شارىپبەك قازىر نۇر-سۇلتانداعى اۋرۋحانالاردىڭ ءبىرىنىڭ جان ساقتاۋ بولىمىندە جاتىر. 24 ماۋسىمدا ارىستاعى قارۋ قويماسىندا جارىلىس بولىپ، ادامداردى ەۆاكۋاتسيا جاساعان كەزدە 8 جاسار ايان شارىپبەكتى كولىك قاعىپ، باسى جاراقاتتانعان ەدى.

«ول بالانى [قازاقستانعا] تاجىريبە الماسۋعا كەلگەن شەتەلدىك نەيروحيرۋرگتەر دە قارادى. دارىگەرلەر قولدارىنان كەلگەنىن جاساپ جاتىر. بىراق كوپ جاعداي دارىگەرلەردىڭ قولىندا ەمەس. وكىنىشكە وراي، بالانىڭ باس جاراقاتى وتە اۋىر» دەدى ءبىرتانوۆ ازاتتىققا.

ءمينيستردىڭ سوزىنشە، قالعان ەكى ناۋقاستىڭ ءبىرى الماتىدا، ەكىنشىسى شىمكەنتتەگى اۋرۋحانادا، ولاردىڭ جاعدايى جاقسارىپ كەلەدى.

24 ماۋسىمدا تۇركىستان وبلىسى ارىس قالاسىنداعى اسكەري قويما جارىلدى. دەنساۋلىق ساقتاۋ مينيسترلىگىنىڭ دەرەگىنشە، جارىلىستان ءۇش ادام (ارىس تۇرعىنى مەن ەكى اسكەري) قازا تاۋىپ، 400-دەن استام ادام دارىگەر كومەگىنە جۇگىنگەن.

27 ماۋسىمدا شىمكەنتتە شەرۋگە شىققان جۇزدەگەن ارىستىق سوڭعى ون جىل ىشىندە ءتورت رەت جارىلىس بولعان ارىس قالاسىنا بارمايتىنىن ايتىپ، بيلىكتەن وزدەرىن باسقا جاققا كوشىرۋدى تالاپ ەتكەن. ەرتەڭىندە 28 ماۋسىمدا شىمكەنت پەن كورشى ەلدى مەكەندەردى ۋاقىتشا پانالاعان ارىستىقتار ۇيلەرىنە ورالدى. بيلىك ارىستاعى ءار تۇرعىنعا 100 مىڭ تەڭگە بەرەتىنىن ايتقان.

Abai.kz