قازاقستان دارىگەرلەرى جاڭا تۋعان 277 نارەستەنىڭ ءولىمىن جاسىرعان. بۇل تۋرالى بۇگىن سەناتتا دەنساۋلىق ساقتاۋ سالاسىنداعى ماقساتتار مەن پارلامەنت تاپسىرمالارىنىڭ ورىندالۋ بارىسى تۋرالى بايانداعان دەنساۋلىق ساقتاۋ ءمينيسترى ەلجان ءبىرتانوۆ ءمالىم ەتتى.

قازىر دەنساۋلىق ساقتاۋ مينيسترلىگى  اتىراۋ وبلىسىنداعى دارىگەرلەر ىسىنەن كەيىن بالا ولىمىنە قاتىستى اۋديت جۇرگىزىپ جاتىر.

وسى ۋاقىتقا دەيىن بەلگىلى بولعانى، دارىگەرلەر 277 بالانىڭ ءولىمىن جاسىرعان.

ءبىرتانوۆتىڭ ايتۋىنشا، اتىراۋداعى نارەستە ولىمىنەن كەيىن ەل بويىنشا  «ولگەن نارەستەلەردىڭ  شىنى پرەپاراتتارىنان الىنعان وبەكتيۆتى دەرەكتەر مەن مەديتسينالىق كارتالاردىڭ ءاۋديتى» باستالعان.

-تالداۋ ناتيجەسىندە ءبىز ماتەريالداردى ۇسىنباعان ماڭعىستاۋ وبلىسىنان باسقا، ەسەپكە الىنباعان ەرتە نەوناتالدىق ءولىم-ءجىتىمنىڭ 277 نارەستە ءولىمىن جاسىرىپ قالۋ فاكتىلەرىن انىقتادىق، - دەيدى دەنساۋلىق ساقتاۋ ءمينيسترى.

وسىلايشا، 2018 جىلعى نارەستە ءولىمى رەسمي ستاتيستيكادان الدەقايدا كوپ ەكەنى انىقتالعان.

Abai.kz