كوزىندە وت، جۇرەگى جالىنداپ تۇراتىن كەشەگى شوقتىعى بيىك جىگىتتەر مەن اياۋلى قىزدارىمىزدىڭ بۇگىنگى بەينەسى كوز قۋانتارلىق ەمەس. تۇنىپ تۇرعان - يلليۋزيا. وزگەنىڭ باقىتى. قىزىعا، قىزعانا باسىلعان امال جوقتىقتىڭ لايكتارى. اراگىدىك ءوزىن سالىستىرۋ، تومەندەتۋ، جەك كورۋ سەزىمدەرى بايقالادى. مۇڭلىقتىڭ جاسىن توگىپ اتا-انالارىن كىنالاي جونەلەدى. وتباسىلىق بىتىسپەس كونفليكت. شەتى، شەگى جوق ماسەلە.

“Instagram” دەگەن ورمەكشىنىڭ تورىندامىز. 20 مينۋت بۇرىن عانا دەپرەسسيانىڭ قۇرساۋىندا وتىرعان جاس قىز، باقىتتى قالىپتى سەلفي جاساپ، 40 مينۋت فيلتراتسيامەن وڭدەپ، Instagram-عا جىبەرۋ فۋنكتسياسىن باسىپ قالدى. 12 سەكۋند ءوتتى. كەلىپ تۇسكەنى نەبارى 3 لايك. “ادەمىسىڭ”-دەگەن پىكىر قالدىرىپتى، ءبىر جازىلۋشى. قىزدىڭ كوڭىل-كۇيى ءاپ ساتتە وزگەرىپ سالا بەردى. ەندى ءومىر سۇرۋگە بولاتىن سياقتى.

بايقاعان بولارسىز. ميلليونداعان “Instagram” قولدانۋشىسىندا ءدال وسى رەفلەكس. پسيحيكالىق اۋىتقۋ سالدارىنان مىڭداعان جۇرەك سوعۋىن توقتاتىپ، قىرشىن جانىنان قيىلدى. ءسوزىمىزدى دايەكتەپ وتسەك. تۇتىنۋشىلار الەۋمەتتىك جەلىلەردىڭ ىشىندە ادامنىڭ جۇيكە-جۇيەسىنە كەرى اسەرى جاعىنان Instagram-دى ەڭ ناشار جەلى دەپ باعالادى. ۇلىبريتانيا عالىمدارى ارنايى ۇيىمداستىرىلعان ساراپتاما ناتيجەسىنەن كەيىن وسىنداي قورىتىندىعا كەلدى.

كورولدىك دەنساۋلىق ساقتاۋ قوعامىنىڭ زەرتتەۋ جۇمىسىنا 14 پەن 24 جاس ارالىعىندا 1479 ادام قاتىسقان. ولار ەڭ تانىمال بەس الەۋمەتتىك جەلىگە ءوز پايدالانۋشىلارىنا كەلتىرەتىن زيانى بويىنشا باعا بەرۋلەرى كەرەك بولاتىن. “ادام دەنساۋلىعى مەن حال-احۋالىنا اسەرى جاعىنان Instagram مەن Snapchat-تىڭ كوش باستاپ تۇرۋى، وكىنىشتى جاعداي. ەكى پلاتفورما دا فوتوسۋرەتكە نەگىزدەلگەن. بالكىم، بار ماسەلە دە سوندا شىعار. ولار وزگەنىڭ سۋرەتتەرىن، دەنە ءبىتىمىن كورىپ، وزدەرىن ۇسقىنسىز ساناپ، ىشتەي كۇيزەلىسكە ۇشىرايتىن بولار” - دەيدى كورولدىك دەنساۋلىق ساقتاۋ قوعامىنىڭ باسشىسى شيرلي كرامەر.

كورولدىك قوعام، سونداي-اق، الەۋمەتتىك جەلى جاساۋشىلارىن، تۇتىنۋشىلارىن رەسۋرستىڭ قىزمەتىن شەكتەن تىس پايدالانىپ جاتقانى جونىندە ەسكەرتىپ وتىرۋدى ۇسىندى.

وزىڭدە بارمەن كوزگە ۇرىپ،

ارتىلام دەمە وزگەدەن.

كۇندەستىگىن قوزدىرىپ،

ازاپقا قالما ەزبەدەن.

اباي اتامىز، شاماسى تەگىن ايتپاعان. بۇل جالعاندا سىزدە بار دۇنيە وزگەدە جوق بولۋى مۇمكىن. وزگەدە بار دۇنيە سىزدە جوق. سالىستىرۋدىڭ قاجەتى شامالى. بار دەگەن باتپان عوي. جىلتىراقتىڭ ءبارى “جاۋھار” ەمەس. جىلتىراماعاننىڭ ءبارى “جىرتىق” ەمەس. ءار ادام وزىنشە “ۇلى”. جۇرەگىڭىزگە سۇڭگىپ، ءتۇبىن كوزدەسەڭىز ءوز “مەنىڭىزدى” تاباتىنىڭىز ءشۇباسىز. ەگويستىڭ “مەنى” ەمەس. جاقسىلىققا جانى جاقىننىڭ “مەنى”.

كوزىڭىزدى جۇمىڭىز. ۇيالى تەلەفوندى كوزدەن تاسا جەرگە ءبىرشاما ۋاقىتقا تاستاڭىز. ءسوزسىز ءومىرىڭىزدىڭ ارناسى دۇرىس باعىتقا قاراي ىعىسادى. ءسىزدى ۇلى قىلاتىن ينستاگرام جەلىسىندەگى جاساندى سۋرەتتەر ەمەس، ءسىزدىڭ لايىقتى ءىس-ارەكەتىڭىز ەكەنىن ۇمىتپاعايسىز.

سايانا سەيىتقوجا

Abai.kz