جۇما, 29 ناۋرىز 2024
ساياسات 13979 0 پىكىر 5 ماۋسىم, 2019 ساعات 15:29

سەناتورلار دەنساۋلىق ساقتاۋ سالاسىنىڭ ماسەلەلەرىن تالقىلادى

سەنات دەپۋتاتتارى سەرىك بەكتۇرعانوۆ پەن مۇرات باقتيارۇلى ەلىمىزدىڭ دەنساۋلىق ساقتاۋ سالاسىنداعى ماماندار قورىن باسقارۋ، سالاارالىق ۇيلەستىرۋ مەن دارىگەرلىك جانە فارماتسەۆتيكالىق ءبىلىم بەرۋ سالاسىنداعى مەملەكەتتىك باسقارۋ ماسەلەلەرى بويىنشا دەنساۋلىق ساقتاۋ مينيسترلىگىنىڭ وكىلدەرىمەن كەزدەستى.

مينيسترلىكتىڭ عىلىم جانە ادام رەسۋرستارى دەپارتامەنتىنىڭ ديرەكتورى ساۋلە سىدىقوۆا سالانىڭ احۋالى تۋرالى سەناتورلاردى حاباردار ەتتى. دەپارتامەنت ديرەكتورى ايتقان ستاتيستيكالىق دەرەكتەرگە سايكەس، رەسپۋبليكادا 248 مىڭنان استام دارىگەر قىزمەتكەرلەر، ونىڭ ىشىندە دەنساۋلىق ساقتاۋ جۇيەسىندە 205 712 دارىگەر جۇمىس ىستەيدى. 10 مىڭ حالىققا شاققاندا دارىگەرلەر سانى (قازاقستاندا – 39,6, ەىدۇ ەلدەرىندە – 33) جانە ورتا ساناتتاعى مەديتسينا قىزمەتكەرلەرى (قازاقستاندا – 95,5, ەىدۇ ەلدەرىندە – 91) بولىپ وتىر. دارىگەرلىك مەكەمەلەر ماماندارمەن تۇراقتى تۇردە ءارى قاناعاتتانارلىق دەڭگەيدە قامتاماسىز ەتىلىپ كەلەدى.

بۇل رەتتە، قالالىق جانە اۋىلدىق جەرلەردى دارىگەر ماماندارمەن قامتاماسىز ەتۋدە ايىرماشىلىق ساقتالۋدا (قالادا – 10 مىڭ تۇرعىنعا 56,8, اۋىلدىق جەرلەردە – 10 مىڭ تۇرعىنعا 16,1 ماماننان كەلەدى).

بۇگىنگى كۇنى جۇمىسقا الىنباعان شتاتتىق ورىندار بويىنشا 2481,75 دارىگەر تاپشى بولىپ وتىر.

دەپارتامەنت باسشىسى مەديتسينالىق ءبىلىم بەرۋدى جاڭعىرتۋ اياسىندا دارىگەرلىك ۋنيۆەرسيتەتتەردى دامىتۋدىڭ 5 جىلعا ارنالعان ستراتەگيالىق جوسپارلارى جاسالعانىن، وندا وقىتۋ باعدارلامالارىن وزگەرتۋ جانە ستراتەگيالىق سەرىكتەستەر – شەتەلدىك جوعارى وقۋ ورىندارىمەن بىرلەسكەن ءبىلىم بەرۋ باعدارلاماسىن ەنگىزۋ، مەديتسينالىق جوعارى وقۋ ورىندارىنىڭ اكادەميالىق جانە باسقارۋ دەربەستىگىن كەڭەيتۋ، ۋنيۆەرسيتەتتىك كلينيكالاردى قۇرۋ، پروفەسسورلىق-وقىتۋشىلىق قۇرامنىڭ الەۋەتىن ارتتىرۋ كوزدەلگەنىن اتاپ ءوتتى.

ول ءبىلىم بەرۋ ۇدەرىستەرىنە رەزيدەنتۋرا تۇجىرىمداماسى، ەمدەۋدىڭ ەرتە بايلانىستارى، كلينيكالىق داعدىلاردى قاۋىپسىز ورتادا وقىتۋ، كوممۋنيكاتيۆتىك داعدىلارعا ۇيرەتۋ، ءبىلىم بەرۋدە عىلىمي كوزقاراستى دامىتۋ، وقىتۋدىڭ ينتەگراتسيالانعان تۇرلەرى، مەديتسيناداعى دالەلدى نەگىزدەر، ءبىلىم بەرۋ ۇيىمدارىنداعى مەنەدجمەنت ەنگىزىلگەنىن، ءبىلىم بەرۋ باعدارلامالارىن جەتىلدىرۋ مەن پروفەسسورلىق-وقىتۋشىلار قۇرامىنىڭ الەۋەتىن ارتتىرۋعا باسا نازار اۋدارىلعانىن حابارلادى.

«سونىمەن بىرگە، بىرقاتار ماسەلەلەر شەشىمىن تاپپاي وتىر. قازاقستاندا  بىرىڭعاي ۇلگى قالىپتاسقان، دەگەنمەن بولون پروتسەسىنىڭ تالاپتارىنا، حالىقارالىق تاجىريبەگە تولىق سايكەس كەلە قويعان جوق.

بۇگىنگى تاڭدا قازاقستان رەسپۋبليكاسى دەنساۋلىق ساقتاۋ مينيسترلىگى ەلىمىزدىڭ دەنساۋلىق ساقتاۋ جۇيەسىندە ادامي كاپيتالدى دامىتۋدىڭ 2025 جىلعا دەيىنگى تۇجىرىمدامالىق ادىستەردى بەكىتتى، ول دەنساۋلىق ساقتاۋ جۇيەسىندە كادر ساياساتىن جەتىلدىرۋدى جانە دەنساۋلىق ساقتاۋ قىزمەتكەرلەرىن دايارلاۋدىڭ جانە ۇزدىكسىز كاسىبي دامىتۋدىڭ جاڭا ساپاسىن قامتاماسىز ەتۋدى كوزدەيدى.

دەنساۋلىق ساقتاۋ جۇيەسىندە كادر ساياساتىن جەتىلدىرۋ جونىندەگى مىندەتتەردى ىسكە اسىرۋ اياسىندا سالالىق بىلىكتىلىك جۇيەسى جەتىلدىرىلەدى، دەنساۋلىق ساقتاۋدىڭ كادرلىق رەسۋرستارىن باسقارۋ تەتىكتەرى جاڭعىرتىلادى، دەنساۋلىق ساقتاۋدىڭ كادرلىق رەسۋرستارىن تالداۋ، بولجاۋ جانە مونيتورينگ جۇرگىزۋ ادىستەرى جەتىلدىرىلىپ، مەديتسينا قىزمەتكەرلەرىنىڭ تارتىمدى بەينەسى قالىپتاسادى، كاسىبىنىڭ بەدەلى ارتا تۇسەتىن بولادى. مامانداردى ساپالى دايارلاۋ مەن دەنساۋلىق ساقتاۋ جۇيەسى قىزمەتكەرلەرىنىڭ كاسىبي تۇردەگى ءۇزىلىسسىز دايارلىعىن قامتاماسىز ەتۋ جونىندەگى مىندەتتەر وسى سالا ماماندارىن دايارلاۋ تالاپتارىنا ساي حالىقارالىق ستاندارتتارىن ەنگىزۋدى، مەديتسينالىق ءبىلىمدى، عىلىم مەن ءىس جۇزىندەگى ەمدىك شارالاردى ينتەگراتسيالاۋدى كوزدەيدى»، - دەپ اتاپ ءوتتى س.سىدىقوۆا.

شاراعا نۇر-سۇلتان، الماتى، قاراعاندى جانە سەمەي مەديتسينالىق ۋنيۆەرسيتەتتەرىنىڭ رەكتورلارى دا قاتىسىپ، دەپۋتاتتاردىڭ سۇراقتارىنا جاۋاپ بەردى. دەپۋتاتتار وقۋ ورنىن بىتىرگەن تۇلەكتەردىڭ جىبەرىلگەن جەردەگى قىزمەتىن اتقارۋى ماسەلەسىن، تۇلەكتەردىڭ جالپىلاما ەمدەيتىن دارىگەر سەكىلدى جۇمىس ىستەي المايتىنىن سۇرادى، سونداي-اق دارىگەرلىك كوللەدجدەردە مەيىربيكەلەردى دايارلاۋ ساپاسىن قايتا قاراۋ ماسەلەسى دە كوتەرىلدى.  سىندارلى ۇنقاتىسۋ مەن پىكىر الماسۋ بولدى.

سەناتور مۇرات باقتيارۇلى شارانى قورىتىندىلاي كەلىپ پارلامەنت پەن بارلىق مۇددەلى ورگانداردىڭ بىرلەسكەن جۇمىسىن ودان ءارى جالعاستىرۋ ماڭىزدى دەپ سانايتىنىن جەتكىزدى.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1567
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2261
عيبىرات

قايسار رۋحتى عازيز جان

مۇحتار قۇل-مۇحاممەد 3544