ەگەر پرەزيدەنت قاسىم-جومارت توقاەۆ ەلىمىزدىڭ رۋحاني تۇتاستىعىنا ۇلكەن قاۋىپ ءتوندىرىپ تۇرعان بىردەن-ءبىر قاتەرلى ماسەلە "ۇشتىلدىلىك" جوباسىنا توقتاۋ سالىپ، قازاق مەكتەپتەرىن "ۇشتىلدىلىك" اتىمەن جويىلۋ جولىنان قۇتقاراتىن بولسا، وندا ول كىسى ساياسي تۇلعا رەتىندە قازاق قوعامىنىڭ قولداۋ تاۋىپ، سەنىمىنە يە بولۋى مۇمكىن. سوندىقتان وسى مۇمكىندىكتى جىبەرىپ الماۋى قاجەت. ول ءۇشىن نە ىستەۋ كەرەك؟

مەكتەپتەرگە "ۇشتىلدىلىك" ەنگىزۋى جوباسىن توقتاتىپ، ول ماسەلەنى قوعامنىڭ كەڭ تالقىسىنا سالۋى كەرەك، وسىعان قاتىستى ءبىلىم بەرۋ باعدارلامالارىن عالىمداردىڭ بىرنەشە ساتىلى ساراپاتاماسىنان جان-جاقتى وتكىزۋلەرى كەرەك. قايتكەن كۇندە دە بۇل ماسەلەنى قازاق قوعامى الداعى ۋاقىتتا جايدان-جاي قويمايدى! ال ءبىلىم جانە عىلىم مينيسترلىگىندە بۇل ماسەلەگە تەك قاتارداعى ورىنداۋشى سيپاتىنداعى عانا ەمەس، كادىمگىدەي ءبىلىمى مەن ورەسى جەتەتىندەي بىلىكتى ماماندارى بولۋى ءتيىس. ويتكەنى بۇل ماسەلەنى ازاماتتىق قوعام ءوز قاداعالاۋىنا الاتىن بولادى. اسىرەسە، قازاق مەكتەپتەرىندەگى پاندەردى ورىس تىلىندە وقىتۋ دەگەن نورمانى جويۋ كەرەك. ورىس ءتىلىن قازاق مەكتەبىندە شەت تىلدەرىنە تەڭەپ، وقۋشىعا شەت ءتىلىن وقۋعا ەركىن تاڭداۋ مۇمكىندىگىن بەرۋ كەرەك!

سول سياقتى "ورىس ادەبيەتى" ءپانى قازاق مەكتەپتەرىندە "الەم ادەبيەتى" ءپانىنىڭ قۇرامداس بولىگى رەتىندە عانا وقىتىلۋى كەرەك! "تاريح" ءپانى ساباقتارىن 68 ساعتتان 34 ساعاتقا قيىپ تاستاۋ جوبالارىن جويىپ، "تاريح" ءپانى ساباقتارىنا تولىققاندى 68 ساعاتتىق مولشەرىن قايتارۋ كەرەك!

جانە قوعامنىڭ الەۋمەتتىك ساناسا جەتىك بولۋى ءۇشىن ماڭىزدى "ادام جانە قوعام" ءپانىن مىندەتتى ءپان ساناتىنا قايتارۋ قاجەت!

قازاق مەكتەپتەرىندە اعىلشىن ءتىلىن، سول سياقتى نەمىس، يسپان، فرانتسۋز، يتاليان جاپون تىلدەرىن وقىتۋ مۇمكىندىكتەرى مەن ساپاسىن ارتتىرۋ قاجەت! باستاۋىش مەكتەپتە "انا ءتىلى" ساباعىن، بۇرىنعى "الىپپە" وقۋلىعىن قالپىنا كەلتىرۋ كەرەك! 

ماقسات الپىسبەستىڭ facebook پاراقشاسىنان

Abai.kz