دۇيسەنبى, 16 قىركۇيەك 2019
46 - ءسوز 1895 10 پىكىر 5 ماۋسىم, 2019 ساعات 11:08

"الەۋمەتتىك جەلىدەگىلەر ديۆان باتىرلار" دەگەن ستەرەوتيپتەردەن كەتۋىمىز كەرەك

"ساياساتقا ارالاسپا", "سەن سونشالىقتى كىمسىڭ", ء"وز ءجونىڭدى ءبىل", "الەۋمەتتىك جەلىدەگىلەر ديۆان باتىرلار" دەگەن ستەرەوتيپتەردەن كەتۋىمىز كەرەك. مۇنى بىزگە بيلىك پەن بيلىكتىڭ سويىلىن سوققان بلوگەرلەر، وسى جۇيەنىڭ جالعاسقانىن قالايتىن ازاماتتار تىقپالاپ كەلەدى. بارلىق وركەنيەتتى ەلدەردە ازاماتتار ساياسي بەلسەندى، الەۋمەتتىك جەلىدە دە ءوز ويلارىن ەركىن بىلدىرەدى. ەگەر اقش پەن باتىس ەلدەرىندە باسقاشا بولسا مويىندار ەدىم ول جاقتا ازاماتتار ءپاسسيۆتى، ساياساتقا مۇلدەم ارالاسپايدى، الەۋمەتتىك جەلىدە ساياسات تۋرالى جازبايدى، تەك ەڭبەك ەتەدى دەپ. بىراق، ول وتىرىك! وركەنيەتتى ەلدەردە xالىق جۇمىسىن دا ىستەيدى، ساياساتتا دا بەلسەندى. ءتىپتى اقش پرەزيدەنتىنە دەيىن الەۋمەتتىك جەلىدە قالاي جۇمىس ىستەيتىنىن الەم جۇرتشىلىعى كورىپ وتىر. ترامپ سايلاۋعا تۇسكەندە ءدال وسى سمم-گە كوپ اقشا قۇيۋ ارقىلى جەڭىسكە جەتتى. كەشەگى سايلاۋدا ۋكراينا پرەزيدەنتى ۆولوديمير زەلەنسكي دە وسى الەۋمەتتىك جەلىگە كوپ قاراجات بولگەن.

بىزدە ءوز ويىڭدى ەركىن بىلدىرەر الەۋمەتتىك جەلىدەن وزگە پلاتفورما دا جوق. نە ساياسي پارتيا، نە پارلامەنت، نە ۇكىمەتتە باسەكە، وزگەشە وي ايتۋ دەگەن جوققا ءتان. كەشەگى 5 جىلدا ءبىر كەلەتىن كانديداتتار اراسىنداعى دەباتتى كوردىڭىزدەر. پرەزيدەنتتىككە كانديداتتاردىڭ ءسوز سويلەۋىنە 90 سەكۋندتان بەرگەن بيلىكتىڭ ءسوز بوستاندىعىنا، كرەاتيۆتى ويلار مەن سىندارعا دەگەن كوزقاراسىن وسىدان-اق تۇسىنە بەرۋگە بولادى. قازىرگى اۆتوريتارلى جۇيەگە قوعامنىڭ تىم-تىرىس جۇرە بەرگەنى جاقسى. "حابار" مەن "ەگەمەنگە" سەنگەن xالقى بولسا بىلگەنىن ىستەيتىن ەسكى جۇيەنىڭ جالعاسا بەرگەنىن قالايدى.

قازاقستان xالقى ساياساتقا بەلسەندى ارالاسۋ ارقىلى عانا بۇل جۇيەنىڭ بەي-بەرەكەت باسسىزدىعىن توقتاتا الادى. اۋەلى ەكونوميكا دەپ 30 جىلدا كەلگەن جەرىمىز وسى. ەندىگى كەزەك ساياسي رەفورمادا. ءبىزدىڭ بيلىك اشىق باسەكەگە شىعۋدان قورقادى. ەشقاشان، ەشكىممەن باسەكەگە تۇسپەسە دە جابىق ەسىكتىڭ ارعى جاعىندا وتىرىپ الىپ ءوزىن اقىلدى سانايتىن ەليتامىز بار. بۇل سەڭدى بۇزۋ ءۇشىن قازاقستان xالقىنىڭ ساياسي بەلسەندىلىگى، ازاماتتىق قوعام قۇرۋعا دەگەن ۇمتىلىسى قاجەت. سوندىقتان ساياساتتا بەلسەندى بولىڭىزدار! XXI عاسىردىڭ جاڭا مۇمكىندىكتەرىن بارىنشا قولدانىڭىزدار!

باۋىرجان سەرىكبايدىڭ facebook پاراقشاسىنان

Abai.kz

10 پىكىر