قازاقستان ىشكى ىستەر مينيسترلىگىنىڭ رەسمي وكىلى الماس سادۋباەۆ قازاقستاندا پوليتسەيلەر سانى سونشالىقتى كوپ ەمەسىن مالىمدەدى. ازاتتىق ءتىلشىسىنىڭ حابارلاۋىنشا، سادۋباەۆ بۇل جايىندا استانادا ۇكىمەت جيىنىنان سوڭ جۋرناليستەردىڭ پوليتسيا قىزمەتىنە قاتىستى قويعان ساۋالدارىنا جاۋابىندا ايتتى.
جۋرناليستەر سادۋباەۆتان "پوليتسەيلەر فورماسىن وزگەرتۋگە نە سەبەپ بولدى؟" دەپ سۇرادى. مينيسترلىك وكىلى "ۇكىمەت قاۋلىسىنان كەيىن قالالىق ىشكى ىستەر دەپارتامەنتتەرىن پوليتسيا دەپارتامەنتى دەپ وزگەرتتىك. قازىر بۇكىل الەمدە، ءتىپتى كورشى ەلدەردە پوليتسەيلەر فورماسىن وزگەرتىپ جاتىر. پوليتسيا فورماسىن اۋىستىراتىن ۋاقىت جەتتى. فورما ەڭ باستىسى ىڭعايلى بولۋى كەرەك. قازىرگى فورماعا 15 جىل بولدى. قازىر جاڭا فورمانىڭ ءتۇرلى نۇسقالارىن قاراستىرىپ جاتىرمىز" دەپ جاۋاپ بەردى.
حالىق سانى 3 ميلليون گرۋزيادا 20 مىڭ پوليتسەي قىزمەت ەتەتىنىن ايتقان سادۋباەۆ 18 ميلليون حالقى بار قازاقستانعا 50 مىڭنان استام پوليتسەي ايتارلىقتاي كوپ ەمەس دەگەن پىكىر ءبىلدىردى. ول ازىرگە فورمانى اۋىستىرۋعا قانشا قارجى جۇمسالاتىنىن قازىر ايتا المايتىنىن جەتكىزدى.
سادۋباەۆ "رەفورمادان سوڭ پوليتسەي قىزمەتىنىڭ ءمانى وزگەرە مە؟" دەگەن سۇراققا ء"بىز قازىر 300-دەن استام اۋداندىق پوليتسيا بولىمىندە حالىقپەن كەرى بايلانىس ورناتۋ كەڭسەلەرىن اشىپ جاتىرمىز. بىزگە كەلەتىن تۇرعىنداردىڭ 70 پايىزى قۇجات جاساتۋعا قاتىستى كەڭەس سۇرايدى، 30 پايىزى عانا ارىزدانادى. مۇنىڭ بارلىعى حالىقپەن بايلانىس ورناتۋ ءۇشىن جاسالىپ وتىر. بارلىق وزگەرىستى جاڭا جىلدان كەيىن كورەسىزدەر" دەدى.
قازان ايىنىڭ ورتاسىندا ۇكىمەت قاۋلىسىمەن استانا، الماتى قالالارى مەن بىرنەشە وبلىستىڭ ىشكى ىستەر دەپارتامەنتتەرى پوليتسيا دەپارتامەنتى دەپ وزگەرتىلگەن.
Abai.kz
