىزدىڭ  شەبەرلىك ساعاتىمىز «قازاق ءتىلى ساباقتارىندا ساندىق ءبىلىم بەرۋ رەسۋرستارىن پايدالانۋ» تاقىرىبىندا وقىتۋدىڭ  جاڭاشىل، بەلسەندى  ءادىس-تاسىلدەرى جانە قازاق ءتىلىن شەتەل ءتىلى نەمەسە ەكىنشى ءتىل رەتىندە وقىتۋ ادىستەمەسى  نەگىزىندە  قۇراستىرىلعان. الدىمەن شەبەرلىك  ساعاتىمىزدا ينتەراكتيۆتى  «Lepbook»   تانىستىرىلادى. لەپبۋك دەگەنىمىز - قىزىقتى ينتەراكتيۆتىك پاپكا. لەپبۋك – سالىستىرمالى تۇردە وقۋدىڭ جاڭا ءتاسىلى. لەپبۋك - ول ينتەراكتيۆتىك ادىستەمە، ونى قۇراستىرۋ جونىندە كەلەسى ءادىس-تاسىلدەر قولدانۋعا بولادى: سالىستىرمالى تالداۋ، ىزدەنىس، پروبلەمالىق سۇراقتار، ديداكتيكالىق ويىندار، اڭگىمە، سيپاتتاۋ، سيۋجەتتىك ويىندار ت.س.س. بۇل قاتىسۋشالاردىڭ سويلەۋ داعدىلارىن دامىتادى. ويىن ەركىن جەتكىزىپ، ديالوگ قۇرۋعا باعىتتايدى. ساباق قاراپايىم ا1 جانە بازالىق ا2 دەڭگەيلەرىنە ارنالعاندىقتان، ولاردىڭ سويلەۋ داعدىلارىن قالىپتاستىرۋ ماقساتىندا بۇل «Lepbook»-تا سويلەسىم تاپسىرمالارىنا باسا نازار اۋدارىلادى. ساباقتى بەكىتۋ، قورىتىندىلاۋ ماقساتىندا تەستتىك تاپسىرمالار ارقىلى «Plickers» جانە «Kahoot» باعدارلامالارى تانىستىرىلادى. بۇل باعدارلامالار قاتىسۋشىلاردىڭ ءبىلىمىن جەتىلدىرۋدە، ارى قاراي دامىتۋدا وتە قولايلى» ، -دەپ  ويىن قورتىندىلادى.

شارادا «اتامەكەن» قر ۇقپ بيزنەس-كوممۋنيكاتسيانى مەملەكەتتىك تىلدە دامىتۋ دەپارتامەنتىنىڭ ساراپشى-لينگۆيسى، فيلولوگيا عىلىمدارىنىڭ كانديداتى بەكزات ديناەۆا ، كوكششەتاۋ قالاسى تىلدەردى وقىتۋ ورتالىعىنىڭ وقىتۋشىسى گۇلنار كاجكەنوۆا سىني ويلاۋ تەحنولوگياسى ارقىلى جازىلىم داعدىلارىن مەڭگەرتۋ جولدارى مەن قازاق ءتىلىن وقىتۋدا ەلەكتروندىق، اقپاراتتىق-كوممۋنيكاتيۆتىك تەحنولوگيالاردى پايدالانۋدىڭ تيىمدىلىگىن كورسەتەتىن تاجىريبەلەرىمەن ءبولىستى.

سەمينار بارىسىندا ۇسىنىلعان ءادىس-تاسىلدەرگە قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ دوتسەنتى، فيلولوگيا عىلىمدارىنىڭ كانديداتى گۇلشات قامزاەۆا عىلىمي-ادىستەمەلىك ساراپتاما جاساپ، باعاسىن بەردى.

شارا سوڭىندا سەمينار قاتىسۋشىلارىنا قر مادەنيەت جانە سپورت مينيسترلىگى ءتىل ساياساتى كوميتەتىنىڭ سەرتيفيكاتتارى تابىستالدى.

Abai.kz