بەيسەنبى, 14 قاراشا 2019
بيلىك 3676 6 پىكىر 5 ءساۋىر, 2019 ساعات 09:45

اۋىلعا بولىنگەن اقشا ورنىمەن جۇمسالۋعا ءتيىس

داريعا نازارباەۆانىڭ توراعالىعىمەن وتكەن سەنات وتىرىسىندا سەناتور د.مۋسين «بۇگىنگى بيۋدجەتتى ناقتىلاۋ تۋرالى زاڭ جوباسىنىڭ باستى ەرەكشەلىگى – بيۋدجەتتىك شىعىنداردىڭ باسىمدىقتارىن قايتا قاراۋ ارقىلى، حالىقتى الەۋمەتتىك قولداۋدى كۇشەيتۋ بولىپ تابىلادى»، - دەدى.

وتىرىستا سەناتورلار 2019-2021 جىلدارعا ارنالعان بيۋدجەتتى ناقتىلاۋ تۋرالى زاڭ جوبالارىن قاراپ، تولىقتىرۋلار جاساپ، ماجىلىسكە قايتاردى.

تالقىلاۋ بارىسىندا دەپۋتاتتار ۇكىمەت مۇشەلەرىنە سۇراقتار قويىپ، وزدەرىنىڭ بىرقاتار سىن پىكىرلەرىن ايتتى.

«اۋىل – ەل بەسىگى» ارنايى جوباسىن ىسكە اسىرۋعا 2019-2021 جىلدارى 90 ملرد.تەڭگە كولەمىندە قارجى ءبولۋ تاپسىرىلعان.

وسى ورايدا سەناتور د.مۋسين جوبا شەڭبەرىندە حالىقتىڭ تىعىزدىعى، ينفراقۇرىلىمنىڭ جاعدايى، جاڭا جۇمىس ورىندارىن اشۋ مۇمكىندىگى مول 1781 ەلدى مەكەن ىرىكتەلگەنمەن وسى جوبانى ىسكە اسىرۋعا باعىتتالعان ۇيىمداستىرۋ شارالارى جانە ايماقتىق ستاندارتتار جۇيەسىن ازىرلەۋ جۇمىستارىنىڭ بۇگىنگە دەيىن اياقتالماعانىن سىنعا الدى.

«بۇل كەمشىلىكتەر جاقىندا پارلامەنت ماجىلىسىندە اوك-ءىن دامىتۋ بويىنشا زاڭ جوباسىن تالقىلاۋ بارىسىندا دا ايتىلىپ ءوتتى. بۇگىنگى كۇنگى «اۋىل – ەل بەسىگى» اتتى ارنايى جوباسى قر پرەزيدەنتىنىڭ جارلىعىمەن بەكىتىلگەن «اۋىلدىق اۋماقتاردى دامىتۋدىڭ 2004 – 2010 جىلدارعا ارنالعان مەملەكەتتىك باعدارلامانىڭ» ۋاقىت تالابىنا ساي جالعاسى رەتىندە ساناۋعا بولادى.

سونداي-اق، وتكەن جىلى قر-ڭ اوك-ءىن دامىتۋعا جانە وڭىرلەردى دامىتۋعا ارنالعان ەكى ماڭىزدى مەملەكەتتىك باعدارلامالار قابىلدانعانى ءمالىم.

وسى ورايدا، اتالعان باعدارلامالاردىڭ شەڭبەرىندەگى ماقساتتار مەن مىندەتتەردىڭ ورىندالۋىنا جاۋاپتى مەملەكەتتىك ورگاندار بيۋدجەتتەن باعىتتالىپ وتىرعان قىرۋار قارجىنى ەڭ الدىمەن «تىرەك» اۋىلدىق ەلدى مەكەندەر مەن دامۋ الەۋەتى جوعارى اۋىلداردىڭ ينفراقۇرىلىمدارىن دامىتۋعا ءتيىمدى تۇردە يگەرگەندەرى ءجون دەپ سانايمىن» ، - دەدى سەناتور.

سونداي-اق، د.ءمۋسيننىڭ ايتۋىنشا، جالپى العاندا، مەملەكەت تاراپىنان اۋىلدىق اۋماقتاردى دامىتۋ بويىنشا قابىلدانعان باعدارلامالار جەتكىلىكتى، الايدا ولاردى حالىق يگىلىگىنە ىسكە اسىرۋ بويىنشا جۇيەلى جۇمىستاردى جۇرگىزەتىن جاۋاپتى جانە ۇيلەستىرۋشى ناقتى مەملەكەتتىك ورگاندى انىقتاۋ قاجەت.

«سونىمەن قاتار، اگروونەركاسىپتىك كەشەندى مەملەكەتتىك قولداۋدىڭ بارلىق شارالارى جانە اۋىلدىق اۋماقتاردى دامىتۋدىڭ سەكتورارالىق باعدارلامالارىن بىرىكتىرۋدى كوزدەيتىن «اۋىل – ەل بەسىگى»  اتتى ارنايى جوباسىن جۇزەگە اسىرۋدىڭ بىرىڭعاي ساياساتى ايقىندالۋى ءتيىس دەپ ويلايمىز.

اتالعان شارا اۋىلدىق ايماقتاردى باسقارۋدا ۆەدومستۆوارالىق بىتىراڭقىلىقتى ەڭسەرۋگە، سونداي-اق، ورتالىق جانە جەرگىلىكتى اتقارۋشى ورگاندار، ۇكىمەتتىك ەمەس ۇيىمدار مەن بيزنەستىڭ اراسىنداعى ۇيلەسىمدى كۇشەيتۋگە ءوز اسەرىن تيگىزەرى ءسوزسىز»،- دەدى سەناتور د.مۋسين.

ادىلبەك قابا

Abai.kz

 

6 پىكىر