بەلارۋس ەلىندە وتكەن «Junior Eurovision» حالىقارالىق كونكۋرستىڭ جەڭىمپازى بەلگىلى بولدى. جەڭىمپاز كورەرمەندەر مەن ادىلقازىلاردىڭ داۋىس بەرۋ قورىتىندىسى بويىنشا انىقتالدى.

وسىمەن 16-شى مارتە ۇيىمداستىرىلىپ وتىرعان بايقاۋعا 20 ەلدەن جاس انشىلەر قاتىستى. تاعى ءبىر ايتا كەتەرلىگى، بۇل بايقاۋدا ءبىزدىڭ ەلدىڭ ءانشىسى العاش رەت باق سىناپ وتىر. بەلارۋس استاناسىندا قازاقستان اتىنان ون ەكى جاستاعى ءانشى دانەليا تۋلەشوۆا ونەر كورسەتتى.

قاراشانىڭ 23-نەن 24-نە قاراعان ءتۇنى Junior Eurovision -2018 بايقاۋىنىڭ قاتىسۋشىلارىنا داۋىس بەرۋ باستالعان ەدى. «وزىڭە سەن» انىمەن ءۇشىنشى بولىپ ساحناعا شىققان دانەليا تۋلەشوۆا تەلەكورەرمەندەردىڭ داۋىس بەرۋ ناتيجەسى بويىنشا 103 ۇپاي جينادى. بۇل كورسەتكىش بويىنشا ول 3-ءشى ورىنعا تابان تىرەدى. ال ادىلقازىلار وتانداسىمىزعا 68 ۇپاي بەردى. داۋىس سانى مەن ادىلقازى القاسى بەرگەن ۇپاي سانى بويىنشا دانەليا 171 ۇپايمەن 6-شى ورىنعا تۇراقتادى.

حالىقارالىق ادىلقازىلار شەشىمىمەن 2018 جىلعى «بالالار ەۆروۆيدەنيە» بايقاۋىنىڭ باس جۇلدەسىن 215 ۇپاي جيناعان پولشا ەلىنىڭ ءانشىسى روكسانا ۆەنگەل جەڭىپ الدى.

ەستەرىڭىزدە بولسا، اقپارات جانە كوممۋنيكاتسيالار ءمينيسترى داۋرەن اباەۆ مينسكىدە دانەليا تۋلەشوۆامەن كەزدەسىپ، ساتتىلىك تىلەگەن بولاتىن.

Abai.kz