ويىڭدى سەلت ەتكىزەتىن ولەڭدەردى وقۋ ءبىر عانيبەت. قولعا تيگەن ءساندى اقىلايدىڭ «ولەڭ - عۇمىر» كىتابىن وقىپ شىعىپ، تۇشىمدى دۇنيەلەردىڭ جەتكىلىكتى ەكەنىنە كوزىم جەتتى. بۇدان بۇرىن الەۋمەتتىك جەلىدەن ءساندىنىڭ كونۆەيەردەن شىققانداي ءۇزىلىسسىز اعىلىپ جاتقان ولەڭدەرىن وقىپ، تاڭدانىپ ءجۇردىم. ولەڭ تۇرتكىلەسە شىداپ وتىرۋ مۇمكىن بە؟ ءساندىنى اقىن دەپ ەستىگەن جوق ەدىم.

بىردە ۇيدە جاتقان 2004 جىلعى «جۇلدىز» جۋرنالىن ەسكى ادەت بويىنشا قايتا قاراپ وتىرعانىمدا №9 سانىندا ءساندىنىڭ «تىرنالاردىڭ تىزبەگى تىراۋلاعان» دەگەن ولەڭدەرىن كەزدەستىرىپ، وقىپ شىقتىم. «ءسىرا، شەرلى شىعارمىن جاراتىلا، سەزىم بيلەپ، وي كەشتىم ارا-تۇرا. ايىرباستاپ اكەل دەپ شەر-مۇڭىمدى، تاپسىرعانمىن قۇستاردىڭ قاناتىنا». ولەڭدە سالماق جاتىر. بۇدان 13-14 جىل بۇرىن جازىلعان ولەڭدەر ەكەن.  وسىدان كەيىن ولەڭدەرىن ۇزبەي وقىپ كەلە جاتىرمىن دەسەم ارتىق ايتقاندىق ەمەس.

اقىندىق شابىتى ءبۇر جارىپ كەلە جاتقان، ارمان قۋعان تالاي ازاماتتاردىڭ اۋىلدان شىققان جالعىز سۇرلەۋمەن ۇلى كوش ىزىنە ءتۇسىپ، ۇلى ومىرگە ارالاسىپ، تىرشىلىكتىڭ قىم-قۋىت تۇرپاتىمەن بەتپە-بەت كەزدەسىپ، بىردە جەڭىپ، بىردە جەڭىلىپ كۇرەس ۇستىندە جۇرگەنىن ءوزىڭ بىرگە سەزىنەسىڭ. كۇيىنەسىڭ. قۋاناسىڭ. بىراق، اقىندىقتىڭ ازابىن اقىننان ارتىق كىم بىلەدى؟ ءساندى اقىن اقىندىقتىڭ ازابىن بىلە تۇرا، ءتاڭىر جازعان تاعدىرىنا مويىن ۇسىنادى. «تاعدىر ماعان ولەڭ بولىپ دارىدىڭ»، «ولەڭ بە ولەڭ تامىرىمدا ءبىر دۇلەي» دەي كەلىپ، «ايتشى ماعان جۇرەگىڭنىڭ مۇڭىن ءبىر، سەنسىز ەندى كورە الماسپىن كۇنىمدى، قالادا دا، دالادا دا، ۇيدە دە، مازامدى الىپ  كىسىنەيدى قۇلىن جىر». مىنە وسىدان-اق ءساندىنى ناعىز اقىن ەكەندىگىن تانيسىڭ.

ونى ولەڭنەن ايىرۋ مۇمكىن ەمەس. ولەڭنىڭ قاسيەتى وسى! سوندىقوتان ولەڭ كيەلى. سوندىقتان ولەڭ-قۇدىرەت! قۇدىرەتتى ولەڭنىڭ سيقىرلى الەمىنە ەنگەن ادام سول ولەڭنىڭ مىنەزىنەن ءبولىنىپ كەتە المايدى عوي دەيمىن. نە ءوزى ولەڭگە اينالىپ كەتەدى، نە ولەڭنىڭ ايتقانىنان شىعا المايتىن سياقتى.  «مەن ولەڭنىڭ كۇش الامىن وزىنەن، ءار كۇن سايىن سىرعا باتىپ كەزىگەم، ولەڭمەنەن ويانامىن تاڭ اتا، ءوز ءۇي ولەڭ توسەگىمدە كوز ىلەم». ءساندىنىڭ ءار ولەڭدەرىن وقىعان سايىن، مۇقاعاليدىڭ ولەڭگە جاپقان شەكپەنىن جامىلىپ، جاستانىپ جۇبانا وتىرىپ، قۋات العانىن سەزەسىڭ. سودان دا بولار «16 ساعان وكپەم جوق» دەيتىن ولەڭىندە «كوز جاسىن بەكەر توككەم جوق، قارا ولەڭ كەلىپ جىلىتتى، ۇلى اقىن جاپقان شەكپەن بوپ». ءساندى-ولەڭ! «تاڭدارىمنىڭ تاڭ نۇرى، باقىتىمنىڭ بارلىعى، ءبىر اللانىڭ جارلىعى، سەن ولەڭ!» ءساندىنىڭ بار جان-دۇنيەسى ولەڭمەن ورىلگەن. جۇرەك سوعىسى، قان اينالىسى – ولەڭ ۇيقاسىنداي. تۇتاس دۇنيە. بولە جارا المايسىڭ! ءساندى وسىنداي اقىن!

ءساندىنىڭ «ولەڭ - عۇمىر» كىتابىنا العىسوز جازعاندار قازاقستان جازۋشىلار وداعىنىڭ مۇشەلەرى مۇرات بەكەي مەن ءۇمىت بيتەنوۆادان ارتىق ايتا الماسپىز. ءساندىنىڭ ءوزى دە تەكتىنىڭ ۇرپاعى، كيەلى جەردىڭ تۇلەگى، ارقاسىنا ولەڭ قونعان، دەنەسىنە سىڭگەن. ءساندىنىڭ قوعامداعى قايشىلىقتاردى ايعاقتايتىن «بار مەن جوق»، تولىپ جاتقان پوەمالارى دا وسى جيناقتا توتاستىرىلعان. ءساندىنىڭ ولەڭدەرىن تالداپ رەتسەنزيا جازايىن دەگەن جوسپارىم جوق. العان اسەرىمدى ءبىلدىرۋ. بيىكتەي بەر، اقىن ءساندى قارىنداسىم!

وشاقباي سۋحانبەرلين، قازاقستان جۋرناليستەر وداعىنىڭ مۇشەسى 

Abai.kz