تۇركىستان وبلىسى ماقتاارال اۋدانىنىڭ ەڭبەكقور شارۋالارى قاڭتاردىڭ قاق ورتاسىندا ديقانشىلىقتى باستاپ جىبەردى. ەرتە ءونىم بەرەتىن قىرىققابات داقىلىن ەگۋ ناۋقانىنا قازىردىڭ وزىندە 10-نان استام بريگادالار قاتىسىپ، قىزۋ جۇمىس جۇرۋدە.

ماقتاارال اۋدانى اكىمىنىڭ ءباسپاسوز قىزمەتىنىڭ جازۋىنشا، قاڭتاردىڭ جاۋىن-شاشىنىنا قاراماستان ەگىستىك القاپتا جۇمىس جاساپ جاتقان ديقانداردىڭ جاي-كۇيىنەن حابار الۋ ءۇشىن اۋدان اكىمى باقىت اسانوۆ «ماقتاارال» اۋىلدىق وكرۋگىندەگى «فەرۋدين» شارۋا قوجالىعىنا باردى. اليەۆ ءميرزاديننىڭ باسشىلىعىنداعى قوجالىقتىڭ ەنشىسىندە 10 گەكتار جەر بار بولسا، سونىڭ 5 گەكتارىنا قىرىققابات داقىلى ەگىلىپ جاتىر ەكەن. 30 ادامنان قۇرالعان بريگادا قاڭتاردىڭ ءاربىر جىلى كۇنىن پايدالانىپ، جاۋىن-شاشىنعا قاراماستان جۇمىس جاساپ جاتىر.

«جىلىجايدا 120 مىڭ ءتۇپ قىرىقاباتتىڭ كوشەتىن دايىنداپ، 30 ادامنان قۇرالعان بريگادامەن كوشەت وتىرعىزۋدى باستادىق. جۇمىسشىلارعا كۇنىنە 2 مىڭ تەڭگەدەن ەڭبەك اقىسىن تولەۋدەمىز. نەگىزىنەن 2 ايدىڭ كولەمىندە ەككەن ەگىنىمىز ءپىسىپ، جەتىلەدى. سونداي-اق، 90 كۇندە جەتىلەتىن سورتىن دا ەكتىك. ەگىلگەن كوشەتتىڭ ءۇستىن جاپقىشپەن جاۋىپ، جاۋىن-شاشىننان قورعايمىز. ەڭ باستىسى - كۇتىپ-باپتاۋعا ۇلكەن ءمان بەرىلۋى كەرەك»، - دەدى م.اليەۆ.

اۋدان باسشىسى باقىت ناسىرحانۇلى جۇمىسشىلارعا قولعابىس جاساۋ ءۇشىن قىرىققابات ەگۋگە كومەكتەسىپ، كوشەتتەر وتىرعىزدى. سونداي-اق، قوجالىق يەلەرىنىڭ ەگىنىنە بەرەكە تىلەپ، مول ءونىم الۋ ءۇشىن تىنباي ەڭبەكتەنۋ كەرەكتىگىن ايتتى. ال، م.اليەۆ جاۋىن-شاشىنعا قاراماستان ەگىن القابىنا ارنايى كەلگەن اۋدان اكىمىنە العىسىن ءبىلدىرىپ، بۇل سالادا ءوزىنىڭ تاجىريبەسى وتە مول ەكەندىگىن تىلگە تيەك ەتتى. ءتىپتى، ول وتكەن جەلتوقسان ايىندا العاشقى ەگىنىن باستاپ قويعانىن اتاپ ءوتىپ، ءوڭىر باسشىسىن تاڭداندىردى.

ماقتارالدىق ديقاندار نەگىزىنەن سالماعى 1-1,5 كەلىدەن اسپايتىن قىرىققاباتتىڭ نيدەرلاندىق پانديون سۇرپىن وتىرعىزۋدا. ەرتە پىسەتىن ءونىم تۇرىنە ەۋروپالىقتار مەن رەسەيلىكتەر تاراپىنان سۇرانىس كوپ.

جالپى، قىرىققابات داقىلى ەرتە پىسەتىندىكتەن، ماقتارالدىق ديقاندار ونىڭ سوڭىنان قاۋىن-قاربىز، ماقتا سياقتى ت.ب. داقىلدار ەگۋگە كىرىسەدى. وسىلايشا جەر ەمگەن شارۋالار 1 جىلدا ەكى رەت ءونىم الادى. بىلتىر ءساۋىر ايىندا العاشقى ءونىمىن العان ماقتارالدىق ديقاندار رەسپۋبليكانىڭ بىرنەشە وبلىسىن جانە رەسەي فەدەراتسياسىن قىرىققاباتپەن قامتاماسىز ەتكەن بولاتىن.

ايتا كەتەيىك، ماقتارال اۋدانىندا بىلتىر 30 مىڭ تونناعا جۋىق كوكونىس ونىمدەرى قامباعا جينالعان. ال، ونىڭ باسىم بولىگى قىرىققابات بولاتىن.

Abai.kz