بۇگىن قازاقستان رەسپۋبليكاسىنىڭ پرەزيدەنتى – قارۋلى كۇشتەردىڭ جوعارعى باس قولباسشىسى قاسىم-جومارت توقاەۆتىڭ باسشىلىعىمەن قورعانىس مينيسترلىگىندە مەملەكەتتىك ورگانداردىڭ ءبىرىنشى باسشىلارىنىڭ قاتىسۋىمەن ستراتەگيالىق كوماندالىق-شتابتىق وقۋ-جاتتىعۋلارى ءوتتى.

مەملەكەت باسشىسىنا وقۋ-جاتتىعۋلاردىڭ نەگىزگى مىندەتتەرى مەن كەزەڭدەرى تۋرالى مالىمەت بەرىلدى. اتالعان وقۋ-جاتتىعۋلارى قازىرگى سىن-قاتەرلەردى ەسكەرە وتىرىپ، قازاقستان رەسپۋبليكاسىنىڭ قورعانىس جۇيەسى مەن اسكەري قاۋىپسىزدىگىن ساقتاۋ ماقساتىندا ۆەدومستۆوارالىق ءىس-قيمىلداردى نىعايتۋعا باعىتتالعان.

وقۋ-جاتتىعۋ بارىسىندا ەلىمىزگە تونەتىن سىرتقى قاتەرلەردى بولدىرماۋ ءۇشىن اسكەري جانە اسكەري ەمەس سيپاتتاعى مەملەكەتتىك شارالاردى جۇزەگە اسىرۋ ماسەلەلەرى پىسىقتالدى.

مەملەكەت باسشىسى اسكەري قاۋىپسىزدىك سالاسىنداعى نورماتيۆتىك-قۇقىقتىق اكتىلەردى جەتىلدىرۋ، سونداي-اق، قورعانىس جۇيەسى الدىنداعى مىندەتتەردى شەشۋ ءۇشىن مەملەكەتتىك ورگانداردى دايىنداۋ شارالارىن جولعا قويۋ جونىندە بىرقاتار تاپسىرما بەردى.

وقۋ-جاتتىعۋ سوڭىندا قاسىم-جومارت توقاەۆ وزدەرىنىڭ اسكەري بورىشتارىن اتقارۋ كەزىندە قازا تاپقان قازاقستان ارمياسىنىڭ ساربازدارى مەن وفيتسەرلەرىنىڭ رۋحىنا تاعزىم ەتتى.

Abai.kz