باس پروكۋراتۋرا «اق جول» پارتياسىنىڭ توراعاسى، ءماجىلىس دەپۋتاتى ا.پەرۋاشەۆتىڭ «ارسەلور ميتتال تەمىرتاۋدىڭ» 20 ميلليارد تەڭگە پايداسىن جاسىرعانى جانە قازاقستاندىق كاسىپورىندارعا قارىزى تۋرالى مالىمدەمەسىن راستادى. بىراق بۇل زاڭبۇزۋشىلىقتاردى جەمقورلىق رەتىندە قاراستىرۋدان باس تارتتى.

ەسكە سالساق، 25 جەلتوقساندا «اق جول» فراكتسياسىنىڭ جەتەكشىسى ازات پەرۋاشەۆ «ارسەلور ميتتال تەمىرتاۋ» قازاقستاندىق كاسىپكەرلەردىڭ قۇقىقتارىنىڭ بۇزىپ، اياقتالعان كەلىسىمشارتتار ءۇشىن جىل سايىن قازاقستاندىق جەتكىزۋشىلەرگە ميللياردتاعان دوللار تولەمەگەنىن حابارلاعان بولاتىن. سونىمەن قاتار، دەپۋتات شەتەلدىك الىپ كومپانيانىڭ پايداسىن جاسىرىپ، قازاقستان بيۋدجەتىنە از مولشەردە عانا سالىق ءتۇسىرۋ ءۇشىن قولدانعان سحەمالارى تۋرالى باياندادى. وسىعان بايلانىستى اتالعان جاۋاپتىلاردى كورپوراتيۆتى سىبايلاس جەمقورلىق ءۇشىن جاۋاپقا تارتۋ تۋرالى ماسەلە كوتەرگەن ەدى. 

كەشە «اق جول» فراكتسياسى بۇل ساۋالعا قازاقستان رەسپۋبليكاسىنىڭ پرەمەر-ءمينيسترى مەن باس پروكۋرورىنىڭ جاۋاپتارىن الدى.

اتاپ ايتقاندا، ۇكىمەت قابىلداعان شارالاردان كەيىن شەتەلدىك 24 جەر قويناۋىن پايدالانۋشىنىڭ قازاقستاندىق 24 كاسىپورىنعا 1,5 ميلليارد تەڭگە قارىزىنىڭ 800 ميلليونىنىڭ قايتارىلعاندىعى ايتىلعان.

«ەكسپورتتىق مامىلەلەردەن پايدانى جاسىرۋ تۋرالى ماسەلە بويىنشا قارجى مينيسترلىگى باقىلاۋدى جۇزەگە اسىردى. ناتيجەلەرى بويىنشا اكتسيونەرلىك قوعامنىڭ مەتاللۋرگيا ونىمدەرىن يران مەن قىتايعا ەكسپورتتاۋ كەزىندە باعانى تومەندەتۋ فاكتىلەرى راستالدى. بۇل ءوز كەزەگىندە تولەنەتىن سالىقتاردىڭ مولشەرىنە اسەر ەتتى. وسىعان بايلانىستى ەكسپورتتىق دوودتار كولەمىن 20 ميلليارد تەڭگەگە تۇزەتۋ (ۇلعايتۋ باعىتىندا) تۋرالى حابارلامالار جىبەرىلدى»، - دەدى قازاقستاننىڭ باس پروكۋرورى «اق جول» دەموكراتيالىق پارتياسىنىڭ دەپۋتاتتارىنا بەرگەن جاۋابىندا.

الايدا، «اق جول» پارتياسى جەر قويناۋىن پايدالانۋشىنىڭ كورپوراتيۆتى سىبايلاس جەمقورلىق ءۇشىن جاۋاپتى تۇلعالاردى جاۋاپقا تارتۋ تۋرالى تالابىنا بايلانىستى باس پروكۋرور گيزات نۇرداۋلەتوۆ «قولدانىستاعى زاڭناما جەكە ۇيىمداردىڭ لاۋازىمدى تۇلعالارىن سىبايلاس جەمقورلىق قۇقىق بۇزۋشىلىقتارىنىڭ سۋبەكتىلەرى رەتىندە جىكتەمەيدى» دەپ جاۋاپ بەردى.

سونىمەن بىرگە، پرەمەر-مينيستر اسقار مامين «ەكونوميكالىق ىقپالداستىق جانە دامۋ ۇيىمىنىڭ جەكە سەكتوردا «سىبايلاس جەمقورلىق» ۇعىمىن تاراتۋ جونىندەگى ۇسىنىمىنىڭ ورىندالۋى اياسىندا سىبايلاس جەمقورلىققا قارسى زاڭناماعا «كورپوراتيۆتى سىبايلاس جەمقورلىق» ۇعىمىن ەنگىزۋ ماسەلەسى قاراستىرىلىپ جاتىر»-دەپ حابارلادى. «اق جول» پارتياسى دا وسىنى تالاپ ەتۋدە. 

Abai.kz