ازاتتىق ءتىلشىسىنىڭ حابارلاۋىنشا، جيىندى اشقان ءماجىلىس ۆيتسە-سپيكەرى ۆلاديمير بوجكو ءسوزىن كومسومولدىڭ مەرەيتويىمەن قۇتتىقتاۋدان باستادى.

- بۇگىن قازاقستاننىڭ تاۋەلسىزدىك الىپ، قالىپتاسىپ، دامىپ جاتقانىنا 27 جىل تولعان كەزەڭىن جانە بۇعان بۇرىنعى كومسومولدىق مەكتەپتەن ءوتىپ، سونىڭ قاتارىندا وسكەن كومسومولداردىڭ قوسقان ۇلەسىن ەسكە العان دۇرىس بولاتىن شىعار. ولاردىڭ كومسومولدىق مەكتەپتە ۇيىمداستىرۋ، شارۋاشىلىق جۇرگىزۋ جانە ساياسي جۇمىستاردى اتقارۋدا جيناعان تاجىريبەسى ەگەمەندى قازاقستاندى قۇرۋدا ىسكە استى. زالداعىلاردىڭ بارلىعى دەرلىك وسى مەكتەپتەن وتكەنىن جانە ءبىزدىڭ جاستىق شاعىمىزداعى جاقسى ىستەردى ايتقىم كەلىپ وتىر، - دەدى بوجكو.

بۇدان سوڭ ونى ارىپتەسى سەرگەي زۆولسكي قولدادى.

- بۇگىن بارلىعىڭىزدى مەرەكەلەرىڭىزبەن، كومسومولدىڭ 100 جىلدىعىمەن قۇتتىقتاعىم كەلىپ وتىر. بۇل وتە جاقسى، بارلىعىمىز (كومسومول - رەد.) بولدىق، - دەدى زۆولسكي.

ارادا ءبىر ساعاتتاي ۋاقىت وتكەندە دەپۋتات ازات پەرۋاشەۆ ءسوز بەرۋدى سۇراپ، بۇعان قارسى پىكىر ايتتى.

- قۇرمەتتى ۆلاديمير كارپوۆيچ، ارىپتەستەر! بىزدە ءماجىلىستىڭ رەسمي جيىنى ءوتىپ جاتىر، سىزدەر كومسومول كۇنىمەن قۇتتىقتاپ جاتىرسىزدار. مۇنداي مەرەكە جوق. ارىپتەستەر، مەن ءبىزدىڭ قانداي ەلدە تۇراتىنىمىزدى ەسكە سالعىم كەلىپ تۇر. ءبىز تاۋەلسىز قازاقستاندا تۇرامىز. ءبىزدىڭ كۇنتىزبەدە ونداي مەرەكە جوق. ەگەر كىم دە كىم ءۇشىن بۇل جەكە مەرەكە بولسا، وندا ءبىر-بىرلەرىڭىزدى ءماجىلىستىڭ رەسمي وتىرىسىندا ەمەس، جەكە قۇتتىقتاۋلارىڭىزدى سۇرايمىن، - دەدى پەرۋاشەۆ.

كومسومولعا قاتىستى داۋدى دەپۋتات احمەت مۋرادوۆ جالعاپ، ازات پەرۋاشەۆكە جاۋاپ قايىردى.

- مەن ارىپتەسىم ازات تۇرلىبەكۇلىنا قانداي ەلدە تۇراتىنىمىزدى ەسكە سالعانى ءۇشىن العىس ايتقىم كەلىپ تۇر. نەگىزى ءبىز 25 قازان كۇنىن جىبەرىپ الدىق. قازاقستاننىڭ مەملەكەتتىك ەگەمەندىگى تۋرالى دەكلاراتسيا قابىلدانعان بۇل كۇندى ءبىز رەسپۋبليكا كۇنى دەپ ۇزاق ۋاقىت تويلادىق. ازات تۇرلىبەكۇلى، ءسىزدى قۇتتىقتايمىن! بۇگىن پارتيا ۇستانىمى تۇرعىسىنان سەنىمدى تۇردە ايتىپ جاتقانىمىز مەنىڭشە، ءسىزدىڭ وتكەن شاعىڭىز. كومسومولدا شىنىققاندىقتان ءوزىڭىزدى وسىلاي ۇستاپ وتىرسىز. امان بولىڭىز، - دەدى مۋرادوۆ.

سوڭعى كۇندەرى قازاقستاننىڭ بىرنەشە ايماعىندا بۇرىن كومسومول قاتارىندا بولعاندار قازاقستانداعى كومسومول ۇيىمىنىڭ قۇرىلعانىنا 100 جىل تولعانىن سالتاناتتى تۇردە اتاپ ءوتىپ جاتىر. مەرەكەلىك شارالار الماتى،سەمەي، اتىراۋ جانە كوكشەتاۋدا ءوتتى. 29 قازان كۇنى كەشكە استانادا دا مەرەكەلىك شارا وتەدى دەپ جوسپارلانعان.

Abai.kz