كەشە پرەمەر-مينيستر باقىتجان ساعىنتاەۆ جامبىل وبلىسىنا جۇمىس ساپارى كەزىندە جامبىل وبلىسىنىڭ مەديتسينا قىزمەتكەرلەرىمەن كەزدەستى. ۇكىمەت باسشىسى كەزدەسۋ بارىسىندا “دەنساۋلىق” باعدارلاماسىنىڭ ىسكە اسىرىلۋىن جانە وسى سالاداعى وزەكتى ماسەلەلەرى تالقىلادى.

اتاپ ايتقاندا، مەديتسينالىق كومەك ساپاسى مەن قولجەتىمدىلىگىن ارتتىرۋ، مەديتسينالىق قىزمەتتەر مەن ءدارى-دارمەك باعاسىن تومەندەتۋ، ءدارى-دارمەكپەن قامتاماسىز ەتۋ، سونداي-اق، جەدەل جاردەمدى ۋاقىتىلى كورسەتۋ شارالارى قارالدى.

قازاقستاندىقتاردىڭ دەنساۋلىعى — مەملەكەتتىڭ ماڭىزدى باسىمدىعى. مەملەكەت باسشىسى مەديتسينالىق كومەك ساپاسىن ارتتىرۋعا، مەديتسينا قىزمەتتەرى مەن ءدارى-دارمەك باعاسىن تومەندەتۋگە ەرەكشە كوڭىل ءبولۋدى تاپسىردى.

ۇكىمەت جۇيەلى جۇمىستار جۇرگىزىپ جاتىر. جىل سايىن دەنساۋلىق ساقتاۋدى دامىتۋعا مەملەكەتتىڭ شىعىستارى ارتىپ، مەملەكەتتىك باعدارلامالار قابىلدانۋدا. قابىلدانىپ جاتقان شارالاردىڭ ارقاسىندا اۋرۋ مەن ءولىم-ءجىتىم كورسەتكىشتەرى تومەندەپ كەلەدى. سونىمەن قاتار، پرەمەر-مينيستر كەزدەسۋ قاتىسۋشىلارىنىڭ نازارىن جۇمىسىن جانداندىرۋدى تالاپ ەتەتىن بىرقاتار ماسەلەگە اۋداردى. بۇل، ءبىرىنشى كەزەكتە، مەديتسينالىق كومەك ساپاسىنا قاتىستى ماسەلەلەر جانە وبلىستا مەديتسينالىق قىزمەتتەر مەن ءدارى-دارمەك باعاسىن بەلگىلەۋ پروتسەسىنىڭ ايقىندىعى.

قر دەنساۋلىق ساقتاۋ مينيسترلىگىنىڭ دەرەكتەرى بويىنشا، جامبىل وبلىسىنا 9 ملرد.تگ كولەمىندە ءدارى-دارمەك ساتىپ الىنعان.

وبلىستىق دەنساۋلىق ساقتاۋ باسقارماسىنىڭ باسشىسى م. جۇمانقۇلوۆ وڭىردەگى مەديتسينالىق قىزمەتتەردىڭ ساپاسىن جاقسارتۋ بويىنشا قابىلدانىپ جاتقان شارالار تۋرالى باياندادى. ماسەلەن، «دەنساۋلىق» مەملەكەتتىك باعدارلاماسىن ىسكە اسىرۋدىڭ 5 جىلى ىشىندە وبلىستا ءومىر ءسۇرۋدىڭ ورتاشا ۇزاقتىعى 71,16-دان 72,3 جاسقا دەيىن ءوستى، انالار ءولىمى كورسەتكىشى 6%-عا، ءسابي ءولىمى 21,1% -كە تومەندەدى.

العاشقى مەديتسينالىق-سانيتاريالىق كومەكتىڭ قولجەتىمدىلىگىن ارتتىرۋ ماقساتىندا بيىل مەملەكەتتىك-جەكەمەنشىك ارىپتەستىك اياسىندا 29 نىساننىڭ قۇرىلىسى اياقتالادى. 2019 جىلى — 40, 2020 جىلى — 25 نىساندى پايدالانۋعا بەرۋ كوزدەلگەن. وسىلايشا، عيماراتپەن قامتۋ كورسەتكىشى 100%-دى قۇرايدى. م. جۇمانقۇلوۆ، سونداي-اق، سالانى تسيفرلاندىرۋ، دارىگەرلەر مەن مەديتسينا ماماندارىنا ەڭبەكاقى مولشەرىن ۇلعايتۋ بويىنشا اتقارىلىپ جاتقان جۇمىستار تۋرالى مالىمدەدى.

ءوز كەزەگىندە، دەنساۋلىق ساقتاۋ ۆيتسە-ءمينيسترى و. ابىشەۆ ءدارى-دارمەكتىڭ باعاسىن تومەندەتۋ ماقساتىندا دارىلىك رەتتەۋ تۋرالى زاڭعا حالىقارالىق پاتەنتتەلمەگەن اتاۋعا اۋىسۋ تۋرالى وزگەرىستەر ەنگىزىلگەنىن ايتتى، ياعني، ءدارىحانالار رەتسەپت جازعان كەزدە ساۋدا ماركاسىن كورسەتپەيدى (بۇل دا ءدارى-دارمەك قۇنىنا اسەر ەتەدى), بۇنىڭ ورنىنا قاجەتتى ءدارى-دارمەكتەردى تاعايىندايدى. وسىلايشا، ازاماتتار دارىلەردى حيميالىق قۇرامىنا قاراي ساتىپ الادى. بۇل جۇمىس كەلەسى جىلى جۇزەگە اسىرىلادى جانە ءدارى-دارمەكتەردىڭ جوعارى باعاسىنا قاتىستى پروبلەمانى شەشۋگە جول اشادى.

ءوڭىردىڭ دەنساۋلىق ساقتاۋ سالاسىنىڭ وكىلدەرى اتىنان №5 قالالىق ەمحانانىڭ باس دارىگەرى د. سارسەنوۆا ءسوز سويلەپ، العاشقى مەديتسينالىق-سانيتاريالىق كومەكتى دامىتۋ ماسەلەسىن قوزعادى. ونىڭ پىكىرىنشە، ەمدەلۋشىلەردىڭ دەنساۋلىعى 10%-عا عانا دەنساۋلىق ساقتاۋ جۇيەسىنە بايلانىستى، دەنساۋلىقتى جاقسارتۋ ءۇشىن ازاماتتاردىڭ ورتاق جاۋاپكەرشىلىگى ماڭىزدى. بۇل پروفيلاكتيكالىق تەكسەرۋلەردى، سكرينينگتەردى جانە ت.ب. ۋاقىتىندا وتۋدەن كورىنىس تابادى.

پرەمەر-مينيستر وڭىردە مەديتسينالىق قىزمەتتەر ۇسىنۋ ساپاسىمەن وبلىستىق بالالار اۋرۋحاناسىن تەكسەرۋ بارىسىندا تانىستى. اۋرۋحانانىڭ باس دارىگەرى م. راباندياروۆا جىل سايىن كلينيكادا ءتۇرلى حيرۋرگيالىق پاتولوگيالارى بار 4000-نان استام كۇردەلى وپەراتسيالار جۇرگىزىلەتىنىن حابارلادى. ونىڭ ىشىندە نەيروحيرۋرگيا، ورتوپەديا جانە تراۆماتولوگيا بويىنشا 200-دەن استام جوعارى تەحنولوگيالىق وپەراتسيالار دا جاسالادى. اۋرۋحانانى تسيفرلاندىرۋ اياسىندا دارىگەردىڭ قابىلداۋىنا جازىلۋعا جانە مەديتسينالىق قىزمەت الۋعا ارنالعان «Elsimed» اقپاراتتىق جۇيەسى ەنگىزىلدى. وسى جىلدىڭ شىلدە ايىنان باستاپ اۋرۋحانانىڭ مەديتسينالىق قۇجاتتارىن جۇرگىزۋ تولىعىمەن ەلەكتروندى فورماتقا كوشىرىلدى.

جالپى، جامبىل وبلىسىندا 82 دەنساۋلىق ساقتاۋ ۇيىمى مەديتسينالىق قۇجاتتامانى قاعازسىز جۇرگىزۋگە كوشتى. وبلىستا بارلىق «العاشقى مەديتسينالىق-سانيتاريالىق كومەك» ۇيىمدارىندا تسيفرلىق ساۋاتتىلىق پوستتارى اشىلدى. قۇرىلعان تسيفرلىق ساۋاتتىلىق پوستتارى ارقىلى تسيفرلىق داعدىلارعا 489 105 ادام وقىتىلدى. بۇل ينتەرنەتتى بەلسەندى قولدانۋشىلاردىڭ 86,8%. «Damu Med» مەديتسينالىق اقپاراتتىق جۇيەcىندەگى موبيلدىك قوسىمشاعا 34 مىڭ ادام تىركەلدى.

Abai.kz