سارسەنبى, 13 قاراشا 2019
بيلىك 840 2 پىكىر 4 قاراشا, 2019 ساعات 11:48

مەملەكەت باسشىسى ەلورداداعى №23 ورتا مەكتەپكە باردى

مەكتەپتى ارالاۋ بارىسىندا نۇر-سۇلتان قالاسىنىڭ اكىمى التاي كولگىنوۆ پرەزيدەنتكە استانانى دامىتۋ جونىندەگى كەڭەستە بەرىلگەن تاپسىرمالاردىڭ ورىندالۋى تۋرالى باياندادى. ونىڭ ايتۋىنشا، بيىل 5 مىڭ ورىندىق 6 جاڭا مەكتەپ، ال 2020 جىلى 10 مىڭ ورىندىق 12 مەكتەپ پايدالانۋعا بەرىلەدى.

مەملەكەت باسشىسىنا ەلوردا حالقىنىڭ 25 پايىزى تۇراتىن قالا اۋماعىنداعى 16 تۇرعىن ءۇي الابىن دامىتۋ جونىندەگى تاپسىرمالارىنىڭ جۇزەگە اسىرىلۋ جايىندا دا مالىمەت بەرىلدى. سونداي-اق التاي كولگىنوۆ قازىرگى ۋاقىتتا قالادا ءۇش اۋىسىمدى 8 مەكتەپ بارىن، وسى ماسەلەنى شەشۋ ءۇشىن جىل سايىن 12 مەكتەپ سالۋ قاجەتتىگىن ايتتى.

سونىمەن قاتار اكىم پرەزيدەنتتىڭ تاپسىرماسى بويىنشا بۇقارالىق سپورتتى دامىتۋ ماقساتىندا 4 جاڭا سپورت نىسانىنىڭ قۇرىلىسى باستالعانىن حابارلادى.

مەملەكەت باسشىسى №23 مەكتەپتىڭ ماتەريالدىق-تەحنيكالىق بازاسىمەن تانىسىپ، وقۋ كابينەتتەرىن ارالادى، وقۋشىلارمەن جانە مۇعالىمدەرمەن اڭگىمەلەستى. مۇعالىمدەر پرەزيدەنتكە مەكتەپتىڭ قاجەتتىلىكتەرى تۋرالى ايتتى.

قاسىم-جومارت توقاەۆ مەكتەپتىڭ تۇيتكىلدى ماسەلەلەرىمەن تانىس ەكەنىن، اتالعان اۋداندا قىسقا مەرزىم ىشىندە جاڭا مەكتەپ سالۋ جونىندە تاپسىرما بەرگەنىن اتاپ ءوتتى.

– بۇل – ىسكە اساتىن جوسپار. سىزدەرگە الداعى ۋاقىتتا جاڭا مەكتەپتە جۇمىس ىستەۋگە مۇمكىندىك بولادى، – دەدى مەملەكەت باسشىسى.

Abai.kz

2 پىكىر