2018 جىلدىڭ 28 جەلتوقساندا رەسپۋبليكالىق تەلەارنالار ەلباسىمىز نۇرسۇلتان ءابىشۇلى نازارباەۆتىڭ وتاندىق بۇقارالىق اقپارات قۇرالدارى وكىلدەرىنە بەرگەن سۇحباتىن كورسەتتى.

وسى كەزدەسۋدە پرەزيدەنتىمىز ن.ءا. نازارباەۆ وزبەكستان حالقىنىڭ سانى 33 ميلليوندى قۇراعانىن، بۇل – ءبىزدىڭ ارامىزداعى (ورتالىق ازياداعى) ەڭ ءىرى مەملەكەت بولىپ سانالاتىنىن، ەكى ەل اراسىنداعى 1 ميلليارد اقش دوللارىنا جەتپەي جۇرگەن ساۋدا-ساتتىعىمىز بيىل 3 ميلليارد بولاتىنىن، ساۋدا كولەمى 42 پايىزعا ارتقانىن ايتا كەلىپ، ونى ءبىز بولاشاقتا 5 ميلليارد اقش دوللارىنا جەتكىزۋ ماقساتىن قويىپ وتىرعانىمىزعا ەرەكشە توقتالدى.

وسى جونىندە وي بولىسە وتىرىپ، ەلباسىمىز قازاقستان مەن قىتاي اراسىنداعى «قورعاس» اتتى ۇلكەن كەشەن سالىنىپ جاتقانىن، سونداي كەشەن وزبەكستان مەن قازاقستان اراسىندا دا جاڭا قالا پايدا بولۋى مۇمكىن ەكەنىن جەتكىزدى.

بىزدىڭشە، ەلباسىمىز ايتقان قازاقستان مەن وزبەكستان اراسىنداعى وسىناۋ جاڭا قالا مىرزاشولدەگى اتاكەنت كەنتىنىڭ نەگىزىندە نۇرلىكەنت قالاسى بولىپ قۇرىلعانى ءجون.

رەسمي مالىمەتتەر بويىنشا بۇگىندە ءمىرزاشول وڭىرىندەگى اتاكەنت كەنتىندە (1998 جىلعى 11 تامىزعا دەيىن يليچ پوسەلكەسى دەپ اتالىپ كەلدى) – 18 مىڭنان استام حالىق تۇرادى.

تۇركىستان وبلىسىنىڭ ورتالىعى تۇركىستان قالاسىنان 450 شاقىرىمعا جۋىق قاشىقتىقتا جاتقان ماقتاارال اۋدانىنداعى اتاكەنت كەنتى قازاقستاننىڭ ەڭ قيىر وڭتۇستىگىندە، وزبەكستانمەن تىكەلەي شەكارالاس ورنالاسقان، سونداي-اق تاجىكستان، ارى قاراي اۋعانستاننىڭ اۋماقتارى دا الىس ەمەس، ءتىپتى ءتيىپ تۇر دەۋگە بولادى.

بۇعان قوسا اتاكەنت كەنتى ەلىمىزدىڭ وزبەكستانمەن ساۋدا-ساتتىق جانە وزگە دە ەكونوميكالىق جانە الەۋمەتتىك، ساياسي قارىم-قاتىناستارىمىزدى ودان ءارى نىعايتۋعا وتە قولايلى تۇسىندا، توعىز جولدىڭ تورابىندا ورنالاسقان.

مىرزاشولدەگى اتاكەنت كەنتىنەن وزبەكستاننىڭ سىرداريا قالاسىنا، ارى قاراي تاشكەنت قالاسىنا جەتۋ وپ-وڭاي، وعان قوسا وزبەكستاننىڭ باسقا وڭىرلەرىنە دە اتاكەنت ارقىلى بارۋ بارىنشا قولايلى.

سونداي-اق ماقتاارال اۋدانىنىڭ اتاكەنت كەنتىندەگى «ماقتا شارۋاشىلىعى تاريحى مۋزەيى» مەملەكەتتىك كوممۋنالدىق قازىنالىق كاسىپورنىنا رەسپۋبليكالىق مارتەبە بەرىلىپ، جاڭا جانە كەڭ عيماراتقا كوشىرىلسە، مادەني مۇرامىز رەتىندە وسى وڭىرگە تۋريستەردى تارتۋعا دا جول اشىلار ەدى.

ءمىرزاشول ءوڭىرى حالقىنىڭ يگىلىگى مەن جاستاردىڭ بولاشاعى ءۇشىن تۇركىستان وبلىسىنىڭ ماقتاارال اۋدانىنداعى اتاكەنت كەنتىنىڭ نەگىزىندە قۇرىلاتىن وبلىستىق ماڭىزى بار نۇرلىكەنت قالاسىندا نازارباەۆ زياتكەرلىك مەكتەبىن جانە ارنايى مەملەكەتتىك ۋنيۆەرسيتەت اشقان ءجون.

ويىمىزدى قىسقاشا تۇيىندەسەك، بىزدىڭشە، پرەزيدەنتىمىز نۇرسۇلتان ءابىشۇلى نازارباەۆ ايتقان قازاقستان مەن وزبەكستان اراسىنداعى الداعى ۋاقىتتا سالىناتىن جاڭا قالا قازىرگى تۇركىستان وبلىسىنىڭ ماقتاارال اۋدانىنداعى اتاكەنت كەنتىنىڭ نەگىزىندە، ەلباسىمىزدىڭ حالقىمىز بەن مەملەكەتىمىزدىڭ الدىنداعى ەرەن ەڭبەگىنىڭ قۇرمەتىنە نۇرلىكەنت قالاسى بولىپ قۇرىلعانى دۇرىس بولار ەدى.

كەلەشەكتە قازاقستان مەن وزبەكستان اراسىنداعى التىن كوپىرگە اينالاتىن نۇرلىكەنت قالاسى قازىرگى اتاكەنت كەنتىنىڭ نەگىزىندە سالىنسا، مۇندا جاڭا يندۋستريالىق ونەركاسىپتىك، وندىرىستىك جۇمىس ورىندارى اشىلىپ، وسىناۋ جاڭا شاھار ارقىلى تۇركىستان وبلىسىنىڭ قۇرىلۋىنا بايلانىستى وبلىستىڭ قازىرگى اكىمشىلىك ورتالىعىنان 500 شاقىرىمداي تۇكپىردە قالىپ قويعان ءمىرزاشول-شاردارا وڭىرلەرىندەگى 500 مىڭ حالىقتىڭ تۇرمىس-تىرشىلىگى مەن الەۋمەتتىك احۋالىنىڭ جاقسارا تۇسۋىنە بارىنشا قولايلى جاعداي تۋىپ، نۇرلىكەنت قالاسى ءمىرزاشولدىڭ ەكونوميكالىق، رۋحاني جانە مادەني ورتالىعىنا اينالار ەدى.

مىرزانتاي قوجابايۇلى جاقىپ، ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى تەلەراديو جانە قوعاممەن بايلانىس كافەدراسىنىڭ دوتسەنتى (of Associate Professor), فيلولوگيا عىلىمدارىنىڭ كانديداتى (PhD), «زەرتتەۋشى» رەسپۋبليكالىق عىلىمي-ءبىلىم بەرۋ ورتالىعى» مەكەمەسىنىڭ ديرەكتورى

Abai.kz