اتىراۋ وبلىسىنداعى وتاندىق مۇناي ءوندىرۋشى كومپانيا «ەمبىمۇنايگاز» اق قىزمەتكەرلەرى «ارىس. ءبىز بىرگەمىز» رەسپۋبليكالىق اكتسياسىنا ءۇن قوسىپ، جالاقىلارى ەسەبىنەن قاراجات جينادى. جينالعان قاراجاتقا تۇركىستان وبلىسى ارىس قالاسىنىڭ بۇلدىرشىندەرىن قولداۋ ماقساتىندا قايىرىمدىلىق شاراسىن ۇيىمداستىردى.   

قايىرىمدىلىق شاراسىنا جەرگىلىكتى تۇرعىندار، مەكتەپ وقۋشىلارى، قالا باسشىلىعى مەن باق وكىلدەرى قاتىستى. شارا كەزىندە ارىس قالاسىنداعى الەۋمەتتىك كومەككە مۇقتاج 400-دەن استام بالاعا «مەكتەپكە جول» باعدارلاماسى اياسىندا مەكتەپ كيىم-كەشەكتەرى تارتۋ ەتىلدى.

«ەمبىمۇنايگاز» اق ۇجىمىنىڭ قايىرىمدىلىق-دەمەۋشىلىك شارالارىن تۇراقتى ۇيىمداستىرىپ كەلە جاتقانىن اتاپ وتكەن ءجون. 2015 جىلى ەمگ قىزمەتكەرلەرىنىڭ جالاقىسى ەسەبىنەن جينالعان قاراجاتقا تاربيەسىندە مۇمكىندىگى شەكتەۋلى بالالارى بار اتىراۋ قالاسىنداعى 4 وتباسىنىڭ باسپاناسىنا كۇردەلى جوندەۋ جۇرگىزىلىپ، جىلعىزىلىكتى ءبىر قارياعا باسپانا سالىنىپ بەرىلدى. ال، 2016 جىلى اتىراۋ قالاسىنداعى بالالارىنىڭ ەكەۋى اۋىر دەرتكە شالدىققان كوپ بالالى وتباسىعا دا جاڭا ءۇي تۇرعىزىلدى. 2018 جىلى ەمبىلىكتەر قاتتى نوسەردەن زارداپ شەككەن شىعىس قازاقستان وبلىسىنىڭ زىريان اۋدانىنىڭ تۇرعىندارىنا دا قولداۋ كورسەتىپ، ءبىر كۇندىك جالاقىلارى ەسەبىنەن قاراجات جيناپ، وعان   وبلىستاعى مالەەۆسك، زۋبوۆسك، زىريان قالاسىنىڭ شەتكى مولتەك اۋداندارىنداعى باسپاناسى جوندەۋگە كەلمەيتىن جانۇيالارعا 7 باسپانا تارتۋ ەتكەن بولاتىن.

وسى جىلى ەمگ باسقارما توراعاسى ءانۋار جاقسىبەكوۆتىڭ باستاماسىمەن ەمبىلىك مۇنايشىلار ءبىر كۇندىك جالاقىلارىن جيناپ، رامازان ايى قارساڭىندا اتىراۋ وبلىسىنداعى قۇرمانعازى، يساتاي، ماقات، جىلىوي، قىزىلقوعا اۋداندارىنداعى باسپاناسىز، كوپ بالالى، الەۋمەتتىك جاعىنان از قامتىلعان سەگىز وتباسىعا 8 باسپانانىڭ كىلتىن تابىس ەتكەن بولاتىن.

بۇل جولعى كومەك ارىستىق مەكتەپ وقۋشىلارىنا ارنالدى. قالاداعى 40 مەكتەپتىڭ اراسىنان جارىلىستان بۇلىنگەن 16 مەكتەپتىڭ الەۋمەتتىك جاعدايى تومەن وتباسىلارىنىڭ بالالارىنا ارناپ كومەك ۇيىمداستىرىلدى. ارىس قالاسى بويىنشا ءبىلىم بەرۋ ءبولىمىنىڭ باسشىسى ءابدىحان مۇساەۆ بارشا قازاقستاندىقتاردىڭ قول ۇشىن سوزىپ جاتقانىن اتاي وتىرىپ، ارنايى كەلگەن ەمبىلىك مۇنايشىلارعا ارىستىق اتا-انالاردىڭ العىستارىن جەتكىزدى. ونىڭ ايتۋىنشا ارىس قالاسى بويىنشا 20 مىڭ مەكتەپ وقۋشىسىنىڭ 1843-ءى الەۋمەتتىك كومەككە مۇقتاج ەكەن. بۇگىن وسى وقۋشىلار اراسىنان باستاۋىش سىنىپ بۇلدىرشىندەرىنە مەكتەپتىك كيىم-كەشەكتەن كومەك كورسەتىلىپ جاتىر.

Abai.kz