الماتىدا قر ۇلتتىق كىتاپحاناسىندا جازۋشى, ادەبيەت سىنشىسى، دراماتۋرگ, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى اسقار سۇلەيمەنوۆتىڭ 80 جىلدىق مەرەيتويىنا وراي «پاراسات پاديشاسى» اتتى ەسكە الۋ كەشى ءوتتى.

ءىس-شارانى قر ۇلتتىق كىتاپحاناسى ديرەكتورىنىڭ كىتاپحانالىق جۇمىستارى جونىندەگى ورىنباسارى باقىتجامال وسپانوۆا اشتى.

كەش اياسىندا قر ۇلتتىق كىتاپحاناسى قورىنان اسقار سۇلەيمەنوۆتىڭ ءومىرى مەن شىعارماشىلىعىنان «پاراسات پاديشاسى» اتتى كىتاپ كورمەسى ۇيىمداستىرىلدى. شارانى جازۋشى، پۋبليتسيست، عالىم - بەيبىت قويشىباەۆ جۇرگىزدى.

ءىس-شاراعا مۇرات اۋەزوۆ، ومىرزاق ايتباەۆ، سماعۇل ەلۋباي، تەمىرحان تەبەگەنوۆ، نۇكەتاي مىشباەۆا، قانات تورەباي، مامبەت قويگەلدى، ءاليا بوپەجانوۆا، دوسحان جولجاقسىنوۆ، قاراكوز سۇلەيمەنوۆا، ساتىبالدى نارىمبەتوۆ جانە ت.ب. اقىن-جازۋشىلار، قوعام جانە مادەنيەت قايراتكەرلەرى قاتىسىپ، ءسوز سويلەدى.

اسقار سۇلەيمەنوۆ  1938 جىلى 29 جەلتوقساندا  وڭتۇستىك قازاقستان وبلىسى  تۇركىستان اۋدانىنىڭ، شورناق ەلدى مەكەنىندە دۇنيەگە كەلگەن. 1959 جىلى قازپي-ءدىڭ ادەبيەت-تاريح فاكۋلتەتىن (قازىرگى اباي اتىنداعى قازاق ۇلتتىق پەداگوگيكالىق ۋنيۆەرسيتەتى) بىتىرگەن. 1961 جىلى «جول باسى»  العاشقى سىن ماقالاسى «لەنينشىل جاس» (قازىرگى «جاس الاش») گازەتىندە جاريالانعان. ول «بەسىن» (1970), «اداسقاق» (1988), «بەساتار» (1996), «كەك» (2001), «بولمىسپەن بەتپە-بەت” (2001), شىعارمالارىنىڭ اۆتورى جانە «ارعىماقتار مەن ادامدار» دەرەكتى ءفيلمىنىڭ (1977), «اس» («قۇلاگەر») كوركەم ءفيلمىنىڭ (1976), «بايانەل» («قوزى كورپەش-بايان سۇلۋ») ءفيلمىنىڭ ستسەناريىن جازعان.

Abai.kz