«باعدارىمىز - ايقىن، بولاشاعىمىز - جارقىن» - رەسپۋبليكالىق باسىلىمدارعا شولۋ
استانا. 9 ءساۋىر. قازاقپارات - قازاق اقپارات اگەنتتىگى رەسپۋبليكالىق باسىلىمداردا 9 ءساۋىر، سەنبى كۇنى شىققان وزەكتى ماتەريالدارعا شولۋدى ۇسىنادى.
***
كەشە ەلورداداعى تاۋەلسىزدىك سارايىندا ەلباسى ن.نازارباەۆتىڭ قر پرەزيدەنتى قىزمەتىنە كىرىسۋ سالتاناتى ءوتىپ، وندا ۇلت كوشباسشىسى ءسوز سويلەدى. «ەگەمەن قازاقستان» گازەتىنىڭ سەنبىلىك سانىندا مەملەكەت باسشىسىنىڭ سويلەگەن ءسوزى «باعدارىمىز - ايقىن، بولاشاعىمىز - جارقىن» دەگەن تاقىرىپپەن بەرىلدى. «مەن ءۇشىن تاۋەلسىزدىكتىڭ 20 جىلدىعىندا مەملەكەت باسشىلىعىنا بۇكىل حالىقتىڭ اتىنان سايلانىپ، عاجايىپ كوپۇلتتى وتانىمنىڭ كوشباسشىسى ميسسياسىن جالعاستىرۋ ۇلكەن ابىروي. مەن بارلىق قازاقستاندىقتارعا وتكەن سايلاۋدا شىنايى قولداۋ كورسەتكەندەرى ءۇشىن اق جۇرەكتەن شىققان ريزاشىلىعىمدى بىلدىرەمىن»، - دەيدى ن.نازارباەۆ.
استانا. 9 ءساۋىر. قازاقپارات - قازاق اقپارات اگەنتتىگى رەسپۋبليكالىق باسىلىمداردا 9 ءساۋىر، سەنبى كۇنى شىققان وزەكتى ماتەريالدارعا شولۋدى ۇسىنادى.
***
كەشە ەلورداداعى تاۋەلسىزدىك سارايىندا ەلباسى ن.نازارباەۆتىڭ قر پرەزيدەنتى قىزمەتىنە كىرىسۋ سالتاناتى ءوتىپ، وندا ۇلت كوشباسشىسى ءسوز سويلەدى. «ەگەمەن قازاقستان» گازەتىنىڭ سەنبىلىك سانىندا مەملەكەت باسشىسىنىڭ سويلەگەن ءسوزى «باعدارىمىز - ايقىن، بولاشاعىمىز - جارقىن» دەگەن تاقىرىپپەن بەرىلدى. «مەن ءۇشىن تاۋەلسىزدىكتىڭ 20 جىلدىعىندا مەملەكەت باسشىلىعىنا بۇكىل حالىقتىڭ اتىنان سايلانىپ، عاجايىپ كوپۇلتتى وتانىمنىڭ كوشباسشىسى ميسسياسىن جالعاستىرۋ ۇلكەن ابىروي. مەن بارلىق قازاقستاندىقتارعا وتكەن سايلاۋدا شىنايى قولداۋ كورسەتكەندەرى ءۇشىن اق جۇرەكتەن شىققان ريزاشىلىعىمدى بىلدىرەمىن»، - دەيدى ن.نازارباەۆ.
«كەشە مەملەكەت باسشىسى نۇرسۇلتان نازارباەۆ قازاقستان رەسپۋبليكاسى پارلامەنتى ءماجىلىسىنىڭ جالپى وتىرىسىندا ءسوز سويلەپ، پارلامەنت ءماجىلىسىنىڭ قاراۋىنا قازاقستان رەسپۋبليكاسى پرەمەر-ءمينيسترىنىڭ لاۋازىمىنا كانديداتۋرانى ۇسىندى»، - دەپ جازادى «ەگەمەن قازاقستان» گازەتى بۇگىنگى سانىنداعى «ەكىنشى مارتە سەنىم كورسەتىلدى» دەگەن تاقىرىپتاعى ماقالاسىندا. «ەلىمىز كونستيتۋتسياسىنىڭ 56-بابىنا ءسايكەس، ماجىلىستەن قازاقستان رەسپۋبليكاسى پرەمەر-ءمينيسترى لاۋازىمىنا كارىم قاجىمقانۇلى ءماسىموۆتىڭ كانديداتۋراسىن تاعايىنداۋعا كەلىسىم بەرۋدى سۇرايمىن»، - دەدى پرەزيدەنت. تالقىلاۋدان سوڭ پارلامەنت ءماجىلىسى دەپۋتاتتارىنىڭ داۋىس بەرۋ ءراسىمى ءوتتى. قاتىسىپ وتىرعان 104 دەپۋتاتتىڭ 104-ءى قازاقستاننىڭ پرەمەر-ءمينيسترى لاۋازىمىنا ك.ق. ءماسىموۆتى تاعايىنداۋعا كەلىسۋدى قولداپ داۋىس بەردى.
***
«الاش ايناسى» گازەتىنىڭ جازۋىنشا، ەلىمىزدە كولىك ۇرلىعى كوپتى الاڭداتىپ وتىر. اسىرەسە كولىك ۇرلاۋ وقيعالارى الماتى قالاسى مەن وبلىسىندا، شىعىس قازاقستان مەن قاراعاندى وڭىرىندە ءورشىپ تۇر. «دەرەك كوزدەرىنىڭ مالىمەتتەرىنە سۇيەنسەك، 2009 جىلى ەلىمىزدە 14 مىڭ كولىك قولدى بولعان ەكەن. ال وتكەن جىلدىڭ نەبارى التى ايىندا الماتى قالاسىندا 200-گە جۋىق كولىك ۇرلانعان. ونىڭ ۇستىنە، قولدى بولعان كولىكتەردىڭ 20 پايىزى تابىلمايتىن كورىنەدى»، - دەپ جازادى باسىلىم. ماقالادا كوتەرىلگەن ماسەلە جايىندا تەرەڭىرەك بىلگىڭىز كەلسە، «كولىك ۇرلىعى قىزىپ تۇر» دەگەن ماقالاعا نازار سالىڭىز.
«الاش ايناسى» گازەتىنىڭ تۇراقتى «دات!» ايدارىندا رەسەيدەگى قازاق مادەني ورتالىقتارى فەدەراتسياسىنىڭ توراعاسى توقتارباي دۇيسەنباەۆپەن اراداعى سۇحبات «رەسەي قازاقتارىنىڭ 90 پايىزى ابايدى بىلمەيدى» دەگەن تاقىرىپپەن بەرىلگەن. سۇحبات بارىسىندا جىل سايىن رەسەيدەن قازاق ءتىلىن ۇيرەنىپ، ۇلتتىق سالت-داستۇرمەن تانىسۋ ءۇشىن ون شاقتى بالانى ۋاقىتشا قازاقستانعا جىبەرەتىندىكتەرىن، الايدا بۇل ساننىڭ ماردىمسىز ەكەندىگىن اتاپ وتكەن ول: «ءار جازدا تۋعان وتانىنا 100-200 بالادان جىبەرىپ تۇراتىن بولساق، بالالارىمىز تەز قازاقىلاناتىن ەدى. ەگەر سول ءجۇز بالانىڭ ىشىندە، ەڭ بولماعاندا، جارتىسى ابايدى، ماعجاندى تانىپ قايتسا، ءبىز ءۇشىن ۇلكەن جەتىستىك بولار ەدى»، - دەيدى.
***
كارىم ءماسىموۆ قازاقستان ۇكىمەتىن ەڭ ۇزاق باسقارعان پرەمەر-مينيستر رەتىندە عانا ەمەس، ەندى ەكى مارتە وسى ورىنعا تاعايىندالعان باسشى رەتىندە دە ەستە قالماق. «داعدارىسقا قارسى» ۇكىمەتتىك كوماندانى باسقارىپ، پرەمەرلىك قىزمەتتە تاپجىلماي ءتورت جىل تابان تىرەگەن ءماسىموۆتىڭ ۇكىمەت باسىندا ۇزاق قالۋىنىڭ سىرى نەدە؟» دەگەن سۇراق جۇرتتى ويعا قالدىرارى انىق. وسىعان وراي «ايقىن» گازەتى حالىقارالىق تاۋەكەلدى باعالاۋ توبىنىڭ ديرەكتورى دوسىم ساتپاەۆ پەن قازاقستان پرەزيدەنتىنىڭ ساياسي ماسەلەلەر جونىندەگى كەڭەسشىسى ەرمۇحامەت ەرتىسباەۆتىڭ پىكىرىن بىلگەن. نازار سالىڭىز، ەكى ساياساتكەردەن الىنعان شاعىن سۇحبات «ءماسىموۆتىڭ قايتا تاعايىندالۋىنىڭ ءمانى نەدە؟» دەگەن تاقىرىپپەن جاريالاندى.
«بىرىككەن اراب امىرلىگىنىڭ ءابۋ-دابي قالاسىندا دزيۋدودان ازيا چەمپيوناتى ءوز مارەسىنە جەتتى. سارى قۇرلىقتىڭ بەلدى بالۋاندارىنىڭ باسىن قوسقان جارىس تارتىستى ءوتتى. ءار مەملەكەتتەن ات تەرلەتىپ كەلگەن مايتالمان ماماندار مەن قاتارداعى قاراپايىم كورەرمەندەرگە دەيىن چەمپيوناتتىڭ ۇيىمداستىرىلۋ دەڭگەيىنە جوعارى باعا بەردى. ال بەلدەسۋگە بەل بۋعاندار اراسىنان ءبىز وليمپيادا ويىندارى مەن الەم چەمپيوناتتارى جانە قۇرلىقتىق دودالاردا ولجا سالعان ساقا سپورتشىلاردى كوپتەپ كەزدەستىردىك»، - دەپ جازادى «ايقىن» گازەتى. ماقالا «ازيا چەمپيوناتى اياقتالدى» دەگەن تاقىرىپپەن بەرىلگەن.
***
قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت، ۇكىمەت باسشىلارىنان، حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىستى قۇتتىقتاۋلار كەلىپ تۇسۋدە. سولاردىڭ ءبىرپاراسى «كازاحستانسكايا پراۆدا» گازەتىندە جاريالاندى. ماسەلەن، مەملەكەت باسشىسى نۇرسۇلتان نازارباەۆتى سايلاۋداعى سەنىمدى جەڭىسىمەن رەسەي فەدەراتسياسى ۇكىمەتىنىڭ توراعاسى ۆلاديمير پۋتين قۇتتىقتادى. قۇتتىقتاۋدا: «قۇرمەتتى نۇرسۇلتان ءابىشۇلى، داۋىس بەرۋ ناتيجەسى ءسىزدىڭ قازاقستان حالقى الدىنداعى جوعارى بەدەلىڭىزدى تولىقتاي دالەلدەدى. مەملەكەتتىڭ قۇرىلۋىندا تاماشا جەڭىستەر، سەزىلىپ وتىرعان ەكونوميكالىق ىلگەرىلەۋشىلىك جانە قازاقستان رەسپۋبليكاسىنىڭ تاۋەلسىز دامۋ جىلدارىندا قول جەتكىزىلگەن ازاماتتاردىڭ ءومىر ءسۇرۋ جاعدايىنىڭ جاقسارۋى ءسىزدىڭ اتىڭىزبەن تىكەلەي بايلانىستى» دەلىنگەن.
