شىركىن-اي، شىركىن، مەنى ءبىر كۇنى پرەزيدەنت شاقىرىپ الىپ، بەتىمنەن ءسۇيىپ، ارقامنان قاعىپ، ويناعان بولىپ، كەۋدەمە ءتۇيىپ-ءتۇيىپ جىبەرىپ: «مىجبان، سەن مەنىڭ مۇراگەرىم بولاسىڭ، تۇسىمدە  ءبىر بلاتنوي شال سولاي ايان بەردى...»  دەسە عوي....

شىركىن-اي، شىركىن، مەنى ءبىر كۇنى پرەزيدەنت شاقىرىپ الىپ، بەتىمنەن ءسۇيىپ، ارقامنان قاعىپ، ويناعان بولىپ، كەۋدەمە ءتۇيىپ-ءتۇيىپ جىبەرىپ: «مىجبان، سەن مەنىڭ مۇراگەرىم بولاسىڭ، تۇسىمدە  ءبىر بلاتنوي شال سولاي ايان بەردى...»  دەسە عوي....

ءولا-ءا، كۇيەۋ بالاسىنىڭ ءىشى  «پوجار» بولىپ تۇرسا دا، قولىمدى قىسار ما ەكەن-ەي؟ جۇرت سول كىسى مۇراگەر بولادى دەپ ءجۇر عوي... جۇرت نە دەمەيدى، يت نە جەمەيدى... بولسا بولسىن، ول دا قازاقتىڭ ءبىر بالاسى...  شىركىن-اي، شىركىن، ءبىر كۇنى ەلباسى مەنى شاقىرىپ الىپ: «شارشادىم، مۇراگەرىم كىم بولار ەكەن دەپ، تەك سونى عانا اڭسادىم. سەن ەلدىڭ بولاشاق پرەزيدەنتىسىڭ. سوندىقتان، مەنىڭ كولەڭكەم بولىپ، «ىستاجىروۆكادان» وتە بەر» دەسە عوي...  وپپوزيتسيا دا، بىلايعى ساياساتكەرلەر دە:  «مۇراگەر ءماسىموۆ بولادى»  دەپ تاڭدايلارى تاقىلداپ جۇرگەندە، قايداعى ءبىر سويلەۋگە ەرىنەتىن جالقاۋ مىجبان ماندىرباەۆ پرەزيدەنتتىڭ مۇراگەرى بولىپ شىعا كەلسە شە؟ پرەمەر- مينيستر كارەكەڭ ءماسىموۆ قۇشاقتاپ تۇرىپ، ارقامدى تىرناپ المايدى ما ەكەن-ەي؟ كىم بىلگەن... تاق تالاس دەگەن جاما-ان...  ءولا-ءا، مەن پرەزيدەنتتىڭ مۇراگەرى بولىپ شىقسام؟ بىراق، ەرتە تۇرىپ، بەت-قولىمدى جۋدى ايتساڭشى... مەن بەتىمدى بەس جىلدا ءبىر رەت قانا جۋامىن... اۋىلدا اۋىز سۋ جوق. بوق سۋ بار. ونىڭ ۇستىنە ەرىنەمىن دە، بەتىمدى تۇكىرىكتەپ «جۋا» سالامىن. پرەزيدەنت بولسام، ەل ارالاۋ كەرەك. جۇرەدى ەكەنمىن دە سالپاقتاپ... ونىڭ ۇستىنە شىمكەنتتەن استاناعا كۇندە قالاي قاتىناپ ىستەيمىن؟ ا، يا استاناعا كوشەدى ەكەنمىن عوي. استاناعا كوشىپ بارۋدى ايتساڭشى. شارشاپ كەتەسىڭ. ماجىلىستەردە تۇرەگەپ تۇرىپ ءسوز سويلەۋدى ايتساڭشى. تۇرەگەپ تۇرىپ! الدىڭا كەشە پىسكەن ەت قويىپ، قازى-قارتادان جەپ جاتىپ، جاتا-جامباستاپ سويلەسەڭ مەيلى عوي... سويلەۋگە دە ەرىنەمىن عوي... سوزىمە سول جەردەگىلەر باس شۇلعىپ، قول شاپالاقتاعاندارىمەن، بىلاي شىعا ءبارىن ۇمىتىپ كەتسە شە؟ اكىمدەر وتىرىك اقپارمەن سابالاسا شە؟  جامان جالقاۋمىن عوي، وسى سوزدەردى سىزدەرگە جەتكىزۋدىڭ وزىنە ەرىنىپ تۇرمىن. بارىنەن دە حالىق الدىنا شىعىپ، قول بۇلعاۋدى ايتساڭشى! قولىمدى قالاي ەرىنبەي كوتەرمەكپىن؟ كوتەرىلگەن قولىمدى  بۇلعاۋدى ايتساڭىزشى! تۇسكى تاماق... ءدامدى تاعامداردى اۋىزعا ەرىنبەي سالىپ، ەرىنبەي شايناۋ... ءولا-ءا، ونى جۇتۋدىڭ ءوزى جۇمىس قوي... سوسىن: «قالايسىڭ، وباما، ءشاي ءىشىپ كەتسەي! قالايسىڭ، مەدۆەدوۆ مىرزا؟ كەلسەي، شوشقانىڭ سالىسىن جەپ كەت...»--دەپ وزگە ەلدىڭ پرەزيدەنتتەرىمەن سويلەسۋدىڭ وزىنە ەرىنەتىن شىعارمىن. جاماا-ان ەرىنشەكپىن.

ايەلىم قاتيپاش جۇگىرىپ كەلىپ، قۇشاقتاي الدى:

--مىجبان، پرەزيدەنتتىڭ مۇراگەرى بولۋىڭمەن!

--ويباي، قۇشاقتاما!-دەيمىن مەن.

--نەگە جانىم؟

--پرەزيدەنتتى قۇقشاقتامايدى. باسىڭدى يزەپ، وڭ قولىڭدى جۇرەگىڭنىڭ ۇستىنە قوي.

--مەندە جۇرەك جوق قوي...

--كاك جوق؟

--«ساعان باي بولۋدىڭ وزىنە ەرىنىپ ءجۇرمىن!»--دەپ جۇرەگىمدى «داۆنو» جارىپ جىبەر­گەنسىڭ...

--سەن قانشا دەگەنمەن، بولاشاق پرەزيدەنتتىڭ ايەلىسىڭ. ابايلاپ سويلە، مادەنيەتتى بول. بىرەۋى قىزىل، بىرەۋى اق ەكى بولەك تۋفلي كيىپ العانىڭ نە؟

--ەشكى باققاندىكى، ءتوپلي تاپقاندىكى...

--ورتەپ جىبەر. بۇگىننەن باستاپ، مۇراگەردىڭ ايەلىسىڭ! مەن مۇراگەرمىن!

ايەلىم باسىن يزەپ، وڭ قولىن جۇرەگى تۇسىنا قويىپ، دالاعا دالاقتاي جۇگىرىپ، شىعىپ كەتتى... سولاي ەلەستەتىپ وتىرمىن عوي ەندى.  ەلەستەتۋدىڭ وزىنە ەرىنىپ... قويشى، پرەزيدەنت مۇراگەرى بولمايمىن!  نە تۇسكە دەيىن ۇيىقتاي الماسام، نە بازار ارالاي الماسام، نە دوستارىممەن كايىپ بولىپ، سىرا ىشە الماسام، نەسىنە جەر باسىپ ءجۇرمىن؟ اسىقپاڭدار اعايىن، پرەزيدەنت مۇراگەرى ارامىزدا ءجۇر. ءالى-اق، جارقىراپ شىعا كەلەدى! مەن جاما-ان جالقاۋمىن عوي، كەرەك دەسەڭىزدەر، شايتان ەمەسپىن عوي، ايتەۋىر ءبىر ولەتىن شىعارمىن، سول ءولۋدىڭ وزىنە ەرىنەمىن. وسى جۇرت ەرىنبەي، قالاي ءولىپ جاتىر دەسەڭىزشى... شارشا-اپ كەتتىم...