الماتى قالاسى الاتاۋ اۋدانىنىڭ بۇرىنعى اكىمى شاحمەردەن رىسپاەۆ سوت سانكتسياسىمەن ەكى ايعا قاماۋعا الىندى. سونداي-اق، ونىڭ بۇرىنعى ورىنباسارى سايات اعىباەۆ تا قاماۋعا الىندى،- دەپ حابارلايدى Tengrinews.kz

"سوتقا دەيىنگى تەرگەۋ ورگانى سانكتسيا بەرۋ ءۇشىن تەرگەۋ سوتىنا جۇگىندى. تەرگەۋ سوتىنىڭ قاۋلىسىمەن كۇدىكتى شاحمەردەن رىسپاەۆقا قاتىستى ەكى اي مەرزىمگە كۇزەتپەن ۇستاۋ تۇرىندەگى بۇلتارتپاۋ شاراسى سانكتسيالاندى", - دەدى الماتى قالالىق سوت ءباسپاسوز قىزمەتىنىڭ وكىلدەرى.

الاتاۋ اكىمىنىڭ ورىنباسارى سايات اعىباەۆ تا وسى مەرزىمگە قاماۋعا الىندى.

ايتا كەتەيىك، 2020 جىلى 18 قاڭتاردا الماتى قالاسى الاتاۋ اۋدانىنىڭ بۇرىنعى اكىمى شاحمەردەن رىسپاەۆ ۇستالدى. سىبايلاس جەمقورلىققا قارسى قىزمەت الماتى پروكۋراتۋراسىمەن بىرلەسىپ، الاتاۋ اۋدانىنىڭ اكىمى، ونىڭ ورىنباسارى، سونداي-اق وسى اۋدان اكىمى اپپاراتىنىڭ مادەنيەت جانە تىلدەردى دامىتۋ ءبولىمىنىڭ باسشىسىن جەمقورلىق ءىسى بويىنشا قىلمىس جاسادى دەگەن كۇدىكپەن ۇستادى.

ولار 2019 جىلى "وڭىرلەردى 2020 جىلعا دەيىن دامىتۋ" مەملەكەتتىك باعدارلاماسى بويىنشا بولىنگەن بيۋدجەت قاراجاتىن ءىرى كولەمدە جىمقىردى دەگەن كۇدىككە ىلىنگەن.

سونداي-اق، اۋدان اكىمىنىڭ ورىنباسارى قۇجاتقا جالعان مالىمەتتەر ەنگىزگەنى ۇشىن مەردىگەرلىك ۇيىم وكىلىنەن 500 مىڭ تەڭگە پارانى بانكتىك شوتقا اۋدارۋ ارقىلى الۋ دەرەكتەرى بويىنشا تەرگەۋ ءجۇرىپ جاتىر.

Abai.kz