قىزىلوردا وبلىسىنىڭ اكىمى ارال اۋدانىنا قاراستى ەلدى مەكەندەردى ارالاپ، ايماق باسشىسىنىڭ جۇمىس ساپارى قازالى اۋدانىندا جالعاستى. قازالى اۋدانىنان شالعاي جاتقان ەلدى مەكەندەردەگى باستى ماسەلەلەردىڭ ءبىرى: اياق سۋ، بالاباقشا مەن سپورتتىق كلۋب سالۋ، اۋىل ىشىلىك جولدار مەن دارىگەرلىك امبۋلاتوريانىڭ قۇرىلىسى جانە اۋىز سۋ تارتۋ جەلىلىك قۇبىرلاردى جاڭارتۋ تۋرالى ايتىلدى.  

ايماق باسىشى جانقوجا باتىر اۋىلىندا بولىپ، تۇرعىندارمەن كەزدەستى. ەلدى مەكەن تۇرعىندارى سۋ قۇبىرى جەلىلەرىن تۇتىنۋشىلار ۋچاسكەسىنىڭ ايماعىنا جەتكىزىپ بەرۋ تۋرالى وتىنىشىتەرىن ءبىلدىردى. بۇل جۇمىستاردى جۇزەگە اسىرۋعا 163,4 ملن. تەڭگە قاجەت.

ق. ىسقاقوۆ بۇل ماسەلەلەردى شەشۋ ءۇشىن ءتيىستى سالا باسشىلارىنا تاپسىرما بەردى.

سونداي-اق، ايماق باسشىسى مايداكول، ءۇ.تۇكتىباەۆ، قوجاباقى، بوزكول، كاۋكەي، تاسارىق، بىرلىك اۋىلدارىن دا  ارالاپ، تۇرعىندارمەن كەزدەستى. بالاباقشا مەن كلۋب ءۇيىن جاڭارتۋدى سۇراعان ءوتىنىش-تىلەكتەرىنە وبلىس اكىمى كاسىپكەرلەرمەن بىرلەسىپ جۇمىس اتقارىلاتىنىن ايتتى.

«ءبىز وتكەن وسى بىرنەشە كۇندىك ساپارىمىزدا بارعان اۋىلدارعا مەملەكەتتىك-جەكەمەنشىك ارىپتەستىك جايىندا ايتىپ كەلەمىز. وسى باعدارلاما نەگىزىندە سىزدەر سۇراعان عيماراتتاردى جاڭادان تۇرعىزۋعا كوپ مۇمكىندىك بار. ول ءۇشىن نە ىستەيمىز؟ كوبىنە-كوپ مۇنداي شارۋاعا ەل ازاماتتارىن، كاسىپكەر ازاماتتاردى تارتۋ قاجەت. ونداي ىقىلاستى ادام بولسا، مەملەكەتتىك-جەكەشەلىك ارىپتەستىك نەگىزىندە جارتى جىل ىشىندە كلۋب، ەمحانا، سپورتتىق كەشەندەر، بالاباقشا دا وڭاي تۇرعىزار ەدىك. ءارى بۇل يگىلىكتى ءىس كاسىپكەردىڭ وزىنە دە، ەلگە دە، ۇكىمەتكە دە پايدالى. 5-6 جىل كولەمىندە كاسىپكەر شىعىنداعان بارلىق قارجىنى مەملەكەت تولىق وتەيدى. سونىمەن قاتار، وعان قوسىمشا مەملەكەتتىك تاپسىرىستار الۋعا دا مۇمكىندىك تۋادى» - دەدى ايماق باسشىسى.

اۋىل تۇرعىندارى ءوتىنىش-تىلەكتەرىن جەتكىزىپ قانا قويماي اتقارىلعان جۇمىستار ءۇشىن العىستارىن ايتىپ، اقساقالدار باتالارىن بەردى.

«بىلتىر ەرەكشە جىل بولدى. اۋىلىمىزدىڭ ءىشى جوندەلىپ، 7 كوشەگە قيىرشىق تاس توسەلدى. بۇرىنعىداي سۋدى كوشەدەگى قۇبىردان تاسىمايمىز. ۇيگە تىكەلەي تارتىلعان. تۇرعىندار سانى جىلدان-جىلعا ارتىپ كەلەدى»،– دەيدى ءۇ.تۇكتىباەۆ اۋىلىنىڭ تۇرعىنى تالعات ەگەمبەردىۇلى.

ايماق باسشىسى قازالىدان 110 شاقىرىم قاشىقتىقتاعى قىزىلقۇم اۋىلدىق وكرۋگىنە قاراستى كاۋكەي اۋىلىنا دا باردى. تۇرعىندارمەن جۇزدەستى، حالىق ايتقان ماسەلەلەردى تىڭدادى. ايتا كەتۋ كەرەك، اۋدان ورتالىعىنان كاۋكەيگە دەيىن جول قاتىناسى دا جاقسارعان. جول جوندەۋ جۇمىستارى بارلىعى 2 ميلليارد تەڭگەدەن استام قارجىعا كەزەڭ-كەزەڭىمەن ىسكە اسىپ جاتىر. رەسپۋبليكالىق بيۋدجەتتەن قاراجات ءبولىنىپ، 1978 جىلدان بەرى جوندەۋ كورمەگەن اۆتوجول كۇردەلى جوندەۋدەن وتۋدە. كاۋكەيلىكتەر اۋىلعا ينتەرنەت جەلىسى تارتىلىپ، جاڭا كلۋب ءۇيى سالىنۋىن سۇرادى. ءارى وسى اۋىلدىق وكرۋگكە قاراستى شاعىن اجار  ەلدىمەكەنىنە جارىق كەرەك. ماماندار ءۇي سانى جيىرمادان اساتىن بۇل اۋىلعا كۇننەن قۋات الاتىن قوندىرعى ورناتۋعا بولاتىندىعىن ايتتى.

مۇنان كەيىن وركەندەۋ اۋىلدىق وكرۋگىنە قاراستى تاريحي جانكەنت قالاشىعىنداعى جۇرگىزىلىپ جاتقان جۇمىستارمەن تانىستى. جانكەنت قورعانى - رەسپۋبليكالىق سيپاتتاعى ارحەولوگيالىق ەسكەرتكىش. وركەندەۋ اۋىلدىق وكرۋگىنىڭ ورتالىعىنا ىرگەلەس جاتقان بيىك توبە سياقتى توپىراق باسقان قورعاننىڭ ورنىندا ءVىى - ءحىV عاسىرلاردا جانكەنت قالاسى بولعان. قازىر بۇل جەردىڭ تۋريستتىك الەۋەتىن ارتتىرۋ ماقساتىندا جۇمىستار جۇرگىزىلۋدە.

وبلىس اكىمى ق.ىسقاقوۆ "قارلاڭ" ۋچاسكەسىندەگى قالقىمالى كوپىردىڭ جاعدايىمەن دە  تانىستى. كوپىر ارقىلى جول قاتىناسى قيىنداپ وتىرعانىن ايتقان تۇرعىنداردىڭ ءوتىنىشى ەلەۋسىز قالمادى. ايماق باسشىسى اتالمىش كوپىردى سالۋ ءۇشىن جوبا سمەتالىق قۇجاتتاردى ازىرلەۋگە قارجى ءبولىنىپ، ءتيىستى جۇمىستار جۇرگىزىلەتىنىن مالىمدەدى. اتالعان كوپىر قۇرىلىسىن جۇرگىزۋ ارقىلى وركەندەۋ، بىرلىك، اراندى، بوزكول، قىزىلقۇم، تاسارىق اۋىلدىق وكرۋگتەرى تۇرعىندارىنىڭ اۋدان ورتالىعىمەن تۇراقتى بايلانىسىن، قامتاماسىز ەتۋگە مۇمكىندىك تۋادى.

«كۇنى كەشە «السەيىت» ۋچاسكەسىندەگى كوپىردىڭ پايدالانۋعا بەرىلگەنىن بىلەسىزدەر. اۋدانعا قاراستى 7 ەلدى مەكەندە تۇراتىن 8 مىڭعا جۋىق حالىق قاتىنايتىن «قارلاڭ» كوپىرىنىڭ دە ماڭىزى زور. ەگەر جاڭا تەمىر بەتوندى كوپىر تۇرعىزىلسا، اۋداننىڭ ەكونوميكالىق دامۋىنا ۇلەسى كوپ. سونداي-اق، اتالعان كوپىردىڭ قۇرىلىسى «ساراتس-2» جوباسىنا دا ەنگىزىلگەن. جوبا قۇجاتتارى قابىلدانسا، قۇرىلىس جۇمىستارى 2021-2022 جىلدارى باستالادى»، – دەيدى اۋداندىق تۇرعىن ءۇي كوممۋنالدىق شارۋاشىلىعى، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى مۇرات ءابسۇلتانوۆ.

وبلىس اكىمىنىڭ ءتورتىنشى كۇنگى ساپارى ساپارى اباي، قۇمجيەك، مايلىباس، اقسۋات اۋىلدارىندا جالعاستى. الىس شالعايدا جاتقان شاكەن مەن شيلىگە دە باردى. 

«بىلتىر وسى اۋىلدىڭ ەكى كوشەسىنە تۇنگى جارىق شامدارى ورناتىلدى. ءبىز سەكىلدى ۇلكەن ادامعا بۇنداي جاعداي كەرەك-اق. ودان وزگە جاستارعا ساياباق سالىپ بەردى. ەلدە 90 ورىندىق بالاباقشا سالىنىپ جاتىر. بۇيىرسا، بيىل نەمەرەلەرىمىزدى سوندا جەتەكتەيمىز دەپ وتىرمىز. كوشەلەر اسفالتتانىپ، اۋىل تىرشىلىگى جىلدان-جىلعا جاقسارىپ كەلەدى. وبلىس اكىمىنىڭ ارنايى شالعايدا ورنالاسقان اۋىلدارىن ارالاپ، ەلدىڭ وتىنىشتەرىن تىڭداپ جۇرگەنى ءبىز ءۇشىن ۇلكەن قۋانىش. ايماق باسشىسىنىڭ قىزمەتىنە حالىق ريزا»، –دەيدى مايلىباس اۋىلىنىڭ تۇرعىنى قۋانىش رزاحان.

سونىمەن قاتار،ايماق باسشىسى قاشاقباي ءپىرىموۆ اتىنداعى اۋىلدىڭ تۇرعىنى، تىل ارداگەرى، 102 جاستاعى ءمارزيا قوجاعۇلدىڭ ۇيىندە بولىپ، قارياعا سالەم بەردى.

ءتورت كۇندە ارال، قازالى اۋداندارىنا قاراستى 40 جۋىق ەلدى مەكەندى ارالاپ، حالىق احۋالىمەن جاقىن تانىسقان قۋانىشبەك دوسمايىلۇلى تۇرعىندار كوتەرگەن بارلىق ماسەلە ءجىتى نازاردا بولاتىندىعىن جەتكىزدى.

«ىستەلىپ جاتقان جۇمىستاردىڭ بارلىعى پرەزيدەنتتىڭ تالابى. ءبىز ورىنداۋشىلارمىز. بۇل ساپارىمىزدىڭ ماقساتى وسى. ەل-ەلدى ارالاپ، سىزدەردىڭ جاعدايلارىڭىزدى ءوز كوزىمىزبەن كورۋ. كورىپ قانا قويماي، كەمشىلىك پەن جەتىسپەۋشىلىكتىڭ سالدارىن قاراۋ، بارىنشا ايتىلعان ماسەلەلەر بويىنشا جۇمىس جۇرگىزەمىز»،– دەدى وبلىس اكىمى قازالىلىق تۇرعىندارمەن كەزدەسۋىندە.

Abai.kz