سارسەنبى, 16 قازان 2019
الاڭ 3611 36 پىكىر 23 تامىز, 2019 ساعات 13:41

"نۇر-وتان" بيلىككە تارتىستى كۇرەستىڭ ارقاسىندا كەلگەن جوق

"نۇر-وتان" پارتياسىن جانداندىرام دەۋ، مەنىڭشە بوس اۋرە. نەگە؟

1) پارتيانىڭ پايدا بولۋ تابيعاتىنىڭ ءوزى تەرىس. ەستەرىڭىزدە بولسا "نۇر-وتان" بيلىككە تارتىستى كۇرەستىڭ ارقاسىندا كەلگەن جوق. ونى ۇيىمداستىرۋشىلار پارتيا قۇرماستان بۇرىن-اق بيلىك باسىندا بولعان. ال ديالەكتيكا زاڭىندا ءبارى كەرىسىنشە بولۋى ءتيىس. الدىمەن پارتيا قۇرىلادى، سودان سوڭ ول پارتيا تارتىس باسەكە نەگىزىندە بيلىككە جەتەدى. شىنايى كۇرەستە شىنىقپاعان پارتيا ەشقاشان دا ومىرشەڭ بولمايدى. بۇل دا ديالەكتيكا.

2) 20 جىلدان استام ۋاقىت ىشىندە بۇل پارتيانىڭ بىردە-ءبىر باسەكەگە قابىلەتتى سپارينگ پارتنەرى بولعان جوق. ساياسي الاڭدا جالعىز ءوزى دوپ تەۋىپ، وزىمەن-ءوزى ويناپ جۇرگەنى سول. ال كونكۋرەنتسيا جوق جەردە دامۋ قايدان بولسىن!

3) پارتيا جۇمىسى ۆەرتيكالدى باسقارۋ نەگىزىندە قۇرىلعان. قاتال يەرارحيا قالىپتاسقان. باسشى نە ايتتى - سول زاڭ. اۋداندىق پارتيا فيليالىندا اۋدان اكىمى، قالادا قالا اكىمى، وبلىستا وبلىس اكىمى، ورتالىق اپپاراتتا ەلباسى جەتەكشى. مۇنداي فورماتتا پىكىر ءپليۋراليزمى بولمايتىنى انىق. ارينە، "مەن باسشىمىن، ال سەن اقىماقسىڭ" دەگەن ورتادا پىكىرتالاس اتىمەن بولماسى بەلگىلى. ال پىكىرتالاس جوقتا جاڭا، تىڭ يدەيالار تۋمايدى.

4) بۇل پارتيا ەل ىشىندە قولايلى ساياسي-الەۋمەتتىك احۋال قالىپتاسۋىنىڭ نەگىزىندە پايدا بولعان جوق. ول تەك دەموكراتيالىق ەلدەردىڭ ىقپالىنىڭ ناتيجەسىندە ىسكە قوسىلعان فورمات. ول كەزدە حالىق تا پارتيالىق جۇيەگە دايىن ەمەس ەدى. ال كەيىن ەس جيىپ، تاجىريبە جيناقتاعاندا وپپوزيتسيالىق پارتيالاردىڭ دامۋىنا شەكتەۋ قويىلدى. ءسويتىپ "نۇر-وتان" ساياسي الاڭدا قايتادان جالعىز ءوزى قالدى. بيلىكتىڭ باتاسىمەن قۇرىلعان اق جول، اۋىل، رۋحانيات سياقتى ويىنشىق پارتيالاردى ەسەپكە الۋدىڭ ءوزى قيسىنسىز.

5) بۇگىنگى تاڭعا دەيىن پارامەن ۇستالعان، سىبايلاستىق جەمقورلىققا جول بەرگەن مەملەكەتتىك قىزمەتكەرلەردىڭ 100% "نۇر-وتان" مۇشەلەرى. ولاردىڭ سانى بۇگىندە مىڭداپ سانالادى. مۇنىڭ ءوزى پارتيانىڭ اۆتوريتەتىنە ورنى تولماس نۇقسان كەلتىردى. ال وسى ۋاقىت ىشىندە ەل الدىنا شىعىپ سول پارامەن ۇستالعانداردى ايىپتاپ سوككەن تىم قۇرىعاندا ءبىر ايماقتىق پارتيا باسشىسىن كوردىڭىزدەر مە. بۇلار پارتيا اتىنا كىر كەلتىردى دەپ، اتتارىن اتاپ، تۇستەرىن تۇستەگەن، مۇندايلارمەن ءبىزدىڭ جولىمىز بىرگە ەمەس دەپ جوعارعى مىنبەرلەردەن سويلەگەن بىرەۋى بولدى ما؟ جوق. بولعان جوق. بۇل دا، جوعارىدا ايتىپ كەتكەن ۆەرتيكالدى باسقارۋ جۇيەسىنىڭ سالدارى. بىردە ءبىر پارتيا فۋنكتسيونەرى جوعارى جاقتىڭ رۇقساتىنسىز بىرەۋدى سىناماق تۇگىلى جاق اشپايدى. ال نەگىزىندە، ءوز ابىرويىن ويلاعان كەز كەلگەن ساياسي ۇيىم ءاربىر وسىنداي فاكتى بويىنشا مالىمدەمە جاساپ، ءوز پوزيتسياسىن ءبىلدىرىپ وتىرادى جانە مۇنداي جاعدايلاردى بولدىرماۋدىڭ امالدارىن ىزدەيدى. "نۇر-وتاندا" ونداي پراكتيكا اتىمەن جوق. دەمەك پارتيادا ۇيىمنىڭ ابىرويىنا نۇقسان كەلەتىن ينفەكتسيالاردان ەمدەلەتىن يممۋنيتەت قالىپتاسپاعان. حالىق اراسىندا پارتيانىڭ بەدەلىنىڭ بولماۋى - سونىڭ جەمىسى.

6) "نۇر-وتان" جاڭا ليدەرلەردى ءوسىرىپ باپتاپ، تاربيەلەپ شىعارا المايتىن دارەجەگە جەتتى. ونىڭ دا سەبەبى جاڭاعى ۆەرتيكالدىق باسقارۋ جۇيەسىندە جاتىر. العاشقى پارتيالىق ۇيىمداردا بەدەل جيناپ، حالىقپەن قويان-قولتىق جۇمىس ىستەپ شىنىققان، سول پارت. ياچەيكانىڭ ۇسىنىسىمەن، ايماقتىق سايلاۋ ارقىلى ءوسىپ، ورتالىق ورگانعا دەيىن جەتكەن ءبىر اتقامىنەردى كورسەتىڭىزدەرشى. جوق وندايلار. سەبەبى بارلىق باسشى فۋنكتسيونەرلەر جوعارىدان تاعايىندالادى. نەمەسە حالىققا سىيلى اۋ دەگەندەردى الداپ-سۋلاپ، تاققا بولماسا كۇشتەپ پارتياعا كىرگىزەدى. بىراق ولاردان دا پايدا شامالى. سەبەبى ول رەكرۋتتار ءوز ءىسىنىڭ تاماشا مامانى بولعانىمەن، پارتيالىق شارۋادا ءنول. گولوۆكين مەن ساپيەۆتىڭ دا سول، ديماشىڭ مەن قايراتىڭ دا سونداي. ال كادر ساياساتىندا مۇنداي تاپشىلىققا دۋشار بولعان ۇيىمنىڭ بولاشاعى قانداي بولماق؟ جاۋابىن مەن ايتپاسام دا ءتۇسىنىپ وتىرعان شىعارسىزدار.

قىسقاسى "نۇر-وتان" پارتياسى قايتا جاڭعىرۋ پروتسەسىنە دايىن ەمەس. وعان ەشقانداي دا العى شارتتار جوق. ال اكىمشىلىك-امىرلىك پارمەنمەن، بۇيرىق-نۇسقاۋمەن ونداي شارۋالار جۇزەگە اسىرىلمايدى.

مۇحتار تۇمەنباي 

Abai.kz

36 پىكىر