انانىڭ كوڭىلى - بالادا

قازاقستان رەسپۋبليكاسى پرەزيدەنتىنىڭ جۇلدەسى ءۇشىن، وسىمەن ەكىنشى رەت گرەك-ريم كۇرەسىنىڭ جالاۋىن جەلبىرەتتىك. بيىلعى دودا ەلىمىز تاۋەلسىزدىگىنىڭ 20 جىلدىعىنا وراي ۇيىمداستىرىلعانى تۋرالى گازەتىمىزدىڭ وتكەن (21.06. 2011ج. №24) سانىندا ايتقان بولاتىنبىز. بايراقتى باسەكەدە ەلىمىزدىڭ باس كومانداسى مەن ۆەنگريا قۇراماسى شەشۋشى ايقاسقا شىقتى. سول تارتىستا باس جۇلدەنى ەلىمىزدىڭ قۇراماسى يەلەنگەن ەدى. بۇگىن بۇل تاقىرىپتى قايتا قوزعاۋعا تۋرا كەلىپ تۇر. نەگە دەپ ويلايتىن بولارسىزدار. جاۋابىن بىلگىڭىز كەلسە، اڭگىمەمىزگە قۇلاق ءتۇرىڭىز.

55 كەلىدە اسحات قۇدايبەرگەنوۆ ۆيرگيل مۋەنتاۋمەن كۇرەسىپ، قارسىلاسىنىڭ وسال تۇسىن تاۋىپ، ءوز كومانداسىن جەڭىسكە باستادى. ودان كەيىن 60 كەلىدە المات كەبىسباەۆ دياكوني ەسەبيوننان باسىمدىلىعىن تانىتىپ، ەسەپتى ەسەلەدى. ەسەپ 2:0, جەرلەستەرىمىزدىڭ پايداسىندا. 66 كەلىدە بەلدەسكەن دارحان باياحمەتوۆ وكىنىشكە قاراي، قارسىلاسىنا ەسە جىبەردى. 74 كەلى سال­ماقتاعى اسحات دىلمۇحامەدوۆ ەسەپتى ارتتىرعانىمەن، 84 كەلى سالماقتاعى ال­حازۋر وزديەۆ پەن 96 كەلىدەگى مار­عۇ­لان اسەمبەكوۆ ۇتىلىپ قالعاندا، زال تولى جانكۇيەردىڭ جانى مۇرىندارىنىڭ ۇشىنا كەلدى. ەسەپ 3:3.  ەندى بار اۋىرتپاشىلىق اسا اۋىر سالماقتاعى نۇرماحان تىناليەۆكە جۇكتەلدى. جانكۇيەر قاۋىم ورىندارىنان تۇرەگەلىپ كەتكەن.

انانىڭ كوڭىلى - بالادا

قازاقستان رەسپۋبليكاسى پرەزيدەنتىنىڭ جۇلدەسى ءۇشىن، وسىمەن ەكىنشى رەت گرەك-ريم كۇرەسىنىڭ جالاۋىن جەلبىرەتتىك. بيىلعى دودا ەلىمىز تاۋەلسىزدىگىنىڭ 20 جىلدىعىنا وراي ۇيىمداستىرىلعانى تۋرالى گازەتىمىزدىڭ وتكەن (21.06. 2011ج. №24) سانىندا ايتقان بولاتىنبىز. بايراقتى باسەكەدە ەلىمىزدىڭ باس كومانداسى مەن ۆەنگريا قۇراماسى شەشۋشى ايقاسقا شىقتى. سول تارتىستا باس جۇلدەنى ەلىمىزدىڭ قۇراماسى يەلەنگەن ەدى. بۇگىن بۇل تاقىرىپتى قايتا قوزعاۋعا تۋرا كەلىپ تۇر. نەگە دەپ ويلايتىن بولارسىزدار. جاۋابىن بىلگىڭىز كەلسە، اڭگىمەمىزگە قۇلاق ءتۇرىڭىز.

55 كەلىدە اسحات قۇدايبەرگەنوۆ ۆيرگيل مۋەنتاۋمەن كۇرەسىپ، قارسىلاسىنىڭ وسال تۇسىن تاۋىپ، ءوز كومانداسىن جەڭىسكە باستادى. ودان كەيىن 60 كەلىدە المات كەبىسباەۆ دياكوني ەسەبيوننان باسىمدىلىعىن تانىتىپ، ەسەپتى ەسەلەدى. ەسەپ 2:0, جەرلەستەرىمىزدىڭ پايداسىندا. 66 كەلىدە بەلدەسكەن دارحان باياحمەتوۆ وكىنىشكە قاراي، قارسىلاسىنا ەسە جىبەردى. 74 كەلى سال­ماقتاعى اسحات دىلمۇحامەدوۆ ەسەپتى ارتتىرعانىمەن، 84 كەلى سالماقتاعى ال­حازۋر وزديەۆ پەن 96 كەلىدەگى مار­عۇ­لان اسەمبەكوۆ ۇتىلىپ قالعاندا، زال تولى جانكۇيەردىڭ جانى مۇرىندارىنىڭ ۇشىنا كەلدى. ەسەپ 3:3.  ەندى بار اۋىرتپاشىلىق اسا اۋىر سالماقتاعى نۇرماحان تىناليەۆكە جۇكتەلدى. جانكۇيەر قاۋىم ورىندارىنان تۇرەگەلىپ كەتكەن.

بوز كىلەمنىڭ وكپە تۇسىندا «اينالايىن قۇلىنىم، اللا تاعالا قولداسىن! نۇرماحان! نۇرماحان! جانىم، قۇلىنىم!»، - دەپ، دەنەلى ءبىر ايەل ەلدەن ەرەك  ايعايلاپ تۇر. ءبىر ءسات ەلدىڭ نازارى سول كىسىگە اۋدى. ول كىسىنىڭ ەلمەن شارۋاسى جوق. باياعى اۋەنىمەن وڭەشەگى ۇزىلەردەي ايعايلايدى. ورنىنان ءبىر تۇرىپ، ءبىر وتىرادى. ءبىزدىڭ ءبىر كوزىمىز كىلەمدە، ەكىنشى كوزىمىز سول ايعايلاي-ايعايلاي تاماعى قارلىققان بەلگىسىز اپايىمىزدا. ىشىمنەن نۇماحاننىڭ تۋىسى بولار دەپ توپشىلادىم. تۋعان اناسى ەكەنىن كىم ويلاعان...

قاشاندا  شەشۋشى ساتتە ەل نامىسىن ابى­روي­مەن قورعاپ جۇرگەن نۇرماحان بۇل جولى دا قارسىلاسىنان ايلاسىن اسىرىپ، قازاقستان-1 قۇراماسى 4:3 ەسەبىمەن كۋبوك يەگەرى اتاندى. نۇماحان قارسىلاسىن الىپ ۇرعاندا اناسىنىڭ كوزىنەن جاس سورعالاپ تۇردى. قاراقۇرىم حالىقتىڭ اراسىندا نۇرماحاننىڭ اناسىمەن سويلەسۋ مۇمكىن بولمادى. بار مۇمكىندىگىمىز قالتا تەلەفونىنىڭ ءنومىرىن سۇراپ الىپ قالۋعا عانا جەتتى. جارىس شىمىلدىعى جابىلعاننان بىرنەشە كۇننەن كەيىن اسىقپاي تەلەفون ارقىلى تىلدەستىك.

- سالەمەتسىز بە؟ بۇل نۇرماحاننىڭ اناسى ما ەكەن؟

- ءيا، مەن نۇرماحاننىڭ اناسى بولامىن.

- سىزگە «قازاق سپورتى» گازەتىنەن حابارلاسىپ تۇر ەدىك. ءوزىڭىزدى قىسقاشا تانىستىرىپ كەتسەڭىز؟

- مەنىڭ اتى-ءجونىم تىناليەۆا جۇماگۇل رابجانقىزى.

- قازىر قاي جەردە تۇراسىزدار؟ ءوزىڭىز قانداي كاسىپپەن اينالىساسىز؟

- شۋ اۋدانى، تولە بي اۋىلىندا تۇرامىز. سول تولە بي اۋىلىندا بەكماحانوۆ اتىنداعى مەكتەپ-گيمنازياسىندا باستاۋىش سىنىپ مۇعالىمى بولىپ قىزمەت ىستەيمىن.

- جۇماگۇل اپاي، جارىستىڭ سوڭعى شەشۋشى ساتىندە پرەزيدەنت كۋبوگىن قازاق توپىراعىندا الىپ قالۋعا ءسىزدىڭ اسىل ۇلىڭىز نۇرماحان ەرەكشە ەڭبەك ءسىڭىردى. ءبىز ءسىزدى الىستان بايقاپ وتىردىق. ءسىز ورنىڭىزدان نەشە تۇرىپ، نەشە وتىردىڭىز، ءتىپتى كوزىڭىزگە جاس الىپ، جىلاپ تۇردىڭىز. ارينە، تولقىپ تۇرعانىڭىزدى تۇسىنەمىز. سول كەزدەگى ىشكى جان-دۇنيەڭىزدى ءوز اۋىزىڭىزدان ەستىسەك دەپ ەدىك؟

- مەن ول كەزدەگى كوڭىل-كۇيىمدى تىلمەن ايتىپ جەتكىزە المايمىن. ءوزىمدى-ءوزىم قالاي مەڭگەرىپ تۇرعانىمدى دا بىلمەيمىن. ادام ومىرىندە ءبىر قۋانىش پەن ءبىر قايعى قاتار جۇرەدى ەكەن. اللا تاعالا قۋانىشتان ايىرماسىن دەپ تىلەيمىن. ءبىرىنشى قۋانىشىمدى ايتايىن. ەل وتىرعان زالدا مەن دە وتىرمىن. قارسى جاق پەن ءبىزدىڭ بالۋاندار الما-كەزەك جەڭىسكە جەتىپ، ەسەپ 3:3 بولدى. ەندى ەڭ سوڭعى جۇپ، ول ارينە، اسا اۋىر سالماقتاعى جۇپ. مەنىڭ بويىم ءبىر ىسىپ، ءبىر سۋىپ بارادى. ەگەردە مەنىڭ «جامان» قۇلىنىم جەڭىپ جاتسا، كۋبوك ەلدە قالادى، جەڭىلسە جاتتىڭ الاقانىندا كەتكەلى تۇر. ۇلىم بوز كىلەمگە شىققاندا، اللادان تەك قانا دەمەۋ سۇرادىم. اللا تاعالا ۇلىمدى قولداپ، قارسىلاسىن تازا جەڭىسپەن جىعىپ، ەلىنە شاتتىق سىيلادى عوي. ماعان وسىدان ارتىق باقىت، وسىدان ارتىق شاتتىق جوق شىعار. ەلىنىڭ تۋىن جەلبىرەتىپ، ءانۇرانىن اسقاقتاتاتىن وسىنداي ۇلدىڭ اناسى بولعانىما باقىتتىمىن. ال ەكىنشى ايتايىن دەپ وتىرعان وكىنىشىم - ۇلىمنىڭ اكەسى ءتىرى بولعاندا عوي... (كوز جاسىن سىعىپ الدى). وسىندا اكەسىمەن قاتار ۇلىمىزدىڭ ەلىنە قۋانىش سىيلاعان ءساتىن ءوز كوزىمىزبەن كورگەندە عوي دەپ ويلاپ جىلاپ وتىردىم. ىشتەي قاتتى قايعىرامىن.

- اپاي، ول اللانىڭ باسىڭىزعا سالعان ءبىر سىناعى بولار. وعان بولا ءوزىڭىزدى شارشاتا بەرمەڭىز. نۇرماحانداي ۇلىڭىز بار. نۇرماحاننىڭ الار اسۋى الدا ەكەنىن ۇمىتپاڭىز. ەندى اللادان ۇلىڭىزدىڭ اماندىعىن تىلەي بەرىڭىز... الدا - لوندون وليمپياداسى...

- بالام، دۇرىس ايتاسىڭ. بىراق قانشا ويلامايىن دەسەڭ دە، ويلايدى ەكەنسىڭ. اكەسى بالالارىن تەك سپورتقا عانا تاربيەلەگەن جوق. ول نۇرماحانعا قازاقتىڭ بولمىسى قانداي، قانداي سالت-ءداستۇرى بار، قانداي ادەبيەتى، قانداي مادەنيەتى بار، سولاردىڭ بارلىعىن بويىنا ءسىڭىرىپ كەتتى. ەندى قىزىعىن كورەمىن دەپ جۇرگەندە اياق استىنان ومىردەن وزدى. مەن وتاعاسى اناربەكپەن قاتار جۇرگەندە قالاي ءومىر سۇرەمىن، بالالارىمدى قالاي باعىپ-قاعامىن  دەپ ويلاعان ەمەسپىن. ءبىر كۇندە ايىرىلىپ قالىپ، ەڭسەمدى ارەڭ كوتەردىم.

- ۇلىڭىزدىڭ كۇرەسىپ جاتقانىن بۇرىندارى دا وسىلاي ارنايى كەلىپ تاماشالايتىن با ەدىڭىز، الدە بۇل جولى ءبىرىنشى رەت كەلۋىڭىز بە؟

- تىكەلەي ءوز كوزىممەن ءبىرىنشى كەلىپ كورگەنىم وسى ەكەن.

- بالاڭىز مۇنان دا ۇلكەن تالاي ۇلكەن دودالاردا توپ جارىپ ءجۇر. ول كەزدە تەلەارنادان تاماشالايتىن بولارسىز؟

- ارينە، ۇلىم ءبىر ەلگە جارىسقا بارىپ، بۇگىن تەلەارنادان تاراتادى ەكەن دەگەن كۇنى ءتۇننىڭ ءبىر ۋاعىندا بولسا دا، ۇيىقتاماي وتىرىپ كورەمىن. بىراق كوپ جاعدايدا تەلەارنادان بۇرىن جەڭسە، جەڭدى دەپ جەڭىلسە، جەڭىلدى دەپ ەستىپ الامىز. سوسىن ارتىنان كورگەندە جايباراقات وتىرىپ كورە بەرەتىنبىز.

- ال بوز كىلەمنەن قول سوزىمنان قاراپ وتىرعان قالاي بولادى ەكەن؟

- وتە اۋىر بولادى ەكەن. ۇلىما قانشا جەردەن سەنىپ تۇرسام دا، ءبىر ءۇمىت پەن ءبىر كۇدىك بويىڭدى جەلدەي ءتىنتىپ، جۇرەگىڭدى جۇلقىلاپ، ءبىر ورىنعا تۇراقتاپ وتىرا المايدى ەكەنسىڭ. بالام بوز كىلەمگە شىعاردا دالاعا دا شىعىپ كەتكىم كەلدى. قاراپ، كورۋگە شىدامىم جەتپەي تۇرعاندا بالام كاسىما ارنايى كەلىپ: «اناشىم، ەشتەڭەدەن الاڭداماڭىز. قورىقپاڭىز. مەن ءوز ەلىمدە، ءوز جەرىمدە، ءوزىمىزدىڭ بوز كىلەمدە بەلدەسەيىن دەپ جاتىرمىن. ءسىزدىڭ ءۇمىتىڭىز ەلدىڭ ءۇمىتى عوي. تەك قانا سەنىممەن وتىرىپ، ۇلىڭىزدىڭ قارسىلاسىن كوتەرىپ لاقتىرعانىن تاماشالاڭىز. سىزگە اكەم كورسەتە الماعان قىزىقتى مەن كورسەتەمىن. تەك قانا تىلەۋىمدى تىلەپ وتىرا بەرىڭىز، اكەمنىڭ كەتكەنى دە جەتەدى، اناشىم ەندى ءسىز امان بولىڭىز»، - دەپ، كوڭىلىندە ەشقانداي قورقىنىش ۇرەي دە، قىسىلۋ دا جوق، جاي ءبىر سىرالعى قۇربىسىمەن ويناپ كۇرەسەتىندەي، سابىرلى قالپىمەن بەتىمنەن ءسۇيىپ الدى دا، كىلەمگە قاراي كەتىپ قالدى. سول ساتتە مەنىڭ بويىمداعى ۇرەي دە،  قورقىنىش تا سۋ سەپكەندەي باسىلدى دا قالدى. دەگەنمەن، كىلەمگە   نۇرماحاندى شاقىرىپ جاتقاندا ۇلىمدى ومىرگە اكەلگەندە قالاي تولعاتسام، سول ساتتە دە سولاي تولعاتىپ تۇردىم.

- ءبىز ءسىزدىڭ بالاڭىزدىڭ رەسەيدە جاتتىعاتىنىن جاقسى بىلەمىز. ۇيگە نەشە ايدا ءبىر كەلىپ تۇرادى؟

- مىنە، وتكەن جارىستان كەيىن تاعى دا كەتىپ قالدى، جىلىنا بالامدى ساعىنىپ، سارعايىپ ءجۇرىپ ەكى-اق رەت كورەمىن. بالانىڭ كوڭىلى دالادا، انانىڭ كوڭىلى بالادا دەيدى عوي. انانىڭ جۇرەگى - الەمنىڭ جۇرەگى ەكەنىن بىلەسىڭدەر. اعارتۋشىلىقپەن اينالىسىپ، قولىمىزعا قالامساپ الىپ جۇرگەننەن كەيىن ۇلىمدى الىستا جۇرگەندە ساعىنىپ «بالاما» دەگەن ولەڭ جازعان ەدىم.  سول ولەڭىمدى وقىپ بەرسەم بولا ما؟

- مىندەتتى تۇردە، وقىپ بەرىڭىزشى...

دارا تۋعان اسىلىم،

جاپىراقتاي جاسىلىم،

قايدا جۇرسەڭ، امان بول،

ونەرىڭە ءسۇيسىنىپ،

داريا كولدەي تاسىدىم، - دەپ جازىپ، ارنايى ءوزىنىڭ جەكە ەلەكتروندى پوشتاسىنا سالدىم. سول كەزدە بالام ۆەنگريادا جۇرگەن كەزى بولاتىن. بالام ولەڭىمدى وقىپ، جىلاپ تۇرىپ: «اناشىم، ءسىز مەنى ەلدەن ەرەك ءىرى عىپ تۋدىڭىز. ءومىر ماعان وسى جولدى تاڭداۋدى ءناسىپ ەتتى. بۇل ءومىر عوي. ساعىنعانىڭىزدى بىلەمىن. مەن دە ءسىزدى قاتتى ساعىنىپ ءجۇرمىن»، - دەپ قوڭىراۋ شالدى. سوسىن بالام ماعان: «اناشىم، مەن دە سىزگە ارناپ «اناما» دەگەن ولەڭ جازىپ، حات جىبەرەمىن»، - دەدى. مىناۋ بالامنىڭ ماعان جازىپ جىبەرگەن «اناما» دەگەن ولەڭى:

جان انام، جان انام، جان انا،

بۇل ومىردە سىزدەن اسقان جان بار ما؟

پايعامبار دا انادان جارالعان عوي،

اناسىن سىيلاعان ادامنىڭ جانى ءجانناتتا عوي, - دەپ جازىپ جىبەرىپتى. مەن بالامنىڭ وسى ءتورت جول ولەڭىن جۇرەگىمنىڭ ەڭ تۇكپىرىندە ساقتاپ ءجۇرمىن.

- اپاي، ءسىزدىڭ بويىڭىزدا دا، بالاڭىزدا دا اقىندىق ونەر بار ەكەن. بالاڭىزدىڭ تاعى قانداي ەرەكشەلىكتەرىن ايتار ەدىڭىز؟

- نۇرماحاننىڭ ءبىر ەرەكشەلىگى - كىشكەنە بالالارمەن اڭگىمەلەسسە، كىشكەنە بالاشا سويلەسەدى. ءتىپتى، بالامەن بىرگە بالا بولىپ وينايدى. ءوز قاتارلاستارىمەن جىگىت سياقتى سويلەسەدى. ال ۇلكەن ادامدارمەن كادىمگى ءبىر جارتى عاسىردى ارتىنا سالىپ تاستاعانداي، تەرەڭ-تەرەڭ اڭگىمەلەر ايتادى. بوس ۋاقىتىندا اتقا ءمىنىپ، سەرۋەندەگەندى جاقسى كورەدى.

- نۇرماحان نەشىنشى ۇلىڭىز؟

- ەكىنشى ۇلىم. نۇرماحاننىڭ الدىندا 1985 جىلعى نۇرلان دەگەن اعاسى بار. نۇرماحاننان كەيىن قاجىمۇقان دەگەن ءىنىسى بار. قىز بالام بولمادى. وسى ءۇش ۇلىمدى ءوسىرىپ، جەتكىزدىك. سول ءۇشىن ءوزىمدى باقىتتى سانايمىن.

- نۇرماحاننىڭ اعاسى مەن ءىنىسى كۇرەسكە بارمادى ما؟

- اكەلەرى اناربەكتىڭ ءوزى دە سپورتشى بولعان. اكەلەرى العاشىندا اعاسى نۇرلان مەن نۇرماحاندى بىرگە جاتتىقتىرعان بولاتىن. ءبىر كۇنى بالالاردىڭ اكەسى ماعان: «مەن دە ءىرىمىن، سەن دە ءىرىسىڭ. بىزدەن تۋعان بالالار بىزدەن دە ءىرى بولاتىنىنا سەنەمىن. نۇرماحان دا، نۇرلان دا العاشقى جارىستارىنان جەتىستىكتەرگە جەتە باستادى. كەيىن ەكەۋى اۋىر سالماقتا بەتپە-بەت كەلىپ قالىپ، ەكى ۇلدىڭ اراسىندا ءبىر تۇسىنىسپەۋشىلىك بولىپ قالا ما دەپ قورقامىن.  نۇرلاننىڭ جاسى ۇلكەن عوي. نۇرلاننىڭ باسىن قۇراپ، سپورتتان الىپ شىعايىق. نۇرماحان بولسا، جاس قوي، ءومىرى الدا. وسى ەكى ۇلكەن ۇلدىڭ بىرەۋى كۇرەسسە دە جەتەدى»، - دەپ ءۋاج ايتقاندا ەشتەڭە تۇسىنبەگەن ەدىم. قاىر ويلاسام، بۇل اكەسىنىڭ ۇلكەن ساياساتى ەكەن. ءبىر جاعىنان ول كەزدە كىشىمىز وتە كىشكەنتاي بولدى دا، اكەسىنە كومەكتەسەتىن ەشكىم بولمادى. ەكەۋى دە جاتتىعۋعا كەتەدى. ول كەزدە قولدا ءبىراز مال دا بار بولاتىن. مالعا قاراۋ كەرەك بولدى. نەمەرە سۇيگىمىز كەلدى. سونىمەن، نە كەرەك، نۇرلاندى ۇيلەندىردىك. قازىر ايگەرىم ەسىمدى كەلىنىم، اباي، كاۋسار دەگەن ەكى نەمەرەم بار. ال نۇرماحان وسى گرەك-ريم كۇرەسىمەن ءبىرجولا كەتتى. وعان ەشقايسىمىز دا كەدەرگى بولعان جوقپىز. قازىر شەتەلدە جاتتىعۋىنىڭ سەبەبى ەلىمىزدە ونىمەن تىرەسەتىن ادام جوق. اكەسى وسىلاي بولارىن ەرتە سەزگەن ەكەن عوي.

- جاڭا قاجىمۇقان دەگەن تاعى ءبىر ءىنىسى بار دەپ ايتتىڭىز. ءوزى سۇتكەنجەڭىز ەكەن. ءارى بالۋان اتامىزدىڭ ەسىمىن بەرىپسىزدەر. ول بالاڭىز قانشا جاستا، نەمەن اينالىسىپ ءجۇر؟

- قاجىمۇقان دەگەن كەنجە ۇلىم 1995 جىلى تۋعان. قازىر مەكتەپ جاسىندا. 9-سىنىپتى جاڭا ءبىتىرىپ جاتىر. ول دا ءىرى دەنەلى بولىپ ءوسىپ كەلەدى. قازىردىڭ وزىندە 75 كەلى تارتادى. قاجىمۇقاندى قازىر ءوزى سىرتتا جۇرسە دە، اعاسى نۇرماحان تاربيەلەپ جاتىر. تاماعى دا، كيىمى دە سول اعاسىنىڭ مويىنىندا.

- نۇرماحان قازىرگى تاڭدا ەل نامىسىن قورعاپ كوبىنە جاتتىعۋ- جارىستاردان بوسامايدى. بالاڭىزعا لايىقتى كەلىن قاراستىرىپ جۇرگەن بولارسىز؟

- اركىمنىڭ ءوزىنىڭ قالاۋىمەن بولعان ىستە عانا ءونىم بولادى عوي. نۇرماحان 1988 جىلعى. ول جيىرمادان اسسا دا ماعان ءالى بالا. كەلىن تۋرالى مەن دە اۋىز اشقان ەمەسپىن، نۇرماحان دا مەن كەلىن تاۋىپ قويدىم دەپ ايتقان ەمەس. قازىرگى بار ارمان-ماقساتى - لوندون وليمپياداسىنا بارىپ، ەل قورجىنىنا ءبىر مەدال سالسام دەپ ءجۇر. مەنىڭ دە كۇتكەنىم سول. لوندون وليمپياداسىنان ءبىر التىن اپەرسە، مەنىڭ دە ارمانىم جوق. لوندونعا بارىپ كەلگەن سوڭ ۇيلەنۋ ماسەلەسىن بىراق قاراستىرامىز. ماعان قازىر كەلىن ەمەس، ۇلىمنىڭ ەلىنىڭ كوك تۋىن لوندوندا  جەلبىرەتكەنى قىمبات بولىپ تۇر. ۇلىم ءالى جاس. كەلىن تابىلادى. وسى ورايدا ۇلىمنىڭ ويداعىداي جاتتىعۋ جاساۋىنا ءبىر كىسىلىك ۇلەس قوسىپ جۇرگەن داۋلەت تۇرلىقانوۆقا، ءىنىسى مارات تۇرلىقانوۆقا جانە باپتاپ جاتقان باسقا دا باپكەرلەرىنە   العىس ايتقىم كەلەدى.

- اڭگىمەڭىزگە كوپ-كوپ راحمەت! ءاردايىم وسىلاي قۋانىپ جۇرە بەرىڭىز.

كۇنسۇلتان وتارباي.

«قازاق سپورتى» گازەتى