ءبىلىم جانە عىلىم ءمينيسترى

كۇلاش شامشيدينوۆاعا

قازاقستان پەداگوگتارى

قاۋىمداستىعىنان

اشىق حات

بىلتىرعى پرەزيدەنت جولداۋىنان كەيىن پرەزيدەنت تاپسىرماسى بويىنشا مۇعالىمدەردى ارتىق جۇمىستان “اراشالايتىن”  “پەداگوگ مارتەبەسى” تۋرالى زاڭ قابىلدانۋى كەرەك بولعان.  ۆيتسە مينيستر ە. سۋحانبەرديەۆانىڭ مالىمدەۋىنشە جۇمىس توبىنا 78 ادام كىرگەن. بىراق وسى ورايدا قازاقستان پەداگوگتارىنىڭ نەگىزگى ۇسىنىستارى ەسكەرىلمەي قالدى

وسىعان وراي سىزگە ءبىزدىڭ ۇسىنىسىمىز:

1. ءبىلىم باسقارمالارىن جەرگىلىكتى اكىمشىلىكتەن قر ءبىلىم جانە عىلىم مينيسترلىگىنىڭ قۇزىرەتىنە وتكىزۋ كەرەك (مەكتەپ مۇعالىمدەرىن ءوز مىندەتىنە جاتپايتىن جۇمىستاردان وسى قادام عانا قۇتقارا الادى. زاڭ بابىنا قوسىمشا رەتىندە، "مۇعالىمدى مىندەتىنە جاتپايتىن جۇمىسقا جەككەن شەنەۋنىك ادامدى قۇلدىقتا ۇستاعان قىلمىسكەرمەن" تەڭەستىرىلىپ، قىلمىستىق جاۋاپقا تارتىلۋى ءتيىس" دەپ كورسەتۋ كەرەك).

2. مەكتەپ مۇعالىمىنىڭ ورتاشا جالاقىسى پارلامەنت ءماجىلىسىنىڭ دەپۋتاتى مەن ءمينيستردىڭ جالاقىسىنىڭ كەم دەگەندە 70 %-نا تەڭ بولۋى ءتيىس. (جالاقىنىڭ جوعارى بولۋى ماماندىققا دەگەن باسەكەنى كۇشەيتەدى. باسەكە بولعان جەردە ساپا بولادى).

3. مۇعالىم قاۋىپتى ماماندىق بولىپ قالدى. سوندىقتان، مۇعالىمگە قول جۇمساعان ادامعا قۇقىق قورعاۋ ورگانى قىزمەتكەرىنە قول كوتەرگەن ادامعا تاعايىندالاتىنداي جازا قولدانىلۋى ءتيىس.

4. پەداگوگ مامانداردى دايىنداۋ جۇيەسىن قايتا قاراپ، مەكتەپكە ەر ازاماتتاردى كوبىرەك تارتۋ تەتىكتەرىن قاراستىرۋ كەرەك.

5. وقۋلىقتار مەن ادىستەمەلىك قۇرالدار جاساۋعا پراكتيك مۇعالىمدەردى دە تارتۋ قاجەت.

6. ءبىلىم باسقارماسىنىڭ ەڭ تومەنگى قىزمەتكەرى جەتەكشى مامان بولۋ ءۇشىن كەمى 8 جىل، اۋدان/قالا ءبىلىم ءبولىمىنىڭ جەتەكشى مامانى قىزمەتىنە كونكۋرسقا قاتىسۋ ءۇشىن كەمى 5 جىل پەد.ءوتىلى، ال باسشىلارىنا تيىسىنشە، 10, 8 جىل پەد.ءوتىل. بولۋى مىندەتتى دەگەن تالاپ قوسقان ءجون. سونىمەن قاتار مەكتەپ ديرەكتورلارىن تاعايىنداۋعا ارنالعان بۇيرىققا مەكتەپ ديرەكتورلارىنىڭ مەرزىمىن بەكىتۋ كەرەك. 5 جىل سايىن مەكتەپ ديرەكتورلارى كونكۋرسپەن تاعايىنداۋ قاجەت. پارا العان قىلمىسى دالەلدەنگەن پەداگوگيكالىق قىزمەتكەر ءومىر بويى پەداگوگيكالىق قىزمەتتەن الاستاتىلۋى ءتيىس.

8. بيۋدجەتتەن مەكتەپتەردى جوندەۋگە بولىنگەن قاراجات باق بەتىندە جاريالانۋى ءتيىس (سوندا، مۇعالىمدەر مەن اتا-انالاردان مەكتەپتى جوندەۋگە اقشا جيناۋ قيىنعا سوعاتىن بولادى).

9. ەر مۇعالىمدەردى 55 جاستان، ايەل مۇعالىمدەردى 50 جاستان زەينەتكە شىعارۋ كەرەك (مۇعالىمدەردەن ەڭ كوپ تۇسكەن ۇسىنىس!).

10. مۇعالىمدەردىڭ الەۋمەتتىك كومەكتى جەرگىلىكتى اتقارۋشى ورگانداردىڭ ەنشىسىنە قالدىرعان. جەرگىلىكتى ورگاندار الەۋمەتتىك كومەكتى ءالى دە شەشە الماي ءجۇر، سوندىقتان رەسپۋبليكالىق بيۋدجەتكە قاراتىپ قازاقستان بويىنشا بىدەي تاريف بەلگىلەۋ كەرەك.

11. جاڭا زاڭ جوباسىنداعى ادەپ جونىندەگى كەڭەستى الىپ تاستاعىن ءجون. ويتكەنى مەكتەپ باسشىلارى، اۋدان/قالا ءبىلىم بەرۋ بولىمدەرىنىڭ وكىلدەرى، باسشىلارى زاڭگەر ەمەس! بۇل مۇعالىمدى جازالاۋ قۇرالىنا اينالۋى مۇمكىن!

12. مۇعالىمنىڭ اتا-انا مەن وقۋشىنى قۇرمەتتەۋگە زاڭ جوباسىندا مىندەتتەگەنى سياقتى اتا-انا مەن وقۋشىنى تاراپىنان مۇعالىمنىڭ دە قۇقى مەن ار وجدانى قۇرمەتتەلۋگە ءتيىس ەكەنىن ۇمىتپاعان ءجون.

13. زاڭ جوباسىنداعى قاراما-قايشىلىقتار مۇعالىمدەردىڭ ۇسىنىستارى بولا تۇرا ءالى جوندەلگەن جوق.

14. زاڭ جوباسىنا اتسالىسقان جۇمىس توبى قازاقستان رەسپۋبليكاسى ءبىلىم جانە عىلىم ءمينيسترىنىڭ 2018 جىلعى 16 قازانداعى № 575 بۇيرىعىمەن بەكىتىلگەن ەكەن. وسى كوميسسيا قۇرامىمەن تانىستىرۋدى، ءالى دە بولسا بۇل قۇرامعا “قازاقستان پەداگوگتارىنىڭ قاۋىمداستىعىنىڭ” ۇستازدارىن تارتۋدى دا ۇسىنامىز.

15. مۇعالىمدەردەن ۇسىنىلعان نەگىزگى ۇسىنىستار كولەڭكەدە قالۋدا. ۇسىنىستار ەسكەرىلمەسە بۇل زاڭ دا ء“بىلىم تۋرالى” زاڭنىڭ كوشىرمەسى بولىپ قالا بەرەدى سىزدەن ناقتى جاۋاپ پەن ۇسىنىس كۇتەمىز.

ءبىزدىڭ ويىمىزشا، «پەداگوگ مارتەبەسى» تۋرالى زاڭ جوباسىن دايىنداۋعا قاتارداعى مۇعالىمدەر دە تارتىلۋى ءتيىس. زاڭ جوباسى باق بەتتەرىندە اشىق تالقىعا ءتۇسۋى كەرەك.

قۇرمەتپەن:

مەيىرجان تەمىربەك، "قازاقستان پەداگوگتارىنىڭ" قاۋىمداستىعى "مۇعالىم مارتەبەسى" قوعامدىق بىرلەستىگىنىڭ توراعاسى

ءومىر شىنىبەكۇلى، "قازاقستان رەسپۋبليكاسى ءبىلىم بەرۋ ءىسىنىڭ قۇرمەتتى قىزمەتكەرى، "ىبىراي التىنسارين" مەدالىنىڭ يەگەرى. 

Abai.kz