سارسەنبى, 26 ماۋسىم 2019
وسى عوي ەندى... 1636 1 پىكىر 11 قاڭتار, 2019 ساعات 11:15

ارحيمەدتىڭ "جەتىم بالالارى" الاقان جايىپ ءجۇر...

جاڭا جىل تابالدىرىقتان اتتار-اتتاماستان-اق قوستانايدا  جاڭا «جىر» باستالدى. وبلىسىمىزدىڭ اكىمى ارحيمەد مۇقانبەتوۆ سارا الپىسقىزى تىكەلەي باقىلاۋعا العان، سوندىقتان دا قارجىلىق جاعىنان ەش ۋاقىتتا قىسىلىپ كورمەگەن «جانۇيا» بالالار ۇيىنە  2 ميلليون تەڭگە بەرىپ، وزىنشە «مىرزالىق» تانىتىپ جۇرگەندە وزگە جەتىمدەر جۇرتقا الاقان جاياتىن كۇيگە تۇسكەن كورىنەدى.

ءبىزدىڭ وتكەندە وسى تاقىرىپقا جازعان ماقالامىزداعى اكىمىمىزدىڭ ءجونسىز جومارتتىعىنىڭ شىنايى جاناشىرلىق ەمەس، جوعارى جاققا جاقسى اتتى كورىنىپ قالۋى ءۇشىن جاسالعان ارەكەتى مە دەگەن كۇدىگىمىز راسقا شىقتى. سول جولى ءبىز «مۇمكىن، اكىم بالالارعا سىيلىق جاساعىسى كەلسە، نەگە اناۋ كۇنىن ازەر كورىپ وتىرعان وسىنداعى «دەلفين» بالالار ءۇيى سەكىلدى كوڭىلى جارىمجان بالاپانداردىڭ كوڭىلىن كوتەرمەيدى؟» دەگەن ەدىك.

ايتقانىمىز ايداي كەلدى. بالالارعا قاجەتتى دۇنيەلەردەن ابدەن تارىققان «دەلفين» بالالار ءۇيىنىڭ ديرەكتورى ومىربەك بايكەنوۆ قولى جەتەتىن مەكەمەلەر مەن كوزتانىس كاسىپكەرلەردىڭ بارلىعىنا  ءۇشبۋ حات جولداپ، حال-قادارىنشا كومەك بەرۋىن ءوتىنىپ سۇراعان.

- ءبىز ونسىز دا كومەك كورسەتىپ تۇرامىز، - دەيدى قالامىزداعى «گەرمەس» جاۋاپكەرشىلىگى شەكتەۋلى سەرىكتەستىگىنىڭ ديرەكتورى ە.سۇلتانوۆ, - كەزىندە ازىق-تۇلىك، كەڭسە تاۋارلارى مەن باسقا دۇنيەلەردى سوزگە كەلمەستەن الىپ بەرىپ كەلدىك.  ءتىپتى سۇراماسا دا كيىم-كەشەك جاعىنان قول ۇشىن بەردىك. ولاردى ءبىز دۇكەندەردەن تاڭداپ ءجۇرىپ، جاقسىسىن الامىز. ماسەلەن، وسىنداي ءبىر كۇرتكەنىڭ ءوزى  ورتا ەسەپپەن العاندا 35 مىڭ تەڭگەگە تۇسەدى. ءبىز بەرگەنىمىزدى پۇلداپ وتىرعان جوقپىز. الايدا جاقىندا  «ەندى ءدارى-دارمەك جاعىنان دا كومەكتەسىڭدەر» دەگەن ءوتىنىشىن ەستىپ، تاڭ قالىپ وتىرمىز. بۇل ءتىزىم 30 ءتۇرلى ءدارىنى قامتيدى ەكەن. ءتىپتى وندا وزگەسىن بىلاي قويعاندا، 100 شاقتى ەمىزىك تە ءجۇر. سوندا قالاي، بۇل بالالار ۇيىنە مەملەكەت ەش كومەك بەرمەي مە؟

 مىناۋ  سول ءتىزىم

بۇل ساۋالعا ءبىر دە جاۋاپ تاپپادىق. تەك ءبىزدىڭ «دەلفين» وسىنداي ولمەستىڭ كۇيىن كەشىپ وتىرعاندا اكىمىمىز قاعاناسى قارق، ساعاناسى سارق «جانۇياعا» ەرەكشە مىرزالىق جاساۋىن قانداي قيسىنعا سىيعىزارىمىزدى بىلمەي باسىمىز قاتىپ وتىرعان جايىمىز بار.

جايبەرگەن بولاتوۆ

 Abai.kz

1 پىكىر