جەكسەنبى, 15 جەلتوقسان 2019
46 - ءسوز 1273 1 پىكىر 22 قازان, 2019 ساعات 13:47

جۇمەكەننىڭ ءبىر شەدەۆرى ۇشتى-كۇيلى جوعالىپ كەتتى مە؟

ەسىمە تۇسىرە الماي ءجۇرمىن، مەنىڭشە، وتكەن عاسىردىڭ 70-ءشى جىلدارىنىڭ سوڭى بولۋى كەرەك، پاكيستاننىڭ ۇلى اقىنى فايز احماد فايزدى جۇمەكەن ناجىميدەنوۆتىڭ ءتارجىماسىنان وقىپ، اڭ-تاڭ قالىپ ەدىم... سول اۋدارما جۇمەكەننىڭ 7 تومدىعىندا دا بوي كورسەتپەدى. ءناسىپ اپايعا تەلەفون شالىپ، سونىڭ ءجونىن سۇراعانىمدا ول كىسى دە ەشتەڭە ايتا الماي: "--جەتى تومدىقتا جوق پا؟.." دەپ، وزىمنەن سۇراي بەردى...

سول كىتاپتى قاراعاندىنىڭ بارلىق كىتاپحانالارىنان قولىما شام الىپ ىزدەپ، تابا المادىم. ۇشتى-كۇيلى جوق! قارا كىتاپ ەدى. سىرتىندا "فايز احماد فايز" دەپ، اۆتوردىڭ اتى-ءجونى جازىلعان...

تاياۋدا جۇمەكەننىڭ قازاقشا نۇسقاسىن تابا الماي،فايز احماد فايزدىڭ ورىسشا باسىلىمىن اقتارىپ-تەڭكەرىپ شىقتىم، بىراق، سودان جۇمەكەننەن العان ءلاززاتىمدى الا المادىم! قايدا ەكەن سول كىتاپ؟!

جۇمەكەننىڭ فايزى-ابايدىڭ پۋشكينى، عافۋدىڭ "مەنىڭ داعىستانىم" (راسۋل عامزاتوۆ), قۋاندىق شاڭعىتباەۆتىڭ ومار حايامى مەن روبەرت بەرنسى سەكىلدى ۇلتتىق ءتارجىمامىزدىڭ وزىق ۇلگىسى ەدى!

ونى تاۋىپ الىپ، قايتا جاريالاپ، شىعارمالارىنىڭ جەتى تومدىعىنا قوسۋ كەرەك!

سەرىك اقسۇڭقاردىڭ facebook پاراقشاسىنان

Abai.kz

1 پىكىر