مەملەكەت باسشىسى وسىدان 10 جىل بۇرىن الماتىدا جاڭا الاتاۋ اۋدانىن قۇرۋ تۋرالى جارلىققا قول قويعان ەدى.

بۇگىنگى كۇنى اۋدان مەگاپوليستىڭ جەدەل وركەن جايعان ەلدى وڭىرىنە اينالدى، ون جىل ىشىندە اۋدان تۇرعىندارىنىڭ سانى 70%-عا ءوسىپ، 250 مىڭنان استام ادامعا جەتتى. ورتالىقتاندىرۋ قاعيداسى بويىنشا مۇندا 12 مەكتەپ، وسىنشاما مەديتسينالىق مەكەمەلەر، سونىمەن قاتار 98 مەملەكەتتىك جانە جەكە بالا باقشالار اشىلدى.

الماتى اكىمى ءوزىنىڭ سوزىندە 10 جىل ىشىندە اۋداندى دامىتۋعا 430 ملرد. تەڭگە جۇمسالعانىن، 30 مىڭنان استام جۇمىس ورنى قۇرىلعانىن، 2,7 ملن.كۆ.م. تۇرعىن ءۇي سالىنعانىن ايتتى.

«ەلباسى وسى 10 جىلدا الاتاۋ اۋدانىنا 10 رەت كەلدى. مەملەكەت باسشىسى اۋداننىڭ دامۋ بارىسىمەن تۇراقتى تانىسىپ، ۇدايى قولداۋ ءبىلدىرۋىنىڭ ارقاسىندا بۇگىندە الاتاۋ اۋدانى قالا تۇرعىندارى مەن قوناقتارى ءۇشىن جاڭا ورتالىققا اينالدى. بۇگىنگى كۇنى قالامىزدىڭ ءاربىر 7-ءشى تۇرعىنى الاتاۋ اۋدانىندا تۇرادى، سوندىقتان جايلى قالا كەڭىستىگىن قۇرۋ ماقساتىندا بيىلعى جىلى 600 ورىندى تاعى ءبىر مەكتەپ جانە 880 ورىندى ءتورت جاڭا بالا باقشا ىسكە قوسىلادى. بۇلاردان وزگە، تاعى ءبىر جاڭا اۋرۋحانا مەن ەكى ەمحانا سالىنادى»، - دەپ اتاپ ءوتتى باۋىرجان بايبەك.

ول ءوزىنىڭ سوزىندە بولاشاقتا الاتاۋ اۋدانى الماتىنىڭ قۋاتتى ءوندىرىس ورتالىعىنا اينالاتىنىن ايتتى. ەل پرەزيدەنتىنىڭ يندۋستريالاندىرۋ باعدارلاماسىن ۇسىنعان باستاماسى اياسىندا مۇندا ارنايى يندۋستريالدى ايماق قۇرىلدى. قىركۇيەك ايىندا عانا اۋداندا جاپوندىق، رەسەيلىك، قىتايلىق جانە يتالياندىق ينۆەستيتسيالار ەسەبىنەن بىرنەشە جوعارى تەحنولوگيالى زاۋىتتار اشىلدى.

الاتاۋ اۋدانىندا بىرقاتار مادەني جانە سپورت وبەكتىلەرى بوي تۇزەدى، ونىڭ ىشىندە «الاتاۋ» ءداستۇرلى ونەر تەاترى، ءداستۇرلى مۋزىكانىڭ مۋلتيمەديالىق ورتالىعى، قولونەرشىلەر ورتالىعى، ۋنيۆەرسيادا مۇراسى - «الماتى ارەنا» جانە «رۋحاني جاڭعىرۋ» باعدارلاماسى اياسىندا جەكە قارجى ەسەبىنەن سالىنعان جەڭىل اتلەت ستاديونى بار.