جۇما, 24 قاڭتار 2020
ساڭلاق 1771 1 پىكىر 26 ناۋرىز, 2019 ساعات 10:59

اقش سانكتسياسىنا ىلىككەن وزبەك كاسىپكەرى اIBA پرەزيدەنتى قىزمەتىنەن كەتتى

حالىقارالىق بوكس قاۋىمداستىعىنىڭ (AIBA) پرەزيدەنتى گافۋر راحيموۆ قىزمەتىنەن كەتىپ، ونىڭ ورنىنا افريكا بوكس كونفەدەراتسياسى (AFBC) باسشىسى موحامەد مۋستاسان تاعايىندالدى. 

موحامەد مۋستاسان AIBA-نى ۋاقىتشا باسقارادى.

AIBA باسشىلىعىنا ۇلكەن داۋ-دامايمەن كەلگەن وزبەكستاندىق كاسىپكەر جۇما كۇنى ۇيىمنىڭ پرەزيدەنتىندىك وكىلەتتىگىن ۋاقىتشا توقتاتتى. ال سەنبى كۇنى وتكەن AIBA اتقارۋشى كوميتەتىنىڭ وتىرىسىندا ۇيىمنىڭ بەس ۆيتسە-پرەزيدەنتتىڭ ىشىندەگى بىردەن-ءبىر كانديدات مۋستاسان پرەزيدەنتتىڭ مىندەتىن اتقارۋشى بولىپ تاعايىندالدى.

گافۋر راحيموۆ AIBA پرەزيدەنتتىك قىزمەتىنە اتالعان ۇيىمنىڭ وتكەن جىلى 3 قاراشادا ماسكەۋدە وتكەن كونگرەسىندە سايلانعان بولاتىن. 134 ەل داۋىس بەرگەن سايلاۋدا وزبەكستاندىقتىڭ كانديداتۋراسىن 86 ەلدەن قولداعان. ال قازاقستان وكىلى سەرىك قوناقباەۆقا 48 ەل داۋىس بەرگەن.

الايدا حالىقارالىق وليمپيادا كوميتەتى بۇل تاعايىندالۋدان سوڭ بىردەن AIBA-مەن قارىم-قاتىناسىن توقتاتتى. ويتكەنى، گافۋر راحيموۆ اقش قارجى مينيسترلىگىنىڭ تىزىمىندە حالىقارالىق قىلمىستىق توپتىڭ نەگىزىن قالاۋشىسى رەتىندە تۇر.

حوك گافۋر راحيموۆ پرەزيدەنتتىككە سايلانسا، بوكستىڭ وليمپيادا باعدارلاماسىنان الىنۋى مۇمكىن ەكەنىن ەسكەرتكەن. ارتىنشا 2020 جىلعى توكيو وليمپياداسىنا بوكسشىلاردى ىرىكتەۋدى توقتاتتى.

ال عافۋر راحيموۆ وزىنە تاعىلعان ايىپتىڭ بارلىعى «ساياسات» ەكەنىن ايتىپ، مويىنداماي وتىر.

قۋانىش قاپپاس

Abai.kz

1 پىكىر