بۇگىن قازاقستاننىڭ ورتالىق سايلاۋ كوميسسياسى پرەزيدەنتتىككە ۇمىتكەر رەتىندە مەملەكەتتىك ءتىل ەمتيحانىنان وتكەن جەتى ادامدى رەسمي تۇردە تىركەۋدى اياقتادى. پرەزيدەنتتىككە ۇمىتكەر كۋالىگىن 7 ادام الدى.

وسىعان دەيىن وسك-عا قۇجات تاپسىرعان توعىز ادام بولدى. تالعات ەرعاليەۆ ءوز ەركىمەن باس تارتتى. ال جۇماتاي اليەۆ قازاق ءتىلىن ەركىن مەڭگەرمەگەندىكتەن سايلاۋالدى دوداعا جىبەرىلگەن جوق.

ءارى قاراي پوتەنتسيالدى ۇمىتكەرلەرگە قول جيناۋ پاراقشالارى تابىستىلعان ەدى. تالاپ بويىنشا ءاربىر ازامات ەلەكتوراتتىڭ 1 پايىز داۋىسىن نەمەسە 118 140 ادامنىڭ قولىن جيناپ كەلۋى ءتيىس بولعان.

جارىس جولىندا قالعان جەتىلىك بۇل تالاپتىڭ شارتىن دا تولىق ورىندادى. ءسويتىپ بۇل جەتىلىك وسك-دان كانديدات كۋالىگىن الدى.

كىم قانشا قول جينادى؟ كورىڭىزدەر، وسك-نىڭ كانديداتتاردى تىركەۋ حرونولوگياسى تومەندەگىدەي بولدى.

2019 جىل. 2 مامىر. ورتالىق سايلاۋ كوميسسياسى پرەزيدەنتتىككە ۇمىتكەر رەتىندە ۇسىنىلعان جۇماتاي اليەۆتى تىركەۋدەن باس تارتتى. ول مەملەكەتتىك ءتىل ەمتيحانىنان وتە المادى.

2019 جىل. 3 مامىر. وسك پرەزيدەنتتىككە ۇمىتكەر رەتىندە قاسىم-جومارت توقاەۆتى تىركەدى. ول قازاقستاننىڭ 17 وڭىرىنەن 315 910 ازاماتتىڭ قولىن جيناپ كەلگەن. وسك جينالعان قولدىڭ 2 257-ءسىن جارامسىز ەتىپ، 313 653-ءىن جارامدى دەپ تانىدى. ال كانديدات كۋالىگى توقاەۆتىڭ سەنىمدى وكىلى ماۋلەن اشىمباەۆقا تابىستالدى.

2019 جىل. 3 مامىر. وسك پرەزيدەنتتىككە ۇمىتكەر سادىبەك تۇگەلدى رەسمي تىركەدى. ول قازاقستاننىڭ 15 وڭىرىنەن 122 102 ازاماتتىڭ قولىن جيناپ كەلگەن. ال وسك 120 175-ءىن راس دەپ تانىدى. ايتپاقشى، سادىبەك تۇگەل مەملەكەتتىك ءتىل ەمتيحانىنىڭ جازباشا جۇمىسىندا پۋنكتۋاتسيالىق قاتەلەر جىبەرگەن.

2019 جىل. 4 مامىر. وسك پرەزيدەنتتىككە ۇمىتكەر رەتىندە امانگەلدى تاسپيحوۆتى تىركەدى. ول قازاقستاننىڭ 15 وڭىرىنەن 122 770 ازاماتتىڭ قولىن جيناپ كەلگەن. وسك جينالعان قولداردىڭ 119 577-ءىن راس دەپ تانىدى. ايتا كەتەيىك، امانگەلدى تاسپيحوۆ الماتى جانە شىمكەنت قالالارىنان قول جيناعان جوق.

2019 جىل. 4 مامىر. ورتالىق سايلاۋ كوميسسياسى پرەزيدەنتتىككە ۇمىتكەر رەتىندە دانيا ەسپاەۆانى تىركەدى. ول قازاقستاننىڭ 17 وڭىرىنەن 144 098 ازاماتتىڭ قولىن جيناعان. وسك ولاردىڭ 139 541-ءىن راس دەپ تانىدى.

2019 جىل. 6 مامىر. وسك پرەزيدەنتتىككە ۇمىتكەر رەتىندە تولەۋتاي راقىمبەكوۆتى تىركەدى. ول قازاقستاننىڭ 15 وڭىرىنەن 122 309 ازاماتتىڭ قولىن جيناپ كەلگەن. وسك ولاردىڭ 120 754-ءىن راس دەپ تانىدى.

2019 جىل. 6 مامىر. وسك پرەزيدەنتتىككە ۇمىتكەر رەتىندە جامبىل احمەتبەكوۆتى رەسمي تىركەدى. ول قازاقستاننىڭ 16 وڭىرىنەن 138 294 ازاماتتىڭ قولىن جيناپ كەلگەن. وسك ولاردىڭ 135 506-ىن راس دەپ تانىدى.

2019 جىل. 6 مامىر. ورتالىق سايلاۋ كوميسسياسى پرەزيدەنتتىككە ۇمىتكەر رەتىندە ءامىرجان قوسانوۆتى رەسمي تىركەدى. ول قازاقستاننىڭ 14 وڭىرىنەن 131 189 ازاماتتىڭ قولىن جيناپ كەلگەن. وسك ولاردىڭ 129 582-ءىن راس دەپ تانىدى.

قازىرگى ۋاقتاعى وسك راس دەپ تانىعان قولدار بويىنشا رەيتينگتى پرەزيدەنت مىنەدەتىن اتقارۋشى، پرەزيدەنتتىككە ۇمىتكەر قاسىم-جومارت توقاەۆ باستاپ تۇر. سەنسەڭىز دە، سەنبەسەڭىز دە ساندار سولاي سويلەيدى.

1. قاسىم-جومارت توقاەۆ – 313 653,

2. دانيا ەسپاەۆا – 139 541,

3. جامبىل احمەتبەكوۆ – 135 506,

4. ءامىرجان قوسانوۆ – 129 582,

5. تولەۋتاي راقىمبەكوۆ – 120 754,

6. سادىبەك تۇگەل – 120 175,

7. امانگەلدى تاسپيحوۆ – 119 577.

ەندى 11 مامىردان باستاپ پرەزيدەنتتىككە رەسمي تىركەلگەن ۇمىتكەرلەردىڭ ۇگىت-ناسيحات جۇمىستارى باستالادى. ازىرگە كوش باستاعان ءۇشتىڭ – قاسىم-جومارت توقاەۆ، دانيا ەسپاەۆا جانە جامبىل احمەتبەكوۆ.  ال حالىقتىڭ ەرەكشە ىقىلاسىنداعى ءامىرجان قوسانوۆ ءتورتىنشى ساتىدا. بۇل ارينە، سوڭعى سان، اقتىق ەسەپ ەمەس.

ەستەرىڭىزگە سالا كەتەيىك، قازاقستاندا كەزەكتى رەت وتەتىن كەزەكتەن تىس پرەزيدەنتتىك سايلاۋ 9 ماۋسىمعا بەلگىلەنگەن.

نۇرگەلدى ابدىعانيۇلى

Abai.kz