نۇر-سۇلتان مەن الماتى قالالارىندا كارانتين رەجيمىن قامتاماسىز ەتۋ جونىندەگى ءىس-شارالار اياسىندا قر قك اسكەري قىزمەتشىلەرى پوليتسيا جانە ۇلتتىق ۇلان وكىلدەرىمەن بىرگە بلوك-بەكەتتەردە قىزمەت اتقارادى.

كارانتيندىك ايماقتارعا كىرۋ مەن شىعۋدىڭ شەكتەلۋىن ساقتاۋ ءۇشىن اتقارىلاتىن بىرلەسكەن قىزمەت 2020 جىلدىڭ 19 ناۋرىزىنان باستاپ ىشكى ىستەر مينيسترلىگىنىڭ باسشىلىعىمەن ۇيىمداستىرىلدى.

وتكەن تاۋلىكتە نۇر-سۇلتان قالاسىنىڭ اۋماعىنداعى بلوك-بەكەتتەردە قارۋلى كۇشتەر اسكەري قىزمەتشىلەرى اتقاراتىن قىزمەتتەردىڭ ۇيىمداستىرىلۋىن قورعانىس ءمينيسترى گەنەرال-مايور نۇرلان ەرمەكباەۆ پەن قر قك باس شتابى باستىعى گەنەرال-مايور مۇرات بەكتانوۆ تەكسەردى. تەكسەرۋ بارىسىندا اسكەري قىزمەتشىلەردىڭ مورالدىق-پسيحولوگيالىق جاعدايىنا كوڭىل ءبولۋ، ولاردىڭ بارلىق كەرەك-جاراقپەن قامتاماسىز ەتىلۋى، قىزمەت كەزىندەگى كەز-كەلگەن جاعدايدا ءوزىنىڭ ءىس-قيمىل ءتارتىبىن ءبىلۋى باستى نازارعا الىندى.

بۇرىن ايتىلعانداي، نىسانداردى دەزينفەكتسيالايتىن بولىمشەلەردەن باسقا قارۋلى كۇشتەردەن بلوك-بەكەتتەرىن كۇشەيتۋ ءۇشىن ءتيىستى دايىندىقتان وتكەن جانە وسىنداي ءىس-قيمىلدا تاجىريبەسى بار دەسانتتىق-شابۋىلداۋ اسكەرلەرىنىڭ كەلىسىمشارت بويىنشا اسكەري قىزمەتشىلەرى، بىتىمگەرشىلىك پولكى جانە اسكەري پوليتسيا  تارتىلادى.

Abai.kz