بەيسەنبى, 9 ءساۋىر 2020
COVID-19 قازاقستاندا. جۇقتىرعاندار — 764. جازىلعاندار — 55. قايتىس بولعاندار — 7
1494 15 پىكىر 21 اقپان, 2020 ساعات 11:29

سيريا: رەسەي مەن تۇركيا سوعىس ارەكەتتەرىنە قاتىسىپ جاتىر

رەسەي جانە تۇرىك اسكەرلەرى بەيسەنبىدە سيريانىڭ يدليب پروۆينتسياسىنداعى سوعىس ارەكەتتەرىنە قاتىسىپ جاتىر. قارۋلى وپپوزيتسيا سيريا پرەزيدەنتى باشار اساد ارمياسى قايتارىپ العان ايماقتى قايتا تارتىپ الۋعا ارەكەت ەتىپ جاتىر.

تۇرىك ارتيللەرياسىنىڭ قولداۋىنداعى وپپوزيتسيالىق كۇشتەر حالىق قونىستانعان نايراب جەرىنە شابۋىل جاسادى. رەسەي قورعانىس مينيسترلىگى مالىمدەگەندەي، ولارعا قارسى رەسەيلىك سۋ-24 ۇشاقتارى سوققى بەرگەن. رەسەي تۇركيانى كوتەرىلىسشىلەر (رەسەيدە اساد ارمياسىنا قارسى كۇرەسىپ جاتقان وپپوزيتسيالىق كۇشتى تەرروريستەر دەپ اتايدى) ارەكەتىن قولداماۋعا شاقىردى.

تۇركيا قورعانىس مينيسترلىگى يدليبتەگى اۋە سوققىسىنان تۇركيانىڭ ەكى اسكەري قىزمەتكەرى قازا بولىپ، بەسەۋى جاراقات العانىن مالىمدەدى. انكارا شابۋىل ءۇشىن جاۋاپكەرشىلىكتى سيريالىق ۇكىمەت كۇشتەرىنە جۇكتەدى. مالىمەتكە قاراعاندا، وسىدان كەيىن تۇرىك ارمياسى اساد ارمياسىنا قارسى سوققى بەرگەن.

19 اقپاندا تۇرىك پرەزيدەنتى رەجەپ تايىپ ەردوعان اساد اسكەرى كەرى شەگىنبەسە، يدليبتە وپپوزيتسيالىق كۇش باقىلاعان جەردى قايتارۋ وپەراتسياسى ءبىر تۇندە باستالىپ كەتۋى مۇمكىن دەپ ەسكەرتتى.

2018 جىلدىڭ قىركۇيەك ايىندا تۇركيا مەن رەسەي ليدەرلەرى ءيدليبتى دەەسكالاتسيا ايماعىنا اينالدىرۋدى، بۇل ەلدىمەكەندە وق اتۋدى توقتاتۋعا كەلىسكەن. بىراق بۇل ايماقتا سوعىس ءالى توقتامادى.

Abai.kz

15 پىكىر