اللا ءوزى كەشىرسىن، بىراق عاسىرلار بويى بىرەسە پاتشالىق، بىرەسە كەڭەستىك رەسەيدىڭ تابانى استىندا ءتىل جانە ءدىن دەپ اتالاتىن قوس كيەلىسى  تالاپايعا تۇسكەن قازاقتى قورلىقتىڭ نەشە اتاسىن كورسە دە شىداي بەرەتىن ۇلت پا دەپ قالامىن. ايتپەسە مىنا ءبىر عانا جاعداياتقا كوز سالىڭىزشى.

بۇگىندە كەشەگى كسرو قۇرامىندا بولعان رەسپۋبليكالاردىڭ قازاقستاننان باسقا بىردە-بىرىندە  رەسەيدىڭ پوليگونى جوق. ولار سەمەي پوليگونىنان قالىپ ويرانى شىققان كەڭ دالانى ايتپاعاندا تايسويعان، كاپۋستين يار، سارىشاعىن، ازعىر، ەمبى جانە بايقوڭىر عارىش ايلاعى.

قازاقستان بيلىگىنىڭ ايتۋىنشا بۇل جەرلەردى رەسەيگە پوليگون رەتىندە ارەنداعا بەرىپ وتىر ەكەنبىز. قازاقستان قازىر 86 مىڭ شارشى كيلومەتر جەردى رەسەيگە پوليگوندىققا بەرىپ قويدى. سونىڭ بارىنە اقى تولەپ جاتىر ما، تولەسە نەمەن تولەپ جاتىر ول جاعى ءجاي قازاققا بەيمالىم. سول 86 مىڭ شارشى كيلومەتردەن استام جەرگە تولەنۋگە ءتيىستى 20 ملن-دى ەسەپتەپ كورسەك،  قازاقستان بيلىگى قازاق جەرىنىڭ ءبىر گەكتار جەرىن ورىس قاتىننىڭ جاقسى كورەتىن ءبىر شوكولادىنا ارەنداعا بەرىپ وتىر ەكەن.

ال وسى پوليگونداردىڭ زاردابىنان قازاقتىڭ دۇنيەگە ەندى كەلگەن سابيلەرىنىڭ كوپشىلىگى اۋرۋ-سىرقاۋ، مۇگەدەك، اقىل-ەسى كەمتار.

ايتپاقشى، وسىدان ءبىر-ەكى جىل بۇرىن رەسەيدىڭ جاڭاعى پوليگوندارى از بولعانداي قازاقستان بيلىگى قوستاناي وبلىسىنىڭ جانكەلدين اۋدانىنان 76 مىڭ  گەكتار جەردى رەسەي زىمىراندارىن قۇلاتۋعا بەردىك دەپ اشىقتان-اشىق ايتتى. سوندا ءار گەكتارعا 865 تەڭگەدەن ەسەپتەگەندە قازاقتىڭ 76 000 گەكتار جەرى ورىستارعا نەشە پليتكا شوكولادقا ساتىلىپ كەتكەن؟

نە توقاەۆ، نە ونىمەن باسەكەلەس بولىپ ءتۇسىپ جاتقان كانديداتتاردىڭ بىردە ء–بىرى بۇل تۋرالى ءتىس جارعان جوق. ال رەسەيدىڭ دە، قازاقستان بيلىگىنىڭ دە بۇل قورلىعىنا قازاقتان باسقا ەشبىر ۇلت توزبەيدى.

مىرزان كەنجەباي

Abai.kz