سەيسەنبى, 17 قىركۇيەك 2019
1199 0 پىكىر 21 تامىز, 2019 ساعات 11:45

قىزىلوردادا ءبىلىم سالاسىندا جاڭاشىلدىق بار

بيىل قىزىلوردا وبلىسىنداعى 293 مەكتەپكە 164 500 وقۋشى كەلەدى دەپ جوسپارلانۋدا. وقۋشىلار سانى وتكەن جىلمەن سالىستىرعاندا 10 مىڭعا كوبەيگەن،- دەپ حابارلايدى اباي-اقپارات.

بۇل جونىندە وبلىستىق ءبىلىم باسقارماسىنىڭ باسشىسى مايرا مەلدەبەكوۆا ايتتى.

ونىڭ سوزىنشە، 1-سىنىپقا 21553 وقۋشى قابىلدانادى دەپ جوسپارلانۋدا. وقۋشىلار سانىنىڭ ءوسۋى نەگىزىنەن قىزىلوردا قالاسىندا بايقالعان.

– وبلىستا قازىرگى تاڭدا بالاباقشالار سانى 667-گە جەتىپ، وندا 61 مىڭ بالا تاربيەلەنۋدە. بالاباقشالاردىڭ 72% جەكە سەكتوردا. ارال، قازالى اۋداندارىنان 85 ورىنعا ارنالعان 2 جەكە بالاباقشا، قىزىلوردا قالاسىنان 140 ورىنعا ارنالعان 1 مەملەكەتتىك بالاباقشا اشىلدى،- دەدى باسقارما باسشىسى.

ءباسپاسوز بريفينگى بارىسىندا ءبىلىم سالاسىنداعى جاڭالىقتار دا ءسوز بولدى.

– 1-قىركۇيەكتەن باستاپ 4, 9, 10 سىنىپتار جاڭارتىلعان ءبىلىم بەرۋ مازمۇنى بويىنشا ءبىلىم الادى. بۇل رەتتە اتالعان سىنىپ وقۋشىلارىنا وقۋلىقتار مەن وقۋ ادىستەمەلىك كەشەندەر ساتىپ الۋ ءۇشىن جەرگىلىكتى بيۋجدەتتەن 1,7 ملرد تەڭگە ءبولىنىپ، 15 باسپامەن كەلىسىمشارتتار جاسالعان. جاڭارتىلعان ءبىلىم بەرۋ مازمۇنىنا سايكەس 10-سىنىپ وقۋشىلارى «گرافيكا جانە جوبالاۋ»، «كاسىپكەرلىك جانە بيزنەس نەگىزدەرى» سىندى جاڭا ءپان وقيدى. بۇگىنگى تاڭدا بۇل ماقساتتا ناقتى جۇمىستار اتقارىلدى، - دەپ اتاپ ءوتتى مايرا مەلدەبەكوۆا.

سونداي-اق، ول بيىلعى جىلدان باستاپ مەكتەپتەردە ىستىق تاماق ۇسىنۋ، لاگەرگە جولداما بەرۋ، 1-سىنىپقا وقۋعا قابىلداۋ، مۇعالىمدەردى جۇمىسقا قابىلداۋ ءتارتىبى اۆتوماتتاندىرىلعانىن جەتكىزدى. ناقتىراق ايتقاندا، كەز كەلگەن اتا-انا mektep.sitcen.kz اقپاراتتىق جۇيەسىن قولدانۋ ارقىلى وقۋشىنىڭ قاجەتتى قۇجاتىن ءۇيدى وتىرىپ-اق ەلەكتروندى نۇسقادا وتكىزە الادى.

Abai.kz

0 پىكىر