بۇگىن اقوردادا ەلباسى نۇرسۇلتان نازارباەۆ ادەبيەت جانە ونەر سالاسىنداعى مەملەكەتتىك سىيلىقتاردى تاپسىردى، دەپ حابارلايدى قازاقپارات ءتىلشىسى.

اتاپ ايتقاندا اقىن تىنىشتىقبەك ابدىكاكىموۆكە «القوڭىر دۇنيە» ولەڭدەر مەن باللادالار جيناعى ءۇشىن; اقىن اقۇشتاپ باقتىگەرەيقىزى باقتىگەرەەۆاعا  «انا سىرى» ولەڭدەر مەن باللادالار جيناعى ءۇشىن، اقىن وتەگەن ورالبايۇلى ورالباەۆقا «شۋاقتى شاق» جىر جيناعى ءۇشىن بەرىلدى.

مۇنان بولەك، نۇرسۇلتان نازارباەۆ ەكى اۆتورلىق ۇجىمعا دا مەملەكەتتىك سىيلىقتى تاپسىردى.

ناقتى ايتقاندا، تولەۋبەك نىعمەتۇلى الپيەۆكە، الان اسقارۇلى بورىباەۆقا، سۇندەت ءابدىراحمانۇلى بايعوجينگە، «استانا وپەرا» مەملەكەتتىك وپەرا جانە بالەت تەاترى» كوممەرتسيالىق ەمەس اكتسيونەرلىك قوعامىنىڭ شىعارماشىلىق ۇجىمىنا قاتىسۋشىلارعا «اباي» وپەراسى (ل. حاميدي، ا. جۇبانوۆ) ءۇشىن; اقان قارعامبايۇلى ساتاەۆقا، ءاليا نۇرسۇلتانقىزى نازارباەۆاعا، تيمۋر قازبەكۇلى جاقسىلىقوۆقا، التىناي باۋىرجانقىزى نوگەربەككە، ءادىل ەرالىۇلى احمەتوۆكە «اناعا اپارار جول» تولىقمەترلى كوركەم ءفيلمى ءۇشىن مەملەكەتتىك سىيلىق تاپسىرىلدى.

«نۇرسۇلتان ءابىشۇلى، ۇلى دالانىڭ ەركىن داۋسىن تورتكۇل الەمگە ەستىرتۋ ءداۋىرى سىزدەي ۇلعا بۇيىرعانى تاعدىر سىيى ەكەنى راس. قاسيەتتى اتامەكەننىڭ وتكەن رۋحىن جاڭعىرتىپ، جاس ۇرپاق ساناسىندا جەتى قاسيەتىن قايتادان ەسىنە سالىپ، پاراساتپەن، ۇلىلىقپەن، ساياساتكەرلىكپەن جاڭا عاسىر كوشىنە جالعاپ وتىرعان ەڭبەگىڭىز الەمگە ايان. ءوز باسىم اتقا ءمىنىپ، دومبىرا تارتىپ وسكەن سەزىمتال جۇرەگىڭىزگە قايران قالاتىنىمدى جاسىرا المايمىن. ەرەكشە ادامسىز، ونەرى ۇلى بولماي مەملەكەت ۇلى بولمايدى. كىتاپ وقىلمايدى دەگەن بەكەر ءسوز. قازاق ادەبيەتىنىڭ جاۋھارلارىنىڭ الەمنىڭ بۇگىندە التى تىلىنە اۋدارىلا باستاۋى، الەم ادەبيەتىنىڭ وزىق ۇلگىلەرىنىڭ قازاق تىلىنە اۋدارىلىپ كەلۋى سوعان باستالعان ۇلى قادام دەپ بىلەمىز. ەركىندىكتىڭ كوك تۋىن قىران مىنەز قايسارلىعىڭىزبەن بيىكتەتە بەرەرىڭىزگە سەنىمدىمىز جانە تىلەكشىمىز»، - دەدى ەلباسى قولىنان مەملەكەتتىك سىيلىق العان اقۇشتاپ باقتىگەرەەۆا.

Abai.kz