«نۇر وتان» پارتياسى سايلاۋالدى باعدارلاماسىنىڭ «ءبىلىم بەرۋ» باعىتى بويىنشا پارتيالىق كوميسسيانىڭ وتىرىسى ءوتتى، - دەپ حابارلايدى اباي-اقپارات.

قازىرگى تاڭدا ەرەكشە قاجەتتىلىكتەرى بار بالالارعا ءبىلىم الۋ ءۇشىن ءتيىستى جاعداي جاساۋ مەملەكەتتەگى ءبىلىم بەرۋ جۇيەسىن دامىتۋدىڭ باستى مىندەتتەرىنىڭ ءبىرى بولىپ سانالادى. ءبىلىم بەرۋ مەكەمەلەرى مۇمكىندىكتەرى شەكتەۋلى بالالاردىڭ قاجەتتىلىكتەرىنە بەيىم بولۋ قاجەت. بۇگىندە مەكتەپتەردىڭ 58% - دا جانە بالاباقشالاردىڭ 19% -دا ينكليۋزيۆتى ءبىلىم بەرۋ ءۇشىن جاعداي جاسالعان. ءبىلىم جانە عىلىم مينيسترلىگىنىڭ سوڭعى مالىمەتتەرى بويىنشا،  قازاقستان رەسپۋبليكاسىندا 147 396 ەرەكشە ءبىلىم الۋعا قاجەتتىلىكتەرى بار بالالار انىقتالدى، ونىڭ ىشىندە 97 617 بالا  مەكتەپ جاسىندا جانە 49779 بالا  مەكتەپكە دەيىنگى جاستا.

«نۇر وتان» پارتياسىنىڭ «قازاقستان 2021. بىرلىك. تۇراقتىلىق. جاسامپازدىق» سايلاۋالدى باعدارلاماسىنىڭ ءبىلىم باعىتى بويىنشا كوميسسياسىنىڭ كەزەكتى وتىرىسىنا توراعالىق ەتىپ وتىرعان قر پارلامەنت ءماجىلىسىنىڭ دەپۋتاتى ءا. بەكتۇرعانوۆ:

- بۇگىن ءبىلىم باعىتى بويىنشا كوميسسيا مۇشەلەرى جينالىپ وتىرمىز. قازىر ەلباسىمىز ايتىپ وتكەندەي، ءار پارتيا مۇشەسىنىڭ جاۋاپتىلىعىن ارتتىرۋىمىز كەرەك. كۇن تارتىبىندەگى باستى ماسەلە قازاقستان رەسپۋبليكاسىنداعى ينكليۋزيۆتى ءبىلىم بەرۋ باعىتىن دامىتۋ. ەلباسىمىز 2014 جىلى «قازاقستان- 2050»  باعدارلاماسىندا «مۇمكىندىگى شەكتەۋلى جاندارعا قولداۋ كورسەتۋ مەمەلەكەتتىڭ قوعام الدىنداعى باستى مىندەتى» دەپ اتاپ ايتقان بولاتىن. ءبىز بۇگىنگى وتىرىسىمىزدىڭ نەگىزىندە پارتيانىڭ سايلاۋالدى باعدارلاماسىنىڭ ءبىلىم باعىتى بويىنشا كوميسسيا ۇسىنىستارىن جۇزەگە اسىرۋ تۋرالى ماسەلەلەردى قاراستىرامىز, - دەدى.

- ەلباسىمىز ءوز جولداۋىندا قازاقستان كەدەرگىسىز ايماققا اينالۋى كەرەك دەپ ايتتى. وعان قوسا ەلباسىمىزدىڭ «ەگەر ءبىر ادام ءجابىر كورەتىن بولسا، وندا بۇكىل قازاقستاندىق جاپا شەگۋى كەرەك» دەگەن ءتامسىلى دە بار. سوندىقتان، ءبىزدىڭ ەلىمىزدە ەشكىم ءجابىر كورمەۋى كەرەك، جاپا دا شەكپەۋى كەرەك دەپ ويلايمىن. جاقىندارىمىز، بالا-شاعامىز بار دەگەندەي ايتىلىپ وتىرعان كوپتەگەن ماسەلەلەر بارىمىزگە جاقسى تانىس. شىندىعىندا بۇل بالالار كوللەدجگە، ۋنيۆەرسيتەتكە بارعاسى كەلەدى. مەن 15 جىل كوللەدج باسقارعان اداممىن. بىراق، بۇل ەرەكشەلىكتەگى بالالارعا ارنالعان ءبىر دە ءبىر وقۋ قۇرالى جوق، ونى مويىنداۋىمىز كەرەك. مەنىڭ ۇسىنىسىم، ءبىر ۇر توقپاقتى ءبىلىم جانە عىلىم مينيسترلىگىنە سىلتەي بەرمەي، بارلىعىن جۇيەلى، جان-جاقتى قاراستىرۋ كەرەك.  دەپۋتاتتار، جەرگىلىكتى اتقارۋشى بيلىك بارلىعى بىردەي جۇمىلۋ كەرەك, - دەدى پارلامەنت ءماجىلىسىنىڭ دەپۋتاتى ب. حامەنوۆا.

ايتىپ وتكەندەي، قازىرگى تاڭدا ەرەكشە قاجەتتىلىكتەرى بار بالالارعا ءبىلىم الۋ ءۇشىن ءتيىستى جاعداي جاساۋ مەملەكەتتەگى ءبىلىم بەرۋ جۇيەسىن دامىتۋدىڭ باستى مىندەتتەرىنىڭ ءبىرى بولىپ سانالادى. ءبىلىم بەرۋ مەكەمەلەرى مۇمكىندىكتەرى شەكتەۋلى باللاردىڭ قاجەتتىلىكتەرىنە بەيىم بولۋى قاجەت.

ەكىنشى بولىپ ءسوز العان قر ءبىلىم جانە عىلىم ۆيتسە-ءمينيسترى ءا.سۋحانبەرديەۆا:

- كەز-كەلگەن مەملەكەتتىڭ باستى قۇندىلىعى ءبىلىمدى ادام. ءاربىر ۇلتتىڭ الدىندا تۇرعان ۇلى مۇرات – سالاۋاتتى، سانالى ۇرپاق تاربيەلەۋ. وسى ماقساتتا مەملەكەت تاراپىنان جان-جاقتى جۇمىس جاسالۋدا, - دەي كەلە ينكليۋزيۆتى ءبىلىم بەرۋ سالاسىنا قاتىستى شەشىمىن تاپقان ماسەلەلەر مەن اتقارىلىپ جاتقان جۇمىستارعا ەگجەي-تەگجەيلى توقتالىپ ءوتتى.

بۇگىنگى كۇنى مەكتەپتەردىڭ 58%-ندا جانە بالاباقشالاردىڭ 19% -ندا ينكليۋزيۆتى ءبىلىم بەرۋ ءۇشىن جاعداي جاسالعان ەكەن.  2016-2019 جىلدارعا ارنالعان قازاقستان رەسپۋبليكاسىنىڭ ءبىلىم جانە عىلىمدى دامىتۋدىڭ مەملەكەتتىك باعدارلاماسىنا سايكەس، مەكتەپتەردىڭ 70% -ىندا جانە مەكتەپكە دەيىنگى ۇيىمداردىڭ 30%-ندا ينكليۋزيۆتى ءبىلىم بەرۋ ءۇشىن جاعداي جاساۋ كوزدەلىپ وتىر.

اتالعان ءىس-شارادا قىزىلوردا وبلىسى اكىمىنىڭ ورىنباسارى ر.رۇستەموۆ، پارلامەنت ءماجىلىسىنىڭ دەپۋتاتى ج.نۇرمانبەتوۆا،  سونىمەن قاتار اۋتيزمگە شالدىققان بالالار مەن جاسوسپىرىمدەرگە كومەك كورسەتۋ قورىنىڭ پرەزيدەنتى ا.ارحاروۆا ينكليۋزيۆتى ءبىلىم بەرۋدەگى تۇتاستىلىق تاقىرىبىندا باياندامالارىن جاسادى.  ال، «بولاشاق» كورپوراتيۆتى فوندىنىڭ جەتەكشىسى د.ءشايجۇنىسوۆا «وزىڭنەن باستا» جانە «كاجدىي رەبەنوك دوستوين شكولى» اتتى جوبالارى جايىندا ءوز ويىن ايتسا، «جىگەر» مۇمكىندىگى شەكتەۋلى جاستار ۇيىمىنىڭ پرەزيدەنتى پ. يۋسۋپدجانوۆ مۇمكىندىگى شەكتەۋلى بالالاردىڭ مەكتەپتەن كەيىن جوعارى وقۋ ورىندارىنا ءتۇسۋى قولجەتىمدى مە دەگەن كوكەيتەستى سۇراقتى كوتەردى.

ارتىنشا بولعان قىزۋ تالقىلاۋعا ۆيدەوبايلانىس ارقىلى ەلىمىزدىڭ بارلىق ايماقتاعى پارتيا فيليالدارىنىڭ باسشىلارى، مەكتەپ ديرەكتورلارى، اكىمشىلىك وكىلدەرى تەگىس قاتىستى. ءبىلىم جانە عىلىم مينيسترلىگىنىڭ وكىلىنە سىني تۇرعىداعى بىرنەشە سۇراقتار قويىلدى.

وتىرىس قورىتىندىسىندا كوميسسيا مۇشەلەرى ۋاكىلەتتى مەملەكەتتىك ورگاندارعا ۇسىنىستار ازىرلەپ جىبەرەتىن بولىپ تارقاستى.

Abai.kz