مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىن وتكىزدى. بۇل تۋرالى اقوردانىڭ رەسمي سايتى حابارلادى.

جيىنعا پرەمەر-مينيستر، پرەزيدەنت اكىمشىلىگىنىڭ باسشىسى، ۇكىمەت مۇشەلەرى، نۇر-سۇلتان، الماتى، شىمكەنت قالالارى مەن وبلىستاردىڭ اكىمدەرى، قازاقستان پرەزيدەنتىنە تىكەلەي باعىنىشتى ورتالىق مەملەكەتتىك ورگانداردىڭ باسشىلارى قاتىستى.

وتىرىستى اشقان قاسىم-جومارت توقاەۆ بيىلعى ءبىرىنشى جارتىجىلدىعىنداعى ەلىمىزدىڭ الەۋمەتتىك-ەكونوميكالىق دامۋ قورىتىندىلارىنا توقتالدى.

– قاڭتار-ماۋسىم ارالىعىندا جاقسى كورسەتكىشتەرگە قول جەتكىزدىك دەپ ايتۋعا بولادى. اتاپ ايتساق، ەكونوميكالىق ءوسىم 4,1 پايىزدى قۇرادى. ينفلياتسيانىڭ جىلدىق كورسەتكىشى 5,4 پايىز بولدى. نەگىزگى كاپيتالعا سالىنعان ينۆەستيتسيالاردىڭ كولەمى 11,7 پايىزعا ءوستى. ارينە، اتالعان ەكونوميكالىق كورسەتكىشتەردىڭ بارلىعى حالىقتىڭ تۇرمىسىنا وڭ ىقپال ەتۋى ءتيىس، – دەدى مەملەكەت باسشىسى.

جيىن بارىسىندا پرەمەر-مينيستر ا.مامين، ۇلتتىق بانكتىڭ توراعاسى ە.دوساەۆ، يندۋستريا جانە ينفراقۇرىلىمدىق دامۋ ءمينيسترى ر.سكليار، ەڭبەك جانە حالىقتى الەۋمەتتىك قورعاۋ ءمينيسترى ب.ساپارباەۆ، اۋىل شارۋاشىلىعى ءمينيسترى س.وماروۆ، تۇركىستان وبلىسىنىڭ اكىمى ءو.شوكەەۆ، قاراعاندى وبلىسىنىڭ اكىمى ە.قوشانوۆ جانە اتىراۋ وبلىسىنىڭ اكىمى ن.نوعاەۆ بايانداما جاسادى.

قازاقستان پرەزيدەنتى سپيكەرلەردىڭ نازارىن بانك سەكتورىنداعى ماسەلەلەرگە، قيىن جاعدايعا تاپ بولعان ازاماتتاردىڭ تۇتىنۋ كرەديتتەرىنە قاتىستى قارىز جۇكتەمەلەرىن تومەندەتۋ شارالارىن جۇزەگە اسىرۋ مىندەتىنە اۋداردى. سونداي-اق، كوممۋنالدىق قىزمەت كورسەتۋ جانە تۇرعىن ءۇي قورىن باسقارۋ ماسەلەلەرى بويىنشا تۇرعىندار تاراپىنان تۇسكەن ارىز-شاعىمداردىڭ كوپتىگىن اتاپ كورسەتتى.

مەملەكەت باسشىسى تۇركىستان وبلىسىنىڭ اكىمى ءو.شوكەەۆتىڭ بايانداماسىنا توقتالىپ، ءوز تاپسىرماسى بويىنشا قاجەتتى قارجى بولىنگەنىن ايتتى.

– ۋاقىت وتە تىعىز. ءبىز بۇل جۇمىستاردى قىسقا مەرزىم ىشىندە اياقتاۋىمىز كەرەك. ەلىمىزدىڭ ازاماتتارى، مەملەكەتتىك ورگاندار، ۇكىمەتتىك ەمەس ۇيىمدار، وڭىرلەر، وتاندىق بيزنەس  جانە بىرقاتار شەتەلدىك ينۆەستورلار زارداپ شەككەندەرگە ماتەريالدىق جانە مورالدىق قولداۋ كورسەتتى. بۇل – حالقىمىزدىڭ بەرەكە-بىرلىگىنىڭ ارقاسى جانە تۇتاستىعىمىزدىڭ كورىنىسى. بارىنە زور ريزاشىلىعىمدى بىلدىرەمىن، – دەدى قازاقستان پرەزيدەنتى.

قاسىم-جومارت توقاەۆ قورعانىس مينيسترلىگىنە اسكەري قويمالاردى كوشىرۋ جۇمىستارىن شۇعىل تۇردە ءبىتىرۋ قاجەت ەكەنىن ايتتى.

مەملەكەت باسشىسى ارىستاعى جارىلىسقا كىنالىلەردىڭ بارلىعىن جازالاۋدى تاپسىردى. سونداي-اق، اسكەري ۆەدومستۆوعا باقىلاۋدى السىرەتكەنى جانە جارىلىسقا جول بەرىلگەنى ءۇشىن قورعانىس ءمينيسترى ن.ەرمەكباەۆقا قاتاڭ سوگىس جاريالادى.

– قازىر وقيعانى زەرتتەۋ ءۇشىن ارنايى كوميسسيا جۇمىس ىستەپ جاتىر. كوميسسيا جۇمىسىنىڭ قورىتىندىسى بويىنشا پرەزيدەنت اكىمشىلىگى مەن قاۋىپسىزدىك كەڭەسى كىنالىلەردىڭ ءبارىن قاتاڭ جازالاۋ جونىندە ۇسىنىس ەنگىزۋى قاجەت. بۇل قاۋىپتىلىگى جوعارى نىساندارعا جاقىن جەرگە قۇرىلىس جۇمىستارىن جۇرگىزۋگە رۇقسات بەرگەن ازاماتتىق مەملەكەتتىك قىزمەتشىلەرگە دە قاتىستى. كىنالىلەردىڭ ءبارى قاتاڭ جاۋاپقا تارتىلىپ، جازالانۋى ءتيىس، – دەدى قاسىم-جومارت توقاەۆ.

قازاقستان پرەزيدەنتى 20 تامىزعا دەيىن باسقا دا وسىنداي نىساندارعا ەگجەي-تەگجەيلى تالداۋ جاساۋ ءۇشىن قورعانىس مينيسترلىگىنە، سونداي-اق، ەسكەرتۋلەر مەن توتەنشە جاعدايلاردى جويۋعا جاۋاپتىلاردىڭ فۋنكتسيونالدىق دايىندىقتارىن جانە قىزمەتتىڭ تيىمدىلىگىن ارتتىرۋ جونىندە ۇكىمەتكە تاپسىرما بەردى.

باياندامالاردى تىڭداعان مەملەكەت باسشىسى ۇكىمەتتىڭ، ۇلتتىق بانكتىڭ جانە وڭىرلەر اكىمدەرىنىڭ جۇمىستارىنا وڭ باعا بەردى. قاسىم-جومارت توقاەۆ قورىتىندى سوزىندە باعدارلامالىق قۇجاتتار مەن سايلاۋالدى باعدارلامانىڭ جۇزەگە اسىرىلۋ تيىمدىلىگىن ارتتىرۋ قاجەتتىگىن ايتتى.

سونىمەن قاتار، مەملەكەت باسشىسى سايلاۋالدى باعدارلامانى جۇزەگە اسىرۋ ءۇشىن جاسالعان ۇكىمەتتىڭ جوبالىق ءوفيسىنىڭ جۇمىسىمەن تانىستى. قاسىم-جومارت توقاەۆقا جوبالىق ءوفيستى ۇيىمداستىرۋدىڭ نەگىزگى جولدارى، باسىم باعىتتارى، ماقساتتارى مەن مىندەتتەرى جونىندە مالىمەت بەرىلدى.

مەملەكەت باسشىسى بايانداماسىنىڭ تولىق ءماتىنىن مىنا سىلتەمە بويىنشا وقي الاسىزدار

Abai.kz