سارسەنبى, 18 قاراشا 2026
جاڭالىقتار 97 0 پىكىر 18 قاراشا, 2026 ساعات 15:22

ەۋروپا جولايرىقتا تۇر: ماڭىزدى 2 تاڭداۋ…

سۋرەت: korabelov.info سايتىنان الىندى.

فينليانديا پرەزيدەنتى بۇيدەيدى:

«ءبىز ەۋروپانىڭ اتىنان رەسەيمەن كەلىسىم جاساۋدى تىم ۇزاق ۋاقىت وزگەلەرگە تاپسىرىپ كەلدىك، مەن مۇنى جاۋاپسىزدىق دەپ سانايمىن. ەندى بىزدە ورتاق نەگىز قالىپتاستى. ەۋروپا كوشباسشىلارى پۋتينمەن تىكەلەي بايلانىسقا شىعىپ، وعان ءبىرتۇتاس ۇستانىمىمىزدى، كەلىسكەن تەزيستەردى جەتكىزۋى ءتيىس دەپ ەسەپتەيمىن»، — دەدى فينليانديا پرەزيدەنتى الەكساندر ستۋبب Financial Times باسىلىمىنا بەرگەن سۇحباتىندا.

سونىمەن قاتار ستۋبب ماسكەۋ مەن كيەۆ اراسىنداعى تۇيىققا تىرەلگەن ديالوگتى قايتا جانداندىرعانى ءۇشىن، سونداي-اق بولاشاق كەلىسسوزدەرگە ەۋروپانىڭ قاتىسۋىن قولداعانى ءۇشىن امەريكالىق كەلىسسوز جۇرگىزۋشىلەردىڭ ەڭبەگىن جوعارى باعالايتىنىن ايتتى.

فينليانديا پرەزيدەنتىنىڭ ايتۋىنشا، قازىر ەۋروپا ەكى جولدىڭ ايرىعىندا تۇر:

1) نە شىعىس ەۋروپا ەلدەرىنىڭ كەڭەستىك ىقپال ەتۋ ايماعىنا وتۋىنە اكەلگەن 1945 جىلعى يالتا كونفەرەنتسياسىنىڭ ستسەناريى قايتالانادى.

2) نە شىعىس پەن باتىس اراسىنداعى شيەلەنىستى باسەڭدەتۋگە ىقپال ەتكەن 1975 جىلعى حەلسينكي كەلىسىمدەرىنىڭ رۋحى ۇستەمدىك قۇرادى.

ستۋببتىڭ باعالاۋىنشا، ۋاشيڭتون قازىر قۇرلىقتى ىقپال ەتۋ ايماقتارىنا بولۋگە كوبىرەك بەيىمدەلىپ وتىر، الايدا بولاشاقتا باسقا ءتاسىلدى تاڭداۋى دا مۇمكىن. ول بۇل بەلگىسىزدىك ەۋروپانىڭ رەسەيمەن ءوز بەتىنشە ديالوگ جۇرگىزۋىنە كەدەرگى بولماۋى ءتيىس ەكەنىن باسا ايتتى.

سونداي-اق ستۋبب: «رەسەي سوعىستا جەڭىسكە جەتكەن جوق. ول ءوز الدىنا جەڭىسكە جەتىپ جاتقانىنا سەنۋى مۇمكىن. بىراق، بۇل جەڭىس سول جاقتا دەگەن ءسوز ەمەس. قازىر پۋتين ەۋروپامەن ءوزارا ءىس-قيمىل جاساۋعا دايىن، دەگەنمەن ەۋروپانىڭ ءوزى مۇنداي كەلىسسوزدەرگە دايىندالۋدا كەشىگىپ قالدى»، — دەدى

ەستەرىڭىزگە سالا كەتەيىك: وتكەن ايدا ستۋبب پەن نورۆەگيا پرەمەر-ءمينيسترى يوناس گار ستەرە پۋتينمەن تەلەفون ارقىلى سويلەسكەن.

ال اقش-تىڭ ارنايى وكىلى جەرارد كۋشنەر سوعىستان كەيىن ۋكراينا «ءوز بولاشاعىن ەركىن ايقىنداي الاتىن ەگەمەن، قاۋىپسىز ءارى وركەندەگەن ەل» بولىپ قالۋى ءتيىس ەكەنىن مالىمدەدى…

اق ءۇيدىڭ ارنايى وكىلىنىڭ ايتۋىنشا، بۇل ماقساتتى ىسكە اسىرۋدا ءۇش نەگىزگى باعىت بويىنشا ايتارلىقتاي ىلگەرىلەۋشىلىككە قول جەتكىزىلگەن:

ۋكراينانى بولاشاق اگرەسسيادان قورعاۋعا ارنالعان سەنىمدى ءارى ناقتى قاۋىپسىزدىك كەپىلدىكتەرى;

ۋكراينانىڭ ەۋروپاداعى ۇزاق مەرزىمدى بولاشاعىن بەكىتەتىن ەو-عا مۇشەلىككە ءوتۋ جولى;

ۋكراينانىڭ قارجىلىق تۇراقتىلىعىن، قالپىنا كەلۋىن، ينۆەستيتسيا تارتۋىن جانە ۇزاق مەرزىمدى ەكونوميكالىق ءوسىمىن قولداۋ ماقساتىندا ەۋروپالىق سەرىكتەستەرمەن، دۇنيەجۇزىلىك بانكپەن جانە وزگە دە قۇرىلىمدارمەن بىرلەسىپ ازىرلەنگەن سوعىستان كەيىنگى وركەندەۋدىڭ كەشەندى جوسپارى.

«جيىنتىعىندا بۇل ەلەمەنتتەر ۋكرايناعا رەسەيمەن قالعان كۇردەلى ماسەلەلەردى تالقىلاۋ جانە ءوز حالقى ءۇشىن جارقىن بولاشاق قۇرۋ ءۇشىن كۇش، قاۋىپسىزدىك، ەركىندىك پەن سەنىمدىلىك بەرە الادى»، — دەپ پايىمدايدى كۋشنەر.

سونىمەن قاتار ول ءتۇبى تۇپكىلىكتى بەيبىت كەلىسىمدى رەسەي دە، ۋكراينا دا ماقۇلداۋى ءتيىس ەكەنىن ايتادى.

Abai.kz

0 پىكىر