مەملەكەت باسشىسى قاسىم-جومارت توقاەۆ «Birgemiz» اتتى رەسپۋبليكالىق ۆولونتەرلەر فرونت-ءوفيسىنىڭ اشىلۋ راسىمىنە قاتىستى.

قازاقستان پرەزيدەنتى ۆولونتەرلىك جوبالاردى ۇيلەستىرەتىن ءارى قوعامدىق مونيتورينگ جاسايتىن جانە ۆولونتەرلىكتى بۇكىل ەلىمىز بويىنشا وقىتىپ، ناسيحاتتايتىن فرونت-ءوفيستىڭ جۇمىسىمەن تانىستى.  سونداي-اق مەملەكەت باسشىسىنا «Qazvolunteەr.kz» ونلاين-پلاتفورماسى كورسەتىلدى.

قاسىم-جومارت توقاەۆ ءوز سوزىندە  ۆولونتەر جىلىندا كوپتەگەن اۋقىمدى جوبالار قولعا الىناتىنىن اتاپ ءوتتى.

– يگى ىسپەن اينالىسۋ، ادامدارعا جاقسىلىق جاساۋ – كونە زاماننان كەلە جاتقان ءداستۇر.  بۇل ءداستۇردى مىندەتتى تۇردە ساقتاپ قالۋىمىز كەرەك. سەبەبى بىرەۋگە قول ۇشىن سوزىپ، قولداۋ كورسەتۋ – قانىمىزعا سىڭگەن قاسيەت. حالقىمىزدا وسىنداي بەرەكە-بىرلىككە شاقىراتىن اسار ءداستۇرى بار. بۇل – عاسىرلار بويى قۇندىلىعىن جويماعان اتا سالتىمىز. «جۇمىلا كوتەرگەن جۇك جەڭىل» دەيدى حالقىمىز. ۆولونتەرلىك قىزمەتتىڭ باستى ماقساتى دا – بىرگە جۇمىلىپ، حالىققا قىزمەت ەتۋ، – دەدى مەملەكەت باسشىسى.

پرەزيدەنت قيىن-قىستاۋ ۋاقىتتا قازاقستانعا جەر اۋدارىلىپ كەلگەن كوپتەگەن ۇلت وكىلدەرىن  قازاق حالقى باۋىرىنا باسىپ، ءبىر ءۇزىم نانىمەن بولىسكەنىن اتاپ ءوتتى.

– ۆولونتەرلىك ناقتى ىستەرمەن كورىنەتىن ءپاتريوتيزمنىڭ جوعارى دەڭگەيىن بىلدىرەدى. وتانعا دەگەن ماحاببات ۇلكەن ۇراندار مەن بوس دەكلاراتسيالار ەمەس، بۇل – كۇندەلىكتى ەڭبەك، سونىڭ ىشىندە حالىقتىڭ يگىلىگى ءۇشىن شىنايى اتقارىلاتىن قايىرىمدى ىستەر.  بۇل – كۇندەلىكتى ەڭبەك، بۇل – ادامنىڭ بولمىسى، بۇل – تەرەڭ ءبىلىم، جوعارى مىنەز-قۇلىق مادەنيەتى. وزگەنىڭ دۇنيە-مۇلكىنە قول سۇعاتىن، توناۋشىلىقپەن اينالىساتىن، جالعان پاتريوتتىق ۇرانداردى تاراتاتىن ادامدار پاتريوت ەمەس ەكەنىن ءتۇسىنۋىمىز كەرەك. مۇنداي ادامدار زاڭ بۇزعان بولىپ سانالادى، ياعني، ولار – قىلمىسكەرلەر، قىلمىستىق ەلەمەنتتەر. سوندىقتان ولار قوعام مەن مەملەكەت الدىندا زاڭعا سايكەس جاۋاپ بەرۋى ءتيىس، – دەدى قاسىم-جومارت توقاەۆ.

ونىڭ ايتۋىنشا، پاتريوتيزم، قوعامعا قىزمەت ەتۋ جانە يگىلىكتى ءىس – ادامنىڭ تۇلعالىق جانە رۋحاني دامۋىنىڭ جوعارى دەڭگەيىنىڭ جارقىن كورىنىسى.

– ۆولونتەرلىك قىزمەت رەفورمالاردى جۇزەگە اسىرۋدا، جالپى  مەملەكەتىمىزدى جاڭعىرتۋدا ماڭىزدى ءرول اتقارادى. ياعني، ۆولونتەرلەر وزدەرىنىڭ ءىس-ارەكەتىمەن اسا ماڭىزدى رەفورمالاردى جۇزەگە اسىرۋعا ناقتى ۇلەس قوسادى. ەڭبەكقورلىق، الەمگە اشىقتىق ارقىلى ءبىز وزىق تەحنولوگياعا جانە جوعارى ەڭبەك ونىمدىلىگىنە نەگىزدەلگەن جاڭا ەكونوميكا قۇرا الامىز. ۆولونتەرلىك يدەياسىن بەلسەندى ىلگەرىلەتۋ وتانداستارىمىزدىڭ وي-ساناسىنىڭ جاڭا پاراديگماسىن جاڭعىرتۋعا ىقپال ەتەتىن بولادى، – دەپ اتاپ ءوتتى قازاقستان پرەزيدەنتى.

قاسىم-جومارت توقاەۆ ۆولونتەرلەر الدىندا سويلەگەن سوزىندە بەلسەندى ۇيىمداردى اتاپ ءوتتى. اتاپ ايتقاندا ول قيىن تۇرمىستىق جاعدايعا تاپ بولعان ادامدارعا كومەك قولىن سوزۋعا دايىن مىڭداعان بەلسەندىلەرى بار ۇلتتىق ەرىكتىلەر جەلىسىنىڭ، «Lider.kz»، «Best for kids»، ەلوردالىق «28 پەتەل» كلۋبى مەن «قامقورشىلار كلۋبىنىڭ» جۇمىسىنا جوعارى باعا بەردى.

– قازاقستاندا ۆولونتەرلىكتىڭ بىرتە-بىرتە جالپىۇلتتىق سيپاتقا يە بولىپ كەلە جاتقانىن كورىپ وتىرمىز. بۇل ۇدەرىس ۆولونتەر جىلىندا اتقارىلاتىن ءىس-شارالاردىڭ ارقاسىندا ازاماتتارىمىزدى ودان ءارى بىرىكتىرە تۇسەتىنىنە سەنىمدىمىن. يگى ىستەر ءبىزدىڭ مادەني بىرەگەيلىگىمىزدىڭ اجىراماس بولىگىنە اينالدى. ەلىمىزدە 200-دەن استام ۆولونتەرلىك ۇيىم بار. وندا 50 مىڭنان استام ەرىكتىلەر جۇمىس ىستەيدى، – دەدى مەملەكەت باسشىسى.

قاسىم-جومارت توقاەۆ قازاقستان ازاماتتارىن جاھاندىق جانە ايماقتىق ماسەلەلەردى شەشەتىن حالىقارالىق ۆولونتەرلىك باستامالارعا بەلسەندى تۇردە تارتۋدى ۇسىندى.

– قازاقستان 116 ەلدىڭ 20 ميلليوننان استام ەرىكتىلەرىن بىرىكتىرەتىن دۇنيەجۇزىلىك ەكولوگيالىق «World Clean up day» ناۋقانىنا قوسىلۋعا دايىن. وتانداستارىمىزدىڭ بۇۇ، يۋنيسەف، AIESEC ۇيىمدارىنىڭ ەرىكتىلىك باعدارلامالارىنا جانە باسقا دا حالىقارالىق باستامالارعا اتسالىسۋى ءارتۇرلى مەملەكەتتەردىڭ تاجىريبەسىمەن تانىسۋعا جانە ەلىمىزگە ۇزدىك ۆولونتەرلىك تاجىريبەنى تارتۋعا مۇمكىندىك بەرەدى، – دەدى پرەزيدەنت.

پرەزيدەنتتىڭ پىكىرىنشە، مەملەكەت ۆولونتەرلىكتىڭ ينفراقۇرىلىمىن قالىپتاستىرۋعا قولداۋ كورسەتۋى ءتيىس. ونىڭ ىشىندە،  ايماقتىق فرونت-وفيستەر بارلىق ەرىكتىلەرگە ءوز يدەيالارىن نەمەسە ناقتى ۆولونتەرلىك جوبالارىن ىسكە اسىرۋعا كومەكتەسۋى قاجەت.

– ۆولونتەر جىلى – كەزەكتى ناۋقان ەمەس. وسىنى حالىققا ءتۇسىندىرۋىمىز كەرەك. ەرىكتىلىك – ەل ءۇشىن، قوعام ءۇشىن ادال قىزمەت. ۆولونتەرلىك حالقىمىزدىڭ ءومىر سالتىنا اينالۋى كەرەك. ونى تاۋەلسىز قازاقستاننىڭ بۇگىنگى جانە بولاشاق سيپاتى رەتىندە دارىپتەۋىمىز قاجەت. ەرىكتىلەردىڭ بويىنداعى قايرات-جىگەر ءار ازاماتتى ىنتالاندىرۋى ءتيىس. ەلىمىزدەگى ءار اۋىل-ايماق وسى ماڭىزدى جۇمىستان تىس قالمايدى دەپ سەنەمىن، – دەدى مەملەكەت باسشىسى.

ءىس-شارا سوڭىندا قازاقستان پرەزيدەنتىنە «Birgemiz: Asyl mura»، «Birgemiz: Bilim»، «Birgemiz: Saýlyq»، «Birgemiz: Sabaqtastyq»، «Birgemiz: Taza Álem»، «Birgemiz: Úmit» سەكىلدى جوبالار تانىستىرىلدى.

Abai.kz