اقمولا وبلىسىنا كەلگەننەن كەيىن مەملەكەت باسشىسى ەگىستىك القابىن ارالاپ، «ايبات» جشس-ءنىڭ ەگىن جيناۋ ناۋقانىنىڭ بارىسىمەن تانىستى.

قازاقستان پرەزيدەنتىنە وبلىستىڭ الەۋمەتتىك-ەكونوميكالىق  دامۋىنىڭ نەگىزگى كورسەتكىشتەرى مەن اگروونەركاسىپ كەشەنىنىڭ كەلەشەگى تۋرالى مالىمەت بەرىلدى. سونداي-اق قاسىم-جومارت توقاەۆقا ءداندى جانە مايلى داقىلداردىڭ جاڭا سورتتارى كورسەتىلدى.

مەملەكەت باسشىسى مەحانيزاتورلارمەن اڭگىمەلەسكەندە اۋىل شارۋاشىلىعى القاپتارىن ءتيىمدى پايدالانۋدىڭ ماڭىزدىلىعىن اتاپ ءوتىپ، مەملەكەت تاراپىنان اگروونەركاسىپ كەشەنىن وركەندەتۋگە باسا ءمان بەرىلىپ وتىرعانىن ايتتى.

– مەملەكەتىمىز ءۇشىن سىزدەردىڭ ەڭبەكتەرىڭىزدىڭ ءمانى زور. ۇكىمەت فەرمەرلەرگە جان-جاقتى قولداۋ كورسەتەدى، اۋىلدىڭ ءومىر ءسۇرۋ ساپاسىن ارتتىرۋ جونىندە شارالار قابىلدايتىن بولادى، – دەدى پرەزيدەنت.

كەزدەسۋ سوڭىندا قاسىم-جومارت توقاەۆ ديقاندارعا اۋا رايىنىڭ جاقسى جانە ءونىمنىڭ مول بولۋىن تىلەدى.

Abai.kz